列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 偤大王亞瑪謝
(代下25：1-24)
以色列王約哈斯ê kiáⁿ約阿施第二年，偤大王約阿施ê kiáⁿ亞瑪謝坐位。
14:2 伊坐位ê時，二十五歲，tī耶路撒冷做王共二十九年。伊ê老母ê名叫做E-ho-a-tan，是耶路撒冷人。
14:3 亞瑪謝行上主看做好ê tāichì，總是，無親像伊ê祖先大衛，to̍h是照伊ê老父約阿施所行ê一切去行。
14:4 總是，山頭壇iáu未廢除，人民猶原tī山頭壇獻祭燒香。
14:5 早前hiahê人臣thâi死伊ê老父偤大王，taⁿ國權一下堅固，to̍h kā inthâi死。
14:6 總是，無kā in ê kiaN2thâi死，照摩西律法ê冊所記載，上主命令講：「M̄-thang因為kiáⁿ來thâi死老父，mā m̄ thang因為老父來thâi死kiáⁿ，ta̍k人tio̍k因為本身ê罪來死。」
14:7 亞瑪謝tī鹽ê山谷thâi死以東人一萬，koh征服西拉，kā她改名叫做Iok-thel，直到今á日。
14:8 Hit時，亞瑪謝差使者去見耶戶ê孫，約哈斯ê kiáⁿ，以色列王約阿施，講：「來，咱兩人tī戰場相見面。」
14:9 以色列王約阿施差使者去見偤大王亞瑪謝講：「黎巴嫩ê草刺差使者去見黎巴嫩ê柏香樹，講：『Kā你ê chabó͘ kiáⁿ hō͘我ê kiáⁿ做bó͘。』後來，黎巴嫩有一隻野獸經過，thún踏hitê草刺。
14:10 你已經phah贏以東，心就驕傲，你掠chitê做榮光，tī厝內安然toa3to̍h好，ná ē beh起事惹災禍，hō͘本身kah偤大國做伙倒壞？」
14:11 總是，亞瑪謝m̄肯聽。就ánne，以色列王約阿施起來，tī偤大ê伯示麥kah偤大王亞瑪謝tī戰場相見面。
14:12 偤大tī以色列ê面前thâi輸，ta̍k人走tńg去in ê布棚。
14:13 以色列王約阿施tī伯示麥掠tio̍h亞哈謝ê孫，約阿施ê kiáⁿ偤大王亞瑪謝，to̍h來到耶路撒冷，拆毀耶路撒冷ê城牆，tùi以法連門到角門共四百肘，
14:14 koh kā上主殿內kah王宮金庫所有ê金銀kah器具，lóng the̍h去，koh掠人去做準當，to̍h倒tńg去撒馬利亞。
14:15 約阿施其他ê tāichì，見若伊所行ê kah伊ê能力，以及kah偤大王亞瑪謝交戰ê tāichì，kám無lóng記tī以色列chiahê王ê記錄？
14:16 約阿施kah伊ê祖先同睏，kah以色列chiahê王做伙葬tī撒馬利亞。伊ê kiáⁿ耶羅波安續接伊做王。
14:17 偤大王亞瑪謝死亡
(代下25：25-28)
以色列王約哈斯ê kiáⁿ約阿施死了後，偤大王約阿施ê kiáⁿ亞瑪謝iáu koh活十五年。
14:18 亞瑪謝其他ê tāichì，kám無lóng記tī偤大列王ê記錄？Tī耶路撒冷有人結黨beh害亞瑪謝。
14:19 伊to̍h逃走去拉結，in差人jiok伊到拉吉，tī hia kā伊thâi死。
14:20 人to̍h用馬載伊ê身屍來到耶路撒冷，kah伊ê祖先葬做伙tī大衛ê城。
14:21 偤大眾人設立亞撒利雅續接伊ê老父亞瑪謝做王。Hit時，伊chiah十六歲。
14:22 亞瑪謝王kah伊ê祖先同睏了後，亞撒利雅起E-lot ê城，hō͘她猶原歸偤大國ê管轄。
14:23 以色列王耶羅波安二世
偤大王約阿施ê kiáⁿ亞瑪謝十五年，以色列王約阿施ê kiáⁿ耶羅波安tī撒馬利亞坐位，總共做王四十一年。
14:24 伊行上主看做pháiⁿ ê tāichì，無離開尼八ê kiáⁿ耶羅波安hō͘以色列犯罪ê。
14:25 伊恢復以色列交界ê地，tùi哈馬口到亞拉巴海，照上主—以色列ê上帝託祂ê奴僕Gat-he-huil人A-mit-thài ê kiáⁿ—先知約拿所講ê話。
14:26 因為上主看tio̍h以色列人真艱苦，無論受拘束ê á是自由ê lóng無去，mā無人幫贊以色列。
14:27 上主m̄ bat講beh kā tī天下擦消以色列ê名，就託約阿施ê kiáⁿ耶羅波安ê手來kā in救。
14:28 耶羅波安其他ê tāichì，見若伊所行ê kah伊ê能力，伊án怎交戰，án怎回復大馬士革kah哈馬，to̍h是早前屬偤大ê，hō͘ in koh歸以色列，kám無lóng記tī以色列chiahê王ê記錄？
14:29 耶羅波安kah伊ê祖先以色列chiahê王同睏了後，伊ê kiáⁿ撒迦利雅續接伊做王。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。