列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 耶羅波安ê Kiáⁿ ê死亡
Hit時，耶羅波安ê kiáⁿ亞比雅破病。
14:2 耶羅波安對伊ê bó͘講：「你起來改妝，hō͘人m̄知你是耶羅波安ê bó͘。然後去示羅，tī hia有亞希雅先知，關係我伊bat講，我ē做chiahê人民ê王。
14:3 Taⁿ你ê手tio̍h帶十塊麵包kah幾塊á薄餅，以及一矸蜜去見伊，伊ē kā你講咱ê kiáⁿē án怎。」
14:4 耶羅波安ê bó͘就照ánne去行，起身去示羅，來到亞希雅ê家。亞希雅因為年老，目chiu 柴柴看bē tio̍h。
14:5 上主kā亞希雅講：「你看，耶羅波安ê bó͘來beh為tio̍h伊ê kiáⁿ來問你，因為伊有破病。你tio̍h ánne ánne kā她講。耶羅波安ê bó͘入來ê時，會妝做別个 chabó͘人。」
14:6 她tú-á入門，亞希雅聽tio̍h她ê腳步聲，to̍h講：「耶羅波安ê bó͘，入來！你ná ē妝做別个 chabó͘人？我奉差遣來報你pháiⁿ消息。
14:7 你tńg去kā耶羅波安講：上主—以色列ê上帝ánne講：『我tùi人民中舉起你，設立你做我ê以色列人民ê君王，
14:8 tùi大衛家拆裂國，賞賜hō͘你。總是，你無親像我ê奴僕—大衛遵守我ê誡命，一心tòe我，專心行我看做正直ê tāichì。
14:9 你竟然行pháiⁿ，贏過一切tī你以前ê王。因為你為kakī 造別个神明，koh鑄偶像，激我ê受氣，kā我棄sak tī你ê尻脊後。
14:10 因為ánne，我ē hō͘災禍臨到耶羅波安ê家，我ē剪除屬耶羅波安ê chapo͘丁，無論受拘束ê á是自由ê，tī以色列mā beh全部除去耶羅波安ê家，親像人除去糞埽，到全部除了。
14:11 見若屬耶羅波安ê人，死tī城內ê，狗ē kā伊食；死tī田野ê，空中ê鳥ē kā伊食，因為上主已經講過à。』」
14:12 Taⁿ你起來tńg去你ê家，你ê腳一下踏入城，你ê kiaN2to̍h ē死。
14:13 以色列人民ē為伊啼哭，kā伊埋葬，因為屬耶羅波安ê人，只有伊得tio̍h入墓。因為tī耶羅波安ê厝內，只有伊ǹg上主—以色列ê上帝顯出好事。
14:14 上主ē為kakī 興起一个王，來管理以色列。Tī hit日，祂ē剪除耶羅波安ê家。Tī tang時？Chit時to̍h是。
14:15 因為上主ēphah以色列人，親像水中ê蘆葦teh搖，koh ētī祂所賞賜hō͘ in祖先ê好地拔出以色列ê根，hō͘ in tī大河hit-pêng四散，因為in造in ê 亞舍拉，激上主ê受氣。
14:16 因為耶羅波安ê罪，to̍h是伊本身所犯ê罪，koh hō͘以色列人犯罪，所以，上主ē棄sak以色列。」
14:17 耶羅波安ê bó͘出發，tńg去到得撒，tú-á到厝ê戶碇，她ê kiáⁿ就死。
14:18 以色列人民kā伊埋葬，為伊啼哭，照上主託祂ê奴僕亞希雅先知所講ê話。
14:19 耶羅波安死去
耶羅波安其他ê tāichì，伊án怎交戰，án怎做王，lóng寫tī以色列列王ê記錄。
14:20 耶羅波安做王，共二十二年，to̍h kah伊ê祖先做伙睏。伊ê kiáⁿ拿答續接伊做王。
14:21 偤大王羅波安
(代下11：5-12：15)
所羅門ê kiáⁿ羅波安tī偤大做王。羅波安坐位ê時，四十一歲，tī耶路撒冷，to̍h是上主tùi以色列眾支族中所揀來安置祂ê名ê城，做王十七年。伊ê老母ê名叫做拿瑪，是亞捫人。
14:22 偤大國行上主所看做pháiⁿ ê tāichì，伊所行ê罪激動祂痛恨，比in祖先所做ê koh khah pháiⁿ。
14:23 因為in tī ta̍k个高山，ta̍k欉青翠ê樹腳起壇，造柱像kah 亞舍拉。
14:24 國內mā有男性廟倡。In學hiahê上主tī以色列人ê面前所趕出ê列國，來行一切可惡ê tāichì。
14:25 羅波安王五年，埃及王示撒起來攻擊耶路撒冷，
14:26 搶上主聖殿ê寶物kah王宮ê寶物，lóng帶走去，koh搶所羅門所做hiahê金ê屏牌。
14:27 羅波安王做銅ê屏牌來代替，交hō͘顧守王宮門ê侍衛長來顧守。
14:28 王ta̍k pái入去上主ê殿，侍衛就帶chiahê屏牌去，然後koh帶倒tńg去，hē tī侍衛ê厝。
14:29 羅波安其他ê tāichì，見若伊所行ê，kám無記tī偤大列王ê記錄？
14:30 羅波安kah耶羅波安tiāⁿ-tiāⁿ 交戰。
14:31 羅波安kah伊ê祖先同睏，kah伊ê祖先葬tī大衛ê城。伊ê老母ê名叫做拿瑪，是亞捫人。羅波安ê kiáⁿ亞比央續接伊做王。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。