列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 以利亞kah巴力ê眾先知
過真chē月日，tī第三年，上主ê話臨到以利亞講：「你去，hō͘亞哈看tio̍h你；我ē落雨tī地chiūⁿ。」
18:2 以利亞to̍h去，beh hō͘亞哈看tio̍h。Hit時，撒馬利亞飢荒真厲害。
18:3 亞哈to̍h叫伊ê管家俄巴底來。(俄巴底不止敬畏上主，
18:4 因為耶洗別滅上主chiahê先知ê時，俄巴底kā先知一百人藏（chhàng）tī洞內，五十人做一組，用餅kah水kā in養飼。)
18:5 亞哈kā俄巴底講：「你去遍行chitê地，去到所有ê水泉邊kah所有ê溪邊；kiámchhái咱ē得tio̍h青草，thang hō͘馬kah騾活落去，免得chengseⁿ全部失落。」
18:6 就ánne，in分開beh遍行全地。亞哈kakī 行一條路，俄巴底 mā kakī 行一條路。
18:7 俄巴底tī路裡，以利亞tú tio̍h伊，俄巴底認得伊，to̍h仆落去，講：「你kám是我ê主以利亞？」
18:8 伊應講：「是，你去kā你ê主講，以利亞tī chia。」
18:9 俄巴底講：「我有犯啥物罪？你竟然beh kā你ê奴僕交tī亞哈ê手，來害死我。
18:10 我kí永遠活ê上主—你ê上帝來講，無一族，無一國，我ê主無差人到hia chhōe你。In若講：伊無tī chia，to̍h叫hit國hit族ê人chiùchōa講in實在無tú tio̍h你。
18:11 Taⁿ你講，去kā你ê主講，以利亞tī chia；
18:12 我一下離開你，上主ê聖神ē chhōa你到我所m̄知ê所在。我去kā亞哈講，伊mā chhōe你bē tio̍h，就ē kā我thâi死。總是，你ê奴僕tùi少年to̍h是敬畏上主ê。
18:13 當耶洗別thâi上主眾先知ê時，我所做ê kám無人kā我ê主講？to̍h是我kā上主ê先知一百人藏tī洞裡，五十人做一組，用餅kah水kā in養飼。
18:14 Taⁿ你講，去kā你ê主講『以利亞tī chia』，伊一定ē kā我thâi死。」
18:15 以利亞講：「我kí永遠活ê萬軍ê上主，to̍h是我khiā tī祂ê面前ê，講：今á日我一定ēhō͘亞哈看tio̍h我。」
18:16 俄巴底to̍h去見亞哈，kā伊講，亞哈to̍h來見以利亞。
18:17 亞哈看tio̍h以利亞ê時，to̍h kā伊講：「你kám是陷害以色列ê？」
18:18 以利亞應講：「陷害以色列ê m̄是我，是你kah你ê老父ê家，因為lín棄sak上主ê誡命，去tòe hiahê巴力。
18:19 Taⁿ你tio̍h差人，聚集以色列人民kah巴力ê先知四百五十人，以及tī耶洗別ê桌lim食ê亞舍拉ê先知四百人，lóng去迦密山來到我chia。」
18:20 亞哈to̍h差人去以色列人民hia，招集chiahê先知來到迦密山。
18:21 以利亞來見眾人講：「Lín存兩樣心無決斷，ē到tang時？若上主是上帝，to̍h tio̍h遵thàn上主；若巴力是上帝，to̍h tio̍h遵thàn巴力。」人民無應kah一句話。
18:22 以利亞kā人民講：「上主ê先知kantaⁿ chhun我一个人；總是，巴力ê先知，有四百五十人。
18:23 Taⁿ tio̍h用兩隻牛káng-á hō͘阮，巴力ê先知thang為kakī 揀一隻牛á，切做kui塊，hē tī柴頂，下面m̄ thang lok火；我料理hit隻牛á，hē tī柴頂，下面mā無lok火。
18:24 Lín求叫lín ê神明ê名，我求叫上主ê名。Hitê用火顯應ê上帝to̍h是上主。」人民應講：「Chitê話講了真好。」
18:25 以利亞對巴力ê先知講：「Lín為kakī 揀一隻牛káng-á，tāi先kā牠料理，因為lín人額khah chē；lín求叫lín神明ê名，總是，m̄ thang lok火tī下面。」
18:26 Into̍h kā所hō͘ in ê牛káng-á牽去料理，然後tùi早起到日晝，求叫巴力ê名，講：「巴力ah，tio̍h聽阮！」總是，無聲說，mā無應答。In tī所起ê壇四箍圍tiô跳。
18:27 到中晝，以利亞khau洗in講：「大聲求叫à！因為伊是神明，伊kiámchhái恬恬teh想，á是退去偏僻ê所在，á是行路，á是teh睏，lín tio̍h kā伊叫醒。」
18:28 In大聲求叫，照in ê例，用刀、用鎗割kakī ，致使in ê身軀流血。
18:29 Tùi日過晝到獻ê-hng祭ê時，in teh講in ê先知話；總是，無聲說，無應答，mā無chhap in ê。
18:30 以利亞kā眾人講：「Lín來近óa我。」眾人to̍h去近óa伊，伊to̍hkoh修理倒壞ê上主ê壇。
18:31 以利亞the̍h十二塊石，照雅各ê kiáⁿ ê支族ê數額（chitê雅各to̍h是早前上主ê話bat臨到伊講：「以色列會做你ê名ê」）。
18:32 以利亞用chiahê石頭，奉上主ê名起一座壇，tī壇ê四箍圍開溝，會貯得種籽兩細亞。
18:33 伊koh排列柴，kā牛á切做kui塊，hē tī柴頂，講：「Lín用四個桶貯水滿滿，piàⁿ tī燒祭kah柴ê頂面。」
18:34 Koh講：「Piàⁿ第二pái。」In就piàⁿ第二pái；koh講：「Piàⁿ第三pái。」In就piàⁿ第三pái。
18:35 水流tī壇ê四箍圍，溝mā有水滿滿。
18:36 到獻ê-hng祭ê時，以利亞先知行óa來，講：「亞伯拉罕、以撒、以色列ê上帝—上主ah，求祢今á日hō͘人知祢tī以色列做上帝，mā知我是祢ê奴僕，koh是照祢ê話來行這一切ê tāichì。
18:37 上主ah，tio̍h聽我，tio̍h聽我！hō͘ chit國ê人民知祢—上主to̍h是上帝，祢hō͘ in ê心oa̍t倒tńg。」
18:38 上主ê火就降落，燒伊全部ê燒祭kah柴，kah石，kah土，koh kā溝內ê水燒乾去。
18:39 人民看tio̍h，to̍h仆tī土腳講：「上主，祂是上帝！上主，祂是上帝！」
18:40 以利亞kā in講：「掠巴力ê先知，無容允一个逃走。」Into̍h掠hiahê巴力ê先知。以利亞chhōa in落去到Ki-sūn溪邊，tī hia kā inthâi死。
18:41 炕旱結束
以利亞kā亞哈講：「你taⁿ thang上去lim食，因為有大雨ê聲。」
18:42 亞哈to̍h chiūⁿ去lim食。以利亞tńg去迦密山頂，屈身tī地裡，面仆tī兩 个腳頭u ê中間，
18:43 對伊ê奴僕講：「你去，ǹg海看。」奴僕to̍h chiūⁿ去看，講：「Lóng無啥物。」伊講：「你koh去，tio̍h去七pái。」
18:44 到第七pái，伊講：「看見若有雲tùi海裡起來，細細親像人ê手。」以利亞講：「你上去，kā亞哈講，tio̍h準備車落去，免得hō͘雨阻擋。」
18:45 無gōa久ê中間to̍h變天，因為風kah雲烏暗，落大雨。亞哈to̍h坐車去耶斯列。
18:46 上主ê手掛（khòa）tī以利亞ê身上，伊to̍h縖腰，tī亞哈ê頭前走去到耶斯列ê城門。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。