創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
32:1 雅各準備kah以掃相會
雅各koh繼續行伊ê路，上帝ê使者tú tio̍h伊。
32:2 雅各看tio̍h in，to̍h講：「這是上帝ê軍隊。」所以，kā hit所在號名叫做瑪哈念。
32:3 雅各差人先去西珥ê地，以東ê田，見伊ê阿兄以掃。
32:4 伊kā in吩咐講：「Lín kā我ê主以掃講：『你ê奴僕雅各ánne講：我tī拉班hia寄腳，tòa到今á日。
32:5 我有牛、驢、羊群、奴僕、女婢，taⁿ差人來報我ê主，ài beh tī你ê面前得tio̍h恩典。』」
32:6 所差ê人tńg來雅各hia，講：「阮到你ê阿兄以掃hia，伊chitmá當teh來beh kā你迎接，koh有四百人kah伊做伙來。」
32:7 雅各大驚koh心悶，to̍h kā hiahê kah伊同在 ê人、羊群、牛群、駱駝，分做兩隊，
32:8 講：「以掃若來攻擊chit隊，chhun-ê hit隊iáu thang逃走。」
32:9 雅各koh講：「我ê祖先亞伯拉罕ê上帝，我ê父以撒ê上帝—上主ah，祢bat對我講：『Tò去你ê本地本族，我ē好款待你。』
32:10 祢對祢ê奴僕所施一切ê慈愛kah誠實，to̍h是siōng細ê我mā bē堪得得tio̍h；我前gia̍h我ê柺á，過chitê約旦河，taⁿ我已經成做兩隊。
32:11 求祢救我脫離我ê阿兄以掃ê手，因為我驚伊，恐驚伊來thâi死我kah我hiahê bó͘-kiáⁿ。
32:12 祢mā bat講：『我一定ē好款待你，hō͘你ê kiáⁿ孫親像海邊ê沙，chē到算bē了。』」
32:13 Hit暝，雅各歇tī hia，to̍h tī伊所有ê物ê內面，揀出禮物，beh送伊ê阿兄以掃：
32:14 山羊母兩百隻，山羊kang二十隻，綿羊母兩百隻，綿羊kang二十隻，
32:15 駱駝母kah食奶ê kiáⁿ三十隻，牛母四十隻，牛káng十隻，驢母二十隻，驢á-kiáⁿ十隻。
32:16 伊kā各種chengseⁿ另外一群一群分開，交帶奴僕管理，koh kā奴僕講：「Lín做我ê頭前去，tio̍h hō͘ ta̍k群之間有相離。」
32:17 伊koh吩咐做頭ê講：「我ê阿兄以掃tú tio̍h你ê時，若問你講：『你是啥人ê？你beh去tó位？你頭前hiahê chengseⁿ是啥人ê？』
32:18 你tio̍h講：『是你ê奴僕雅各ê，是beh送我ê主以掃ê禮物。伊chitmá本身mā tī阮ê後面。』」
32:19 雅各koh吩咐第二群、第三群kah所有趕kui群chengseⁿ ê人講：「Lín tú tio̍h以掃ê時，mā tio̍h照ánne kā伊講。
32:20 Lín mā tio̍h講：『你ê奴僕雅各tī阮ê後面。』」因為雅各kakī 想講：「我用tī我頭前去ê禮物來解伊ê恨，然後我見tio̍h伊ê面ê時，kiámchhái伊ē接納我。」
32:21 就ánne，禮物先行；hit暝，雅各歇tī帳房 中。
32:22 雅各tī 毗努伊勒相ián
雅各暗時起來，chhōa伊兩 个bó͘、兩 个女婢kah十一个kiáⁿ，lóng過雅博ê渡頭。
32:23 伊tāi先hō͘ in過溪，所有ê mā lóng hō͘ in過。
32:24 只有chhun雅各kakī tī hia。有一个人來kah伊相ián，一直到天phú光。
32:25 Hitê人看ián bē贏伊，就siàn雅各ê大腿臼；相ián ê時，雅各ê大腿臼choāiⁿ ·tio̍h。
32:26 Hitê人講：「天beh光à，tio̍h放我去。」雅各講：「祢若無kā我祝福，我m̄放祢去。」
32:27 Hitê人講：「你ê名叫做啥物？」伊講：「我叫做雅各。」
32:28 Hitê人講：「你ê名無beh koh叫做雅各，beh叫做以色列，因為你kah上帝á是kah人鬥輸贏，lóng得tio̍h khah贏。」
32:29 雅各問祂講：「請kā我講祢ê名。」Hitê人應講：「你án怎beh問我ê名？」然後，to̍h tī hia kā伊祝福。
32:30 雅各kā hit所在叫做毗努伊勒，因為伊講：「我當頭對面見tio̍h上帝，我ê性命iáu得tio̍h保全。」
32:31 日tú-á出，雅各經過毗努伊勒，伊ê大腿已經跛。
32:32 所以，到今á日，chiahê以色列人無食大腿頭ê筋，因為hitê人siàn雅各大腿臼ê筋。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。