創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
33:1 Iâ-kop kah E-sáu Hōe-biān
Iâ-kop gia̍h thâu khòaⁿ, khòaⁿ tio̍h E-sáu teh lâi, koh ū sì-pah lâng kah i chò-hóe lâi. I chiū kā hiahê gín'á hun-khui, kau hō͘ Le-ah, kau hō͘ La̍h-khel, kau hō͘ nn̄g-ê lú-pī.
33:2 Iâ-kop kā lú-pī kah in ê kiáⁿ pâi tī thâu-chêng, Le-ah kah i ê kiáⁿ pâi tī āu-bīn, La̍h-khel kah Iô-sé-huh pâi tī lō͘-bóe.
33:3 I pún-sin tī in ê thâu-chêng kòe-.khì, liân-liân chhit pái phak tī tē-.ni̍h, chiah óa-kīn i ê a-hiaⁿ.
33:4 E-sáu cháu-lâi kā i gêng-chiap, kā i lám-.leh, koh lám i ê ām-kún, kā i chim, nn̄g lâng chiū thî-khàu.
33:5 E-sáu gia̍h thâu khòaⁿ tio̍h chabó͘ lâng kah gín'á, chiū kóng, " Chiahê kah lí tâng kiâⁿ ê sī siáⁿ lâng? " Iâ-kop ìn kóng, " Chiahê gín'á sī Siōng-tè si un hō͘ lí ê lô͘-po̍k ê. "
33:6 Jiân-āu, nn̄g-ê lú-pī kah in ê gín'á chìn-chêng lâi pài,
33:7 Le-ah kah i ê gín'á mā chìn-chêng lâi pài, lō͘-bóe Iô-sé-huh kah La̍h-khel mā chìn-chêng lâi pài.
33:8 E-sáu koh mn̄g, " Góa só͘ tú tio̍h kui kûn ê chengseⁿ, lí sī siáⁿ-mi̍h ì-sù? " Iâ-kop kóng, " Sī beh tī góa ê chú ê bīn-chêng tit tio̍h un-tián. "
33:9 E-sáu kóng, " Sió-tī, góa ê í-keng kàu-gia̍h, lí ê iû-goân kui lí. "
33:10 Iâ-kop kóng, " Mài ánne, góa nā tī lí ê bīn-chêng tit tio̍h un-tián, kiû lí tùi góa ê chhiú siu góa ê lé-mi̍h, in-ūi góa kìⁿ tio̍h lí ê bīn, chhin-chhiūⁿ kìⁿ tio̍h Siōng-tè ê bīn, koh lí mā chiap-la̍p góa.
33:11 Kiû lí siu góa tòa-lâi hō͘ lí ê lé-mi̍h, in-ūi Siōng-tè un-thāi góa, hō͘ góa chhiong-chiok. " Iâ-kop pek E-sáu, jiân-āu i chiū siu hiahê lé-mi̍h.
33:12 E-sáu kóng, " Lán chhut-hoat lâi-.khì, góa chò thâu-chêng kiâⁿ. "
33:13 Iâ-kop tùi i kóng, " Góa ê Chú chai chiahê gín'á nńg-chiáⁿ, gû-iûⁿ mā tú-á seⁿ, nā chò chi̍t ji̍t kóaⁿ, kui kûn lóng ē sí-.khì.
33:14 Kiû góa ê chú tī lô͘-po̍k ê thâu-chêng kiâⁿ, góa beh chiàu tī góa bīn-chêng kui kûn chengseⁿ ê khùi-la̍t, mā chiàu gín'á ê khùi-la̍t, bān-bān-á chìn-chêng, kiâⁿ kàu Se-il, kàu góa ê chú hia. "
33:15 E-sáu kóng, " Chhiáⁿ iông-ín góa kā tòe góa ê lâng lâu kúi-ê-á kah lí chò-tīn. " Iâ-kop kóng, " M̄-bián ánne! Tī góa ê chú ê bīn-chêng tit tio̍h un-tián to̍h hó. "
33:16 Hit ji̍t, E-sáu chhut-hoat, chiàu goân-lō͘ tńg-khì Se-il.
33:17 Iâ-kop kiâⁿ kàu Su-kot, tī hia ūi kakī khí chhù, ūi chengseⁿ tah chháu-liâu, só͘-í, kā hit só͘-chāi hō-chò Su-kot.
33:18 Iâ-kop tùi Pa-tàn-a-lâm tńg-.lâi ê sî, pêng-an lâi-kàu Ka-nân tē ê Sī-khiàm siâⁿ, tī siâⁿ ê thâu-chêng tah pò͘-pêⁿ.
33:19 I ēng chi̍t-pah tè gîn, tùi Sī-khiàm ê lāu-pē Ha-mo͘l ê kiáⁿ-sun, bé i tah pò͘-pêⁿ ê hit tè tē.
33:20 I koh tī hia khí chi̍t chō tôaⁿ, kā i hō-miâ kiò-chò El-e-ló-he I-su-la-el.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。