列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
13:1 以色列王約哈斯
偤大王亞哈謝ê kiáⁿ約阿施二十三年，耶戶ê kiáⁿ約哈斯tī撒馬利亞坐位，做以色列王，共十七年。
13:2 伊行上主所看做pháiⁿ ê tāichì，遵thàn尼八ê kiáⁿ耶羅波安，hō͘以色列人犯hitê罪，lóng無離開hitê罪。
13:3 上主就受氣以色列人，tiāⁿ-tiāⁿ kā in交tī亞南王哈設ê手，kah哈設ê kiáⁿ ê手。
13:4 約哈斯懇求上主，上主聽伊，因為祂看tio̍h以色列人受制壓，to̍h是亞南王kā in制壓。
13:5 上主賞賜以色列一个拯救者，hō͘ in脫離亞南人ê手。以色列人to̍h照舊tòa tī in ê布棚。
13:6 總是，in無離開耶羅波安ê家ê罪，to̍h是hō͘以色列人犯罪ê，猶原ánne去行；撒馬利亞ê亞舍拉iáu留teh。
13:7 伊tī人民中只有留馬兵五十，戰車十台，步兵一萬，因為亞南王有kā in剿滅，kā in thún踏，親像稻埕ê土沙。
13:8 約哈斯其他ê tāichì，見若伊所行ê kah伊ê能力，kám無lóng記tī以色列chiahê王ê記錄？
13:9 約哈斯kah伊ê祖先同睏，人kā伊埋葬tī撒馬利亞。伊ê kiáⁿ約阿施續接伊做王。
13:10 以色列王約華施
偤大王約阿施三十七年，約哈斯ê kiáⁿ約華施tī撒馬利亞坐位，做以色列王，共十六年。
13:11 伊行上主所看做pháiⁿ ê tāichì，無離開尼八ê kiáⁿ耶羅波安ê罪，to̍h是伊hō͘以色列人犯罪ê，猶原ánne行。
13:12 約阿施其他ê tāichì，見若伊所行ê，以及伊kah偤大王亞瑪謝交戰ê能力，kám無lóng記tī以色列chiahê王ê記錄？
13:13 約阿施kah伊ê祖先同睏，耶羅波安坐伊ê位。約阿施kah以色列chiahê王做伙埋葬tī撒馬利亞。
13:14 以利沙ê死亡
以利沙破病，to̍h是teh beh死ê病，以色列王約阿施落來看伊，àⁿ tī伊ê面啼哭，講：「我ê父！我ê父！以色列ê戰車kah伊ê馬兵！」
13:15 以利沙kā伊講：「你gia̍h弓箭。」伊to̍hgiah8弓kah箭。
13:16 Koh kā以色列王講：「你用手拔弓。」伊to̍h用手拔弓。
13:17 以利沙hōaⁿ手tī王ê手，講：「你開ǹg東ê窗á。」伊to̍h開。以利沙講：「射箭。」伊to̍h射箭。以利沙講：「這是上主thâi贏ê箭，to̍h是thâi贏亞南人ê箭，因為你ētī亞弗攻擊亞南人，直到kā in全部消滅。」
13:18 Koh講：「Gia̍h hiahê箭。」伊to̍hgiah8 hiahê箭。伊koh kā以色列王講：「Phah地！」伊phah三pai2to̍h soah。
13:19 上帝ê奴僕對伊受氣講：「Hit時，你tio̍h phah五六pái，to̍h ē攻擊亞南，直到她全部消滅；taⁿ只有會phah敗亞南人三pái。」
13:20 以利沙死了後，人kā伊埋葬。到新年，有摩押kui陣人侵犯境界。
13:21 有人tú-á teh埋葬死人，忽然看tio̍h kui陣人，to̍h kā死人hiat tī以利沙ê墓，死人一下kha̍p tio̍h以利沙ê骨頭，to̍h koh活khiā起來。
13:22 以色列kah亞南王交戰
約哈斯ê年間，亞南王哈設tiāⁿ-tiāⁿ 制壓以色列人。
13:23 總是，上主因為祂kah亞伯拉罕、以撒、雅各所立ê約，猶原施恩hō͘以色列，kā in憐憫，kā in照顧，m̄甘kā in剿滅，iáu未kā in趕逐離開祂ê面前。
13:24 亞南王哈設死，伊ê kiáⁿ續接伊做王。
13:25 早前哈設kah約阿施ê老父約哈斯交戰，tùi伊ê手the̍h去幾nā个城，taⁿ約哈斯ê kiáⁿ約阿施tùi哈設ê kiáⁿ ê手the̍h倒tńg來。約阿施kā伊phah三pái，征服以色列hiahê城。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。