列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15:1 偤大王亞比央
(代下13：1-14：1)
尼八ê kiáⁿ耶羅波安做王十八年了後，亞比央坐位做偤大王。
15:2 伊tī耶路撒冷做王三年，伊ê老母ê名叫做瑪迦，是押沙龍ê chabó͘ kiáⁿ。
15:3 亞比央照ánne行伊ê老父早前所行一切ê罪惡；伊ê心無親像伊ê祖先大衛ê心，專一ǹg上主—伊ê上帝。
15:4 總是，上主—伊ê上帝因為大衛ê緣故，hō͘伊tī耶路撒冷有一葩燈，hō͘伊ê kiáⁿ續接伊ê位，koh hō͘耶路撒冷堅固。
15:5 因為大衛除滅赫人烏利亞hit件tāichì以外，lóng是行上主所看做好ê，一生無違背上主所命令伊ê。
15:6 羅波安kah耶羅波安一生tiāⁿ-tiāⁿ 交戰。
15:7 亞比央其他ê tāichì，見若伊所行ê，kám無記tī偤大列王ê記錄？亞比央mā有kah耶羅波安交戰。
15:8 亞比央kah伊ê祖先同睏，人kā伊埋葬tī大衛ê城。伊ê kiáⁿ亞撒續接伊做王。
15:9 偤大王亞撒
(代下15：16-16：6)
以色列王耶羅波安坐位二十年，亞撒開始tī偤大做王。
15:10 伊tī耶路撒冷做王四十一年，伊ê阿媽名叫做瑪迦，是押沙龍ê chabó͘ kiáⁿ。
15:11 亞撒行上主所看做好ê，親像伊ê祖先大衛。
15:12 tùi國內除去男性廟倡，koh除去伊ê祖先所做ê所有偶像；
15:13 koh廢除伊ê阿媽—瑪迦太后ê位，因為她bat為亞舍拉妝可惡ê像。亞撒剉它ê像，tī汲淪溪邊kā它燒掉。
15:14 獨獨山頭壇伊無kā它廢棄，總是，亞撒一生用專一ê心歸ǹg上主。
15:15 伊kā伊ê老父所分別做聖，以及伊本身所分別做聖ê金、銀kah器具，lóng帶來到上主ê殿。
15:16 亞撒kah以色列王巴沙一生ê日tiāⁿ-tiāⁿ 交戰。
15:17 以色列王巴沙起來攻擊偤大，起拉瑪城，beh阻擋人tī偤大王亞撒hia出入。
15:18 亞撒to̍h kā上主聖殿ê金庫kah王宮ê金庫，所chhun落來ê金銀lóng交hō͘伊ê奴僕。亞撒王差in到tòa tī大馬士革ê亞南王Hi-sûn ê孫，Tha-pek-lī-bún ê kiáⁿ便哈達 hia，講：
15:19 「我kah你親像我ê老父kah你ê老父有約，taⁿ我用金銀做禮物送你，請你去廢除你kah以色列王巴沙所立ê約，hō͘伊離開我。」
15:20 便哈達就遵thàn亞撒王ê話，差伊hiahê軍長去攻擊以色列ê城；伊to̍h攻破以倫、但、亞伯伯瑪迦、基尼烈全地kah拿弗他利全地。
15:21 巴沙聽tioh8to̍h停工，無koh起拉瑪城；就tòa tī得撒。
15:22 就ánne，亞撒王出命令hō͘偤大群眾，無一个人ē推辭得；in to̍h搬徙巴沙所用來起拉瑪城ê石頭kah柴；亞撒王用chiahê石頭kah柴來起便雅憫ê迦巴kah米斯巴。
15:23 亞撒其他ê tāichì kah伊ê能力，以及伊一切ê所做kah伊所起ê城，kám無記tī偤大列王ê記錄？亞撒年老ê時，伊ê腳有破病。
15:24 亞撒kah伊ê祖先同睏，kah伊ê祖先葬tī伊ê祖先大衛ê城。伊ê kiáⁿ約沙法續接伊做王。
15:25 以色列王拿答
偤大王亞撒二年，耶羅波安ê kiáⁿ拿答開始tī以色列做王，伊tī以色列做王兩年。
15:26 拿答行上主所看做pháiⁿ ê tāichì，伊照ánne行伊ê老父ê路，koh犯tio̍h伊ê老父hō͘以色列人所犯ê罪。
15:27 以薩迦族亞希雅ê kiáⁿ巴沙背叛拿答。巴沙tī腓利士人ê Gip-be-thòng kā伊phah死。Hit時，拿答kah以色列人民圍困Gip-be-thòng。
15:28 偤大王亞撒三年，巴沙kā伊phah死來篡伊ê位。
15:29 伊一下做王就phah死耶羅波安全家；見若有喘氣ê，無kā耶羅波安留kah半個，所有ê lóng kā伊滅掉；這是照上主託祂ê奴僕示羅人亞希雅所講ê話。
15:30 這是因為耶羅波安所犯ê罪kah伊hō͘以色列人所犯ê罪，koh因為伊所激動上主—以色列ê上帝ê受氣。
15:31 拿答其他ê tāichì，見若伊所行ê，kám無lóng記tī以色列列王ê記錄？
15:32 亞撒kah以色列王巴沙一生tiāⁿ-tiāⁿ 交戰。
15:33 以色列王巴沙
偤大王亞撒三年，亞希雅ê kiáⁿ巴沙tī得撒坐位做以色列人民ê王，共二十四年。
15:34 伊行上主所看做pháiⁿ ê tāichì，行耶羅波安ê路kah伊hō͘以色列人所犯ê罪。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。