有kóa学者认为chit首诗篇是由三篇独立ê短诗组合而成ê。一是tùi第1到4节，chit首诗歌是哀歌。二是tùi第5到9节，这是单纯ê诗歌。三是第10到12节，这是一首祈祷ê诗歌。M̄-koh mā有其他学者认为这是一首属tī智慧文学ê诗歌，讨论到人kah上帝之间ê关系。

第1到4节，chit段诗歌真清楚说明人ê心中有想要犯罪ê念头，就是想beh脱离上帝ê教示。Siōng典型ê心态，就是认为上帝看bē-tio̍h，á是根本就无惩罚。心中所想ê lóng是邪恶，连躺tī床顶mā是teh图谋tio̍h邪恶ê事。Ná亲像先知弥迦tī kā伊谴责hit时代ê邪恶者仝款（参考弥迦书二：1）。

第5到9节，chit段诗歌kah前一段诗歌呈现完全无相仝ê内容。Tī chit段诗歌中，诗人teh歌颂上帝有「无变ê疼」。诗篇中一再出现形容上帝有「无变ê疼」ê诗句（参考十三：5、廿五：6、廿六：3、三十一：7、五十二：8、六十一：7、八十五：7、八十九：28、九十八：3、一○三：8、一○七：43、一一九：76）。诗人māài kā「无变ê疼」ê上帝，用「信实」来表达，说明对约ê重视，ná亲像他「无变ê疼」仝款。因为án-ne，「无变ê疼」时常会kah「信实」chit两个词句连tio̍h同齐用（参考廿五：10、四十：11、五十七：3、一一五：1、一三八：2）。

每pái圣经讲tio̍h上帝ê「信实」ê时，表示上帝是一个守约ê上帝。他永远会记得kah世人所立ê约，而且会坚持守tiâu（参考创世记廿四：27，申命记六：23、七：8、12、八：18、九：5，约书亚记廿一：45，撒母耳记上十二：22，耶利米书廿九：10、三十二：22、三十三：14）。

值得注意ê是第6节，诗人讲上帝m̄-nā看顾人类，他同时mā看顾所有「cheng-seⁿ」。因为上帝是一切性命ê来源，只要tī上帝ê内面，就会看见性命ê亮光（第9节）。

第10到12节，所谓「认bat」，是teh指遵照上帝旨意做tāi-chì ê人。只有确实去遵行ê人，chiah是真正认bat上帝ê人。「眷顾」一词，表示「延长性命」ê意思。

第11节，chit节是第1到4节ê浓缩句，描述心中无上帝ê人，就是骄傲、作恶ê人chiah会有ê行为。第12节诗人讲chit种人，一定会受tio̍h上帝严厉ê惩罚，结果就是倒地不起。