列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 E-li-iah kah Khòng-ōaⁿ
Tòa tī Gi-lia̍t ê Thi-si-bih lâng E-li-iah tùi A-hap kóng, " Góa kí éng-oán oa̍h ê Siōng-chú — I-su-la-el ê Siōng-tè, to̍h-sī góa khiā tī I ê bīn-chêng ê lâi kóng: Chit kúi nî, góa nā bô kóng, ē bô lō͘-chúi, bô hō͘. "
17:2 Siōng-chú ê ōe lîm-kàu E-li-iah kóng,
17:3 " Lí tio̍h lī-khui chia, oat tùi tang pêng khì, bih tī Iol-tàn hô ê tang pêng ê Ke-lit khe piⁿ.
17:4 Lí ē lim hit-ê khe ê chúi, Góa í-keng bēng-lēng o͘-a tī hia kā lí kiong-kip. "
17:5 E-li-iah chiū khì, chiàu Siōng-chú ê ōe lâi kiâⁿ, khì tòa tī Iol-tàn hô tang pêng ê Ke-lit khe.
17:6 Chá-khí sî, o͘-a kā i tòa piáⁿ kah bah lâi; ê-hng sî mā tòa piáⁿ kah bah lâi, i lim khe-.ni̍h ê chúi.
17:7 Āu-lâi, khe chúi ta-.khì, in-ūi hit-ê só͘-chāi bô hō͘-chúi.
17:8 E-li-iah kah Cha-le-phat ê Kóaⁿ-hū
Siōng-chú ê ōe lîm-kàu E-li-iah kóng,
17:9 " Lí khí-lâi khì-kàu Si-tòng ê Cha-le-phat, khì tòa tī hia. Lí khòaⁿ, Góa í-keng bēng-lēng hit só͘-chāi ê chi̍t-ê kóaⁿ-hū kā lí iúⁿ-chhī. "
17:10 I chiū khí-.lâi, khì Cha-le-phat. Lâi-kàu siâⁿ mn̂g ê sî, tú-hó ū chi̍t-ê kóaⁿ-hū tī hit só͘-chāi teh khioh chhâ. E-li-iah chiū kiò i kóng, " Kiû lí ēng khì-kū iúⁿ tām-po̍h-á chúi lâi hō͘ góa lim. "
17:11 I khì iúⁿ ê sî, E-li-iah koh kiò i kóng, " Chhiáⁿ lí sūn-chhiú the̍h tām-po̍h-á piáⁿ lâi hō͘ góa! "
17:12 Cha-bó͘ lâng kóng, " Góa kí éng-oán oa̍h ê Siōng-chú — lí ê Siōng-tè lâi kóng, góa bô chi̍t tè piáⁿ, chí ū chi̍t pé-á mī-hún tī tháng-.ni̍h kah tām-po̍h-á iû tī pân-.ni̍h ; lí khòaⁿ, góa khioh nn̄g ki chhâ, beh tńg-khì ūi góa kah góa ê kiáⁿ lâi kā i piak ; goán thang chia̍h-liáu chiah sí. "
17:13 E-li-iah kā i kóng, " Bián-kiaⁿ! Chò lí khì! Chiàu lí só͘ kóng ê lâi kiâⁿ. Chóng-.sī, tāi-seng kā góa chò chi̍t tè sè tè ê piáⁿ, tòa-lâi hō͘ góa, jiân-āu chiah ūi lí kah lí ê kiáⁿ khì piak.
17:14 In-ūi Siōng-chú — I-su-la-el ê Siōng-tè ánne kóng, ' Tháng lāi ê mī-hún bē kiám-chió, pân lāi ê iû ēng bē liáu, ti̍t-kàu Siōng-chú lo̍h hō͘ tī tē-chiūⁿ ê ji̍t. '"
17:15 Cha-bó͘ lâng chiū khì, chiàu E-li-iah ê ōe lâi kiâⁿ. Cha-bó͘ lâng kah i ê ke kah E-li-iah chò-hóe chia̍h chin chē ji̍t.
17:16 Tháng lāi ê mī-hún bô kiám-chió, pân lāi ê iû bô ēng liáu, tú chiàu Siōng-chú thok E-li-iah só͘ kóng ê ōe.
17:17 Chiahê tāichì liáu-āu, chit-ê chabó͘ lâng, to̍h-sī hit ke ê chú-lâng, i ê kiáⁿ phòa-pēⁿ, pēⁿ kah chin siong-tiōng, tì-sú i bô chi̍t-tiám-á khùi-si.
17:18 Cha-bó͘ lâng kā E-li-iah kóng, " Siōng-tè ê lô͘-po̍k, góa kah lí ū siáⁿ-mi̍h khan-liân? Lí lâi góa chia hō͘ Siōng-chú ē kì-tit góa ê chōe, hō͘ góa ê kiáⁿ sí-.khì. "
17:19 E-li-iah kā i kóng, " Kā lí ê kiáⁿ kau hō͘ góa. " E-li-iah chiū tùi chabó͘ lâng ê heng chêng kā i phō-.khì, chhōa lâi-kàu i só͘ tòa ê lâu, hē tī kakī ê chhn̂g téng,
17:20 Chiū kiû-kiò Siōng-chú kóng, " Siōng-chú — góa ê Siōng-tè ah, Lí kám koh beh kàng chai-hō tī góa só͘ kah i tòa ê kóaⁿ-hū, kā i ê kiáⁿ hāi-sí? "
17:21 E-li-iah chiū phak tī gín'á ê seng-khu saⁿ pái, kiû Siōng-chú kóng, " Siōng-chú — góa ê Siōng-tè ah, kiû Lí hō͘ chit-ê gín'á hôe-hûn! "
17:22 Siōng-chú thiaⁿ E-li-iah ê siaⁿ, gín'á ê hûn chiū hôe-ho̍k, i chiū oa̍h khí-.lâi.
17:23 E-li-iah chiū phō hit-ê gín'á tùi lâu-téng lo̍h-.lâi, ji̍p-khì chhù lāi kau hō͘ i ê lāu-bú. E-li-iah kóng, " Lí khòaⁿ, lí ê kiáⁿ oa̍h khí-.lâi à! "
17:24 Cha-bó͘ lâng tùi E-li-iah kóng, " Taⁿ góa chai lí sī Siōng-tè ê lô͘-po̍k, lí só͘ kóng ê Siōng-chú ê ōe lóng sī chin-si̍t ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。