列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 米該亞先知警告亞哈
(代下18：2-27)
以色列kah亞南三年無交戰。
22:2 到第三年，偤大王約沙法落去以色列王hia。
22:3 以色列王對伊ê奴僕講：「Lín kám m̄知基列ê拉末是咱ê？咱竟然恬恬無tùi亞南王ê手搶tńg來？」
22:4 亞哈kā約沙法講：「你kám beh kah我去基列ê拉末交戰？」約沙法kā以色列王講：「我親像你ê，我ê人民親像你ê人民，我ê馬親像你ê馬。」
22:5 約沙法kā以色列王講：「請你今á日問上主ê意思。」
22:6 以色列王to̍h聚集先知差不多四百人，問in講：「我tio̍h去基列ê拉末來交戰，á是tio̍h ánne soah去？」In講：「Thang上去，因為主ē kā伊交tī王ê手。」
22:7 約沙法講：「Tī chia kám無上主ê先知，hō͘咱thang問伊？」
22:8 以色列王kā約沙法講：「Iáu有一个人，是音拉 ê kiáⁿ米該亞，咱thang對伊來問上主。總是，我怨恨伊，因為伊所預言我ê，lóng無好話，只有災禍niā-niā。」約沙法講：「請王m̄ thang ánne講。」
22:9 以色列王就召一个官員來，講：「你去叫音拉ê kiáⁿ米該亞趕緊來。」
22:10 以色列王kah偤大王約沙法，ta̍k个坐伊kakī ê座位，穿禮服，tī撒馬利亞城門口開闊ê所在，眾先知ta̍k个tī in ê面前預言。
22:11 基拿拿ê kiáⁿ西底家做鐵ê角，講：「上主ánne講：『你ē用chiahê角觸亞南人，直到in滅亡。』」
22:12 眾先知lóng ánne預言講：「Thang上去基列ê拉末，ē得勝，因為上主ē kā伊交tī王ê手。」
22:13 Hitê去叫米該亞ê使者，kā伊講：「你看，眾先知lóng講仝款ê話，對王講好事，求你所講ê mā kah in相仝，平平講好話。」
22:14 米該亞講：「我kí永遠活ê上主來講，上主對我講啥物，我ē照ánne講。」
22:15 米該亞來到王ê面前，王問伊講：「米該亞，阮thang上去基列ê拉末來交戰，á是tio̍h ánne soah去？」伊應講：「Thang 上去，ē得勝，上主ē kā伊交tī王ê手。」
22:16 王對伊講：「我tio̍h幾pái kah你chiùchōa？你託上主ê名，只有tio̍h用真實kā我講！」
22:17 米該亞講：「我看tio̍h以色列眾人四散tī山裡，親像無牧者ê羊。上主ánne講：『Chiahê無主人，in ta̍k个thang平安tńg去in ê家。』」
22:18 以色列王kā約沙法講：「我kám無kā你講？Chitê人所beh預言我ê，無講好話，只有災禍niā-niā。」
22:19 米該亞講：「所以，你tio̍h聽上主ê話；我看tio̍h上主坐tī寶座，天頂ê萬軍khiā tī祂ê左右。
22:20 上主講：『啥人ē引誘亞哈，hō͘伊上去基列ê拉末，死tī hia？』Chitê講ánne，hitê講ánne。
22:21 後來，有一个神明出來，khiā tī上主ê面前，講：「我beh引誘伊。」
22:22 上主問伊講：『你beh用啥物法度？』伊講：『我beh出去，tī伊眾先知ê嘴做白賊ê神明。』上主講：『你ē kā伊引誘，mā ē kā伊成，出去，做你去ánne做！』
22:23 Taⁿ上主用白賊ê神明入去tī你chiahê先知ê嘴。上主講tio̍h你ê時，講你有災禍à。」
22:24 基拿拿ê kiáⁿ西底家進前來，siàn米該亞ê嘴phóe，講：「上主ê靈tùi tó一條路離開我來kah你講？」
22:25 米該亞講：「你看，你入去bih tī kakī ê內房，hit日你to̍h ē看tio̍h。」
22:26 以色列王講：「Tio̍h chhōa米該亞去交hō͘城守亞捫kah王ê kiáⁿ約阿施，講：
22:27 「王ánne講：Kā chitê人關tī監裡，用苦ê餅kah苦ê水hō͘伊食，thèng候我平安tńg來。」
22:28 米該亞講：「你若真正平安tńg來，to̍h是上主無託我講。」伊koh講：「Chiahê人民，lín lóng tio̍h聽！」
22:29 亞哈ê死亡
(代下18：28-34)
以色列王kah偤大王約沙法去基列ê 拉末。
22:30 以色列王kā約沙法講：「我beh改妝上陣，你thang穿王服。」以色列王就改妝上陣。
22:31 亞南王有吩咐伊ê戰車ê官長三十二個，講：「無論大細m̄ thang kah in交戰，只有kah以色列王交戰。」
22:32 戰車ê官長看tio̍h約沙法，to̍h講：「這一定是以色列王！」to̍h oa̍t-tńg身beh kah伊交戰，約沙法就hoah咻。
22:33 戰車ê官長看tio̍h伊m̄是以色列王，to̍h oa̍t-tńg身，無去jiok。
22:34 有一个人偶然開弓射入去以色列王戰甲ê kap-chōa，王kā趕車ê講：「你oa̍t-tńg手，chhōa我出陣，因為我tio̍h重傷。」
22:35 Hit日，交戰ê勢面ná來ná猛烈，有人扶王tī車裡，抵擋亞南人。到日暗，王就死，血tùi tio̍h傷ê所在流到車底。
22:36 日beh落ê時，有號令遍傳tī軍營中，講：「Ta̍k人tńg去本城，ta̍k人tńg去本地。」
22:37 王死去，身屍hông帶到撒馬利亞，in kā王埋葬tī撒馬利亞。
22:38 有人tī撒馬利亞ê池邊洗伊ê車，狗來舐伊ê血，tú照上主所講ê話（娼妓mā tī hia洗身軀）。
22:39 亞哈其他ê tāichì，見若伊所行ê kah伊所起象牙ê厝，以及所起所有ê城，kám無記tī以色列chiahê王ê記錄？
22:40 亞哈kah伊ê祖先同睏。伊ê kiáⁿ亞哈謝續接伊做王。
22:41 偤大王約沙法
(代下20：31-21：1)
以色列王亞哈第四年，亞撒ê kiáⁿ約沙法坐位做偤大王。
22:42 約沙法坐位ê時，三十五歲，tī耶路撒冷做王二十五年。伊ê老母ê名叫做A-chu-bah，to̍h是Sil-hí ê chabó͘ kiáⁿ。
22:43 約沙法照ánne行伊ê老父亞撒hiahê路，無oa̍t-tńg離開它，行上主看做好ê tāichì；總是，山頭壇iáu未廢除，人民猶原tī山頭壇獻祭燒香。
22:44 約沙法kah以色列王立約和好。
22:45 約沙法其他ê tāichì，kah伊所顯出ê能力，kah伊án怎交戰，kám無lóng記tī偤大列王ê記錄？
22:46 伊ê老父亞撒ê時所留落來ê男性廟倡，約沙法tùi國內kā它除去。
22:47 Hit時，以東無王，有委員teh管理。
22:48 約沙法造他施ê船隻，beh去俄斐運金來；總是，無去，因為船tī以旬迦別phah破。
22:49 亞哈ê kiáⁿ亞哈謝kā約沙法講：「容允我ê奴僕kah你ê奴僕坐船做伙去。」總是，約沙法m̄肯。
22:50 約沙法 kah祖先同睏，kah伊ê祖先葬tī伊ê祖先大衛ê城；伊ê kiáⁿ約蘭續接伊做王。
22:51 以色列王亞哈謝
偤大王約沙法十七年，亞哈ê kiáⁿ亞哈謝tī撒馬利亞坐位，做以色列王，tī以色列做王經過兩年。
22:52 伊行上主看做pháiⁿ ê tāichì，照ánne行伊ê父ê路kah伊ê老母ê路，以及hō͘以色列犯罪ê尼八ê kiáⁿ耶羅波安ê路。
22:53 伊照in老父所行ê一切服事巴力來kā伊敬拜，激起上主—以色列上帝ê受氣。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。