哥林多前书 2章6节 到 2章16节   背景资料  上一笔  下一笔
Tī chit段经文中,使徒保罗以人ê智慧kah上帝ê智慧之间ê差别做对照;伊特别指出上帝ê智慧是种奥秘,m̄是人ê智慧ē-tàng解开,除非有圣神tī人心内中做工chiah会有效果。

第6到8节,chia ê「灵性成熟ê人」,相对tī第三章1节所提起ê「信仰上ê婴á」。使徒保罗讲对chit种ē-tàng认真思考性命问题ê人,伊所传讲ê,是属tī「上帝奥秘ê智慧」。Chia所讲ê「奥秘」,原本是teh指隐藏,无为人知影ê事,taⁿ已因上帝ê启示,hō͘人明白、顿悟过来。Tī使徒保罗ê书信中,「奥秘」是teh指:1.有关上帝救赎ê工作(参考二:1),2.死人koh活(参考十五:51—52),3.上帝ê创造 (参考二:7),4.婚姻ê关系(参考以弗所书五:32)。5.外邦人信主耶稣,犹太人拒绝(参考罗马书十一:25)等。

第9节,比较麻烦ê是chit节ê出处Tī圣经中chhōe bē-tio̍h。主要teh表明:上帝赏赐hō͘他ê子民,lóng是siōng好ê,是世人过去m̄-bat看过、听过,甚至想像bē到ê。亲像:以色列人民ē-tàng经过红海,tī旷野食吗哪,甚至thang进入迦南地等等就是真好ê例。

第10到12节,chit三节真重要,chia讲出只有tī上帝ê灵里,chiah ē-tàng认bat上帝。换句话讲,tio̍h认bat上帝,并m̄是用人ê智慧、经历,甚至学历ē-tàng认bat ê,却是需要上帝圣神ê启示,而每一个接受耶稣做性命救主ê人,lóng是领受了上帝ê圣神,这是上帝hō͘基督徒siōng好ê恩赐。

第13到14节,使徒保罗真清楚讲,伊m̄是用人ê智慧传讲起帝救恩ê事,却是用圣神所教导ê言语。M̄-koh属灵ê人kah不属灵ê人之间是会有差别ê;后者无法度领受上帝ê恩赐,甚至会嘲(sau)笑上帝tī耶稣里ê救恩。

第15到16节,「属圣神ê人」,是teh指有上帝ê圣神同在者,chit种人teh判断世间ê事物ê时,会因为有圣神同在而充满智慧,hō͘伊清楚知影万物ê价值。Á chit点是一般人无法度理解ê。使徒保罗tī chia引用以赛亚书第四十章13节,表示只有tī上帝圣神启示之下,人才ē-tàng明白上帝拯救ê恩典。所以每一个信耶稣ê人,lóng会有圣神充满而明白上帝拯救ê计画,并且照上帝ê旨意去遵行。

重新查询 专卷研经 哥林多前书系列
错误回报,请联系