創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 底拿Hông強姦
利亞kā雅各所生ê chabó͘ kiáⁿ底拿，出去beh見hit所在ê chabó͘ gín-á。
34:2 Hit所在ê頭人希未人哈抹ê kiáⁿ示劍看tio̍h她，to̍h kā她khiú來做伙睏，kā她凌辱。
34:3 伊ê心戀慕雅各ê chabó͘ kiáⁿ底拿，愛chitê chabó͘ kiáⁿ，to̍h用好話kā她安慰。
34:4 示劍kā伊ê老父哈抹講：「求你kā我聘chitê chabó͘ gín-á hō͘我做bó͘。」
34:5 雅各聽tio̍h示劍òe lahsap伊ê chabó͘ kiáⁿ底拿。Hit時，伊hiahê kiáⁿ kah伊ê chengseⁿ tī山裡，所以，雅各恬恬無出聲，thèng候in tńg來。
34:6 示劍ê老父哈抹出來見雅各，beh kah伊講話。
34:7 雅各hiahê kiáⁿ聽tio̍h chitê tāichì，to̍h tùi山裡tńg來，ta̍k个lóng m̄甘願，非常受氣，因為示劍tī以色列做出見笑ê tāichì，kah雅各ê chabó͘ kiáⁿ做伙睏；這本來to̍h是無應該做ê tāichì。
34:8 哈抹kah in參詳講：「我ê kiáⁿ示劍ê心欣慕lín ê chabó͘ gín-á，求lín kā她hō͘我ê kiáⁿ做bó͘。
34:9 Lín kah阮大家結親，lín thang kā lín ê chabó͘ kiáⁿ hō͘阮，lín mā thang娶阮ê chabó͘ kiáⁿ。
34:10 Lín kah阮做伙tòa。地tī lín ê面前，lín thang tòa chia khiā，做senglí，建置產業。
34:11 示劍對chabó͘ gín-á ê老父kah她ê兄弟講：「願tī你ê面前得tio̍h恩典，lín對我所求ê我lóng beh hō͘ lín。
34:12 Chhut-chāi lín beh對我討gōa chē聘金kah禮物，我一定照lín所講ê hō͘ lín，只有ài lín kā chabó͘ gín-á hō͘我做bó͘。」
34:13 雅各hiahê kiáⁿ，因為示劍òe lahsap in ê小妹底拿，to̍h用奸詐ê話來應示劍，kah伊ê老父哈抹。In對in講：
34:14 Kā阮ê小妹hō͘無受割禮ê人做bó͘，chitê tāichì阮做bē到，因為he是阮ê見笑。
34:15 Lín所有ê chapo͘人，若lóng親像阮相siâng受割禮，阮chiah ē tàng答應lín。
34:16 阮to̍h kā阮ê chabó͘ kiáⁿ hō͘ lín做bó͘，阮mā 娶lín ê chabó͘ kiáⁿ；阮to̍h kah lín做伙tòa，成做仝一个人民。
34:17 設使lín m̄聽阮ê話來受割禮，阮to̍h beh帶阮ê小妹來去。」
34:18 哈抹kah伊ê kiáⁿ示劍，歡喜in ê話。
34:19 Hitê少年人做chitê tāichì，lóng無延chhiân，因為伊愛雅各ê chabó͘ kiáⁿ，而且伊tī in老父ê家siōng尊貴。
34:20 哈抹kah伊ê kiáⁿ示劍，來到in ê城ê門口，kā in ê城ê人講：
34:21 「Chiahê人kah咱和好，不如准in tī chitê地tòa，做senglí；koh再講，chitê地mā開闊，會容允得in。咱thang娶in ê chabó͘ kiáⁿ做bó͘，mā thang kā咱ê chabó͘ kiáⁿ嫁hō͘ in。
34:22 總是，tio̍h有一項，hiahê chiah beh允咱，kah咱tòa，成做仝一个人民；to̍h是咱中間所有ê chapo͘人lóng tio̍h受割禮，親像in受割禮ánne。
34:23 伊ê牛、羊、財產kah一切ê chengseⁿ，kám無lóng歸tī咱？只有tio̍h允准in，in to̍hbeh kah咱tòa。」
34:24 見若tùi城門出來ê人lóng遵thàn哈抹kah伊ê kiáⁿ示劍ê話；就ánne，見若tùi城門出來ê chapo͘人lóng受割禮。
34:25 到第三日，群眾當teh痛疼ê時，雅各兩 个kiáⁿ，to̍h是底拿ê阿兄西緬kah利未，lóng gia̍h刀，趁人無tiuⁿ-tî ê時來到城內，thâi死所有ê chapo͘人，
34:26 mā用刀thâi死哈抹kah伊ê kiáⁿ示劍，chhōa底拿tùi示劍ê厝出來，to̍h離開hia。
34:27 雅各hiahê kiáⁿ為tio̍h in小妹受òe lahsap，to̍h來到受thâiê人hia，搶劫in ê城。
34:28 In搶in ê羊群、牛群kah驢á，以及城內kah田裡所有ê物件。
34:29 koh kā in所有ê貨物kah錢財，一切ê gín-á kah chabó͘人，以及ta̍k塊厝所有ê物件lóng搶去。
34:30 雅各kā西緬kah利未講：「Lín連累tio̍h我，hō͘我tī chit所在tòa ê人民中間，to̍h是tī迦南人kah比利洗人ê中間有臭名。而且我ê人額少，in一定ē聚集來攻擊我，phah我，我kah全家ê人lóng ē滅亡。」
34:31 In講：「伊kám thang款待阮小妹親像娼妓？」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。