列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
5:1 乃縵得tio̍h醫治
亞南王ê軍長乃縵，tī伊ê主人ê面前做大，做尊貴，因為上主bat用伊hō͘亞南得勝，伊mā是大權能ê勇士，總是，伊患癩ko。
5:2 早前亞南人kui陣出去，tùi以色列地掠一个chabó͘ gín-á，她to̍h來侍候乃縵ê bó͘。
5:3 她kā她ê主母講：「苦bē tàng我ê主kah撒馬利亞ê先知同在，伊一定ē醫好伊ê癩ko。」
5:4 有人入去kā伊ê主講：「屬以色列地ê chabó͘ gín-á ánne ánne講。」
5:5 亞南王講：「你去，我mā beh寄一張phoe hō͘以色列王。」乃縵to̍h去，帶銀十他連得，金六千，衫褲十套；
5:6 帶phoe去到以色列王hia。Phoe內講：「Phoe到你hia ê時，你看，我差人臣乃縵去見你，你tio̍h kā伊ê癩ko醫好。」
5:7 以色列王看phoe了後，to̍h拆裂伊ê衫，講：「我kám是上主，ē tàng hō͘人死，hō͘人活？Chitê人竟然差人來我chia，叫我醫好伊ê癩ko。請lín 斟酌想，看chitê人án怎chhōe縫beh來攻擊我。」
5:8 上帝ê奴僕以利沙聽tio̍h以色列王拆裂伊ê衫，to̍h差人去見王講：「你ná ē拆裂衫？Thang hō͘ hitê人來我chia，伊chiah知以色列中有先知。」
5:9 乃縵to̍h kah伊ê馬，伊ê車來，khiā tī以利沙ê厝門口。
5:10 以利沙差一个使者，kā乃縵講：「你去約旦河洗身軀七pái，你ê肉to̍h ē復原，你ē得tio̍h清氣。」
5:11 乃縵就受氣，退去，講：「我本想講伊一定ē出來見我，khiā-teh求叫上主—伊ê上帝ê名，tī患tio̍h ê所在搖手，來醫好癩ko ê。」
5:12 大馬士革ê河，A-má-nah kah Phal-phal，kám無比以色列所有ê水khah好？我kám bē tàng tī hia洗身軀來清氣？」to̍h oa̍t-tńg身受氣，做伊去。
5:13 乃縵ê奴僕進前來，kā伊講：「我ê父，先知若叫你去做一件大事，你kám無beh做？何況伊kantaⁿ kā你講，去洗to̍h ē清氣？」
5:14 乃縵to̍h落去，照上主奴僕ê話，tī約旦河洗身軀七pái；伊ê肉就復原，親像gín-á肉，伊to̍h清氣。
5:15 乃縵kah所有tòe伊ê人倒tńg來上帝ê奴僕hia，khiā tī伊ê面前講：「你看，我taⁿ知，除以色列以外，普天下無有上帝。Taⁿ求你收你ê奴僕ê禮物。」
5:16 以利沙講：「我kí永遠活ê上主，to̍h是我khiā tī祂ê面前ê，來chiùchōa，我一定m̄收。」乃縵強迫伊收，m̄ koh伊絕對m̄收。
5:17 乃縵講：「若m̄收，求你kā兩隻騾所ē tàng載ê土hō͘你ê奴僕，因為tùi taⁿ以後，你ê奴僕無koh用燒祭á是別種ê祭hō͘別个神明，只有beh獻hō͘上主。
5:18 獨獨有一項事，願上主赦免你ê奴僕，to̍h是我ê主入臨門 ê廟，tī hia敬拜，óa tio̍h我ê手ê時，我koh tī臨門ê廟àⁿ腰，to̍h是我tī臨門ê廟àⁿ腰ê時，願上主tī chit件tāichì赦免你ê奴僕。」
5:19 上帝ê奴僕to̍h kā伊講：「你thang平安去。」乃縵to̍h離開伊去，
5:20 行一站á了後，上帝ê奴僕以利沙ê差用基哈西，心內想講：我ê主人體貼chitê亞南人乃縵，無beh tùi伊ê手收伊所帶來ê，我kí永遠活ê上主來講，我beh走去jiok伊，tùi伊the̍h淡薄。
5:21 基哈西to̍h去jiok乃縵。乃縵看tio̍h有人走來jiok伊，to̍h落車kā伊迎接，講：「Lóng平安？」
5:22 基哈西講：「Lóng平安。我ê主差我來講：『Tú-chiah有兩 个少年人，是先知ê學生，tùi以法連山地來見我，請你用銀一他連得kah衫褲兩套hō͘伊。」
5:23 乃縵講：「M̄-thang推辭，請收兩他連得。」強迫伊，to̍h kā兩他連得銀裝tī兩 个布袋，kah兩套衫褲交hō͘伊ê兩 个奴僕；兩 个奴僕kā hiahê物揹teh，行tī伊ê頭前。
5:24 來到山裡ê時，基哈西tùi in ê手接來，hē tī厝內，差in去，in to̍h去。
5:25 伊to̍h入去khiā tī伊ê主人ê面前。以利沙問伊講：「基哈西，你tùi tó位來？」伊應講：「你ê奴僕無去tó位。」
5:26 以利沙kā伊講：「Hitê人落車倒tńg來kā你迎接ê時，我ê心kám無kah你去？這kám是接受銀，接受衫褲、橄欖園、葡萄園、牛、羊、奴僕、女婢ê時？」
5:27 就ánne，乃縵ê癩ko beh傳hō͘你kah你ê kiáⁿ孫，一直到永遠。基哈西tùi以利沙ê面前退出去，to̍h起癩ko，白kah親像雪。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。