列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 Kā斧頭Chhōe Tńg來
先知ê學生kā以利沙講：「你看，阮kah你所tòa ê所在siuⁿ狹，
6:2 求你准阮去約旦河，ta̍k人tùi hia取一支柴料，hō͘阮tī hia起一个所在thang tòa。」以利沙講：「Lín thang去。」
6:3 有一个講：「M̄-thang推辭，求你kah奴僕做伙去。」應講：「我beh去。」就ánne，伊to̍hkah in去。
6:4 In來到約旦河，就剉樹。
6:5 有一个人剉樹ê時，斧頭肉ka-la̍uh tī水裡。伊to̍h大聲hoah：「慘ah！我ê主ah，chit支斧頭是借來ê。」
6:6 上帝ê奴僕講：「Ka-la̍uh tī tó位？」伊to̍h報伊看hit所在。伊to̍h剉一支柴，hiat tī hia，斧頭肉就浮起來。
6:7 伊講：「Gia̍h起來！」Hitê人to̍h伸手gia̍h起來。
6:8 亞南王ê軍隊敗退
亞南王beh kah以色列交戰，to̍h kah伊ê人臣議論講：「我tio̍h紮營tī某所在，某所在。」
6:9 上帝ê奴僕差人去見以色列王，講：「你tio̍h謹慎，m̄ thang tùi某所在經過，因為亞南人落來tī hia。」
6:10 以色列王差人到上帝ê奴僕所講tio̍h提防ê所在。就ánne，無受傷害，m̄ nā一pái兩pái。
6:11 亞南王因為chitê tāichì心內真憂悶，召伊ê人臣來，kā in講：「咱中間啥人為以色列王，lín無來kā我講？」
6:12 有一个人臣講：「我ê主，我ê王，m̄是ánne lah，是以色列中ê以利沙先知kā你tī睏房所講ê話，lóng kā以色列王講。」
6:13 王講：「Lín去探看伊tī tó位，我thang差人去kā伊掠。」有人kā王講：「你看，伊tī To-than。」
6:14 王to̍h差馬、車kah大隊ê兵去hia。In透暝來到位，圍困hitê城。
6:15 上帝ê奴僕ê差用透早起來出去，看tio̍h有軍兵、馬kah 車teh圍困城。差用kā伊講：「慘ah！我ê主，咱beh án怎chiah好？」
6:16 上帝ê奴僕講：「M̄免驚，因為kah咱同在ê比kah in tī ·leh-ê koh khah chē。」
6:17 以利沙祈禱講：「上主ah，求祢開伊ê目chiu ，hō͘伊ē看tio̍h。」上主to̍h開少年人ê目chiu ，伊to̍h看tio̍h，你看，遍山火馬火車teh圍以利沙。
6:18 亞南王攻擊到伊hia，以利沙祈禱講：「上主ah，求祢phah chiahê人民，hō͘ in chheⁿmê。」祂就phah hō͘ in chheⁿmê，照以利沙ê話。
6:19 以利沙kā in講：「Chitê m̄是hitê路，chitê mā m̄是hitê城；lín tòe我，我beh chhōa lín到lín所chhōe ê人hia。」to̍h chhōa in來到撒馬利亞。
6:20 In入去撒馬利亞，以利沙講：「上主ah，求祢開chiahê人ê目chiu ，hō͘ in看tio̍h。」上主開in ê目chiu ，in to̍h看tio̍h，無phah算，已經是tī撒馬利亞ê城內。
6:21 以色列王看tio̍h in，to̍h問以利沙講：「我ê父，我kám tio̍h kā in phah？Kám tio̍h kā in phah？」
6:22 以利沙應講：「M̄-thang kā in phah！你用刀用弓所掠來ê，kám thang kā in phah？Tio̍h hē餅kah水tī in ê面前，hō͘ in lim食，tńg去in ê主人hia。」
6:23 王替in準備真chē食物，in lim食了後，to̍h叫in去；in to̍htng2去in ê主人hia。就ánne，亞南ê軍兵無koh侵犯以色列ê境界。
6:24 撒馬利亞受圍困
後來，亞南王聚集伊ê軍隊，起來圍困撒馬利亞。
6:25 撒馬利亞大飢荒，in圍困城，致使一个驢頭值銀八十舍客勒，鴿糞一khap ê四分之一值銀五舍客勒。
6:26 以色列王tùi城牆經過ê時，有一个chabó͘人對伊求叫，講：「我ê主，我ê王，幫贊我。」
6:27 王講：「上主無幫贊你，我beh tùi tó位幫贊你？Kám是tùi稻埕á是tùi酒窟？」
6:28 王koh講：「你有啥物艱苦？」她應講：「Chitê chabó͘人對我講，交出你ê kiáⁿ，咱今á日thang kā伊食，明á載咱食我ê kiáⁿ。」
6:29 阮就煮我ê kiáⁿ來食。隔tńg工我對她講，交出你ê kiáⁿ，咱thang煮來食，總是，她kā她ê kiáⁿ藏起來。」
6:30 王聽tio̍h chabó͘人ê話，to̍h拆裂衫，tùi城牆頂經過，人民看tio̍h伊，看tio̍h伊身軀ê衫是粗麻布。
6:31 王講：「沙法ê kiáⁿ以利沙ê頭殼，今á日若猶原連tī伊ê身軀，願上主加倍kā我責罰！」
6:32 Hit時，以利沙坐tī厝內，長老mā kah伊做伙teh坐。王差一个人做頭去，使者iáu未到伊hia，以利沙kā長老講：「Lín看chitê兇手ê kiáⁿ，ná ē差人來取我ê頭殼？Lín看，使者若來，to̍h tio̍h關門，阻止伊tī門外。tī伊ê後面kám無有伊ê主人ê腳步聲？」
6:33 伊iáu kah in講話ê時，你看，使者落去伊hia，講：「你看，chitê災禍tùi上主來ê，我ná tio̍h koh thèng候上主？」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。