列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
13:1 Hit時，有一个上帝ê奴僕，遵thàn上主ê話，tùi偤大來到伯特利。耶羅波安tú-á khiā tī壇邊，beh燒香。
13:2 伊遵thàn上主ê話，攻擊hitê壇，大聲hoah：「壇，壇，上主ánne講：『你看，ē有一个kiáⁿ出世tī大衛ê家，名叫做約西亞，伊beh kā山頭壇ê祭司，to̍h是tī你ê頂面燒香ê，獻tī你ê頂面，mā ē kā人ê骨頭燒tī你ê頂面。』」
13:3 仝hit日，伊mā出一个兆頭，講：「你看，chitê壇會破裂，壇頂ê火灰會piàⁿ落去，chitê to̍h是上主所講ê兆頭。」
13:4 耶羅波安王聽tio̍h上帝ê奴僕攻擊伯特利ê壇所hoah ê話，伊to̍h對壇頂伸手，講：「Tio̍h kā伊掠起來！」伊所伸beh掠伊ê手就乾去，bē tàng koh kiu倒tńg去。
13:5 壇mā破裂，壇頂ê火灰mā piàⁿ落來，tú照上帝ê奴僕遵thàn上主ê話所講出ê兆頭。
13:6 王應上帝ê奴僕講：「請你求上主—你ê上帝ê恩，替我祈禱，hō͘我ê手復原。」就ánne，上帝ê奴僕對上主祈禱，王ê手就復原，照起頭ê款。
13:7 王kā上帝ê奴僕講：「請你kah我tńg去阮tau食點心，我mā beh送你物件。」
13:8 上帝ê奴僕kā王講：「你準若kā你王宮ê一半hō͘我，我mā m̄ kah你去，mā m̄ tī chit所在食餅lim水，
13:9 因為上主ê話ánne吩咐我講：『你m̄ thang食餅，m̄ thang lim水，mā m̄ thang tùi你ê原路tńg來。』」
13:10 伊to̍htui3別條路去，無tùi來伯特利ê時行ê hit條tńg去。
13:11 伯特利ê老先知
有一个老先知tòa tī伯特利，伊ê kiáⁿ來到位，用上帝ê奴僕當日tī伯特利所行ê kā伊講，koh kā伊對王所講一切ê話lóng kā老父講。
13:12 老父對in講：「伊tùi tó一條路去？」因為伊ê kiáⁿ有看tio̍h tùi偤大來ê上帝ê奴僕所去ê路。
13:13 伊to̍h吩咐伊ê kiáⁿ講：「Lín kā我準備驢。」In準備驢好勢，伊to̍h騎驢á，
13:14 去jiok上帝ê奴僕，tú tio̍h伊坐tī橡樹腳，to̍h問伊講：「你是tùi偤大來ê上帝ê奴僕á m̄是？」伊講：「我to̍h是。」
13:15 老先知to̍h kā伊講：「請你kah我來去阮tau食餅。」
13:16 上帝ê奴僕to̍h講：「我bē tàng kah你去，bē tàng入去你ê家，mā bē tàng tī chit所在kah你食餅lim水；
13:17 因為上主ê話ánne kā我講：『你tī hia m̄ thang食餅，m̄ thang lim水，mā m̄ thang tùi你去ê路tńg來。』」
13:18 老先知to̍h kā伊講：「我mā是先知，kah你相siâng。有天使用上主ê話kā我講：『你chhōa伊kah你tńg去你ê厝，hō͘伊食餅lim水。』」這lóng是老先知teh kā伊騙。
13:19 上帝ê奴僕to̍h kah老先知去，tī伊ê家食餅lim水。
13:20 兩人坐桌ê時，上主ê話臨到hitê chhōa伊tńg來ê先知。
13:21 伊to̍hhoah hitê tùi偤大來ê上帝ê奴僕講：「上主ánne講：『因為你違背上主ê話，無守上主—你ê上帝所命令你ê，
13:22 tī祂所吩咐你講：Tī hia m̄ thang食餅，m̄ thang lim水ê所在食餅lim水，所以，你ê身屍bē tàng入tī你祖先ê墓。』」
13:23 食餅lim水了後，伊to̍hka7伊所chhōa tńg來ê先知準備驢。
13:24 伊離開了後，tī路裡有tú tio̍h一隻獅kā伊咬死，身屍放tī路裡，驢á khiā tī伊ê身邊，獅mā khiā tī伊ê身屍邊。
13:25 有人tùi hia經過，看tio̍h身屍放tī路裡，獅mā khiā tī身屍ê邊á，to̍h來老先知所tòa ê城，講起chitê tāichì。
13:26 Hitê chhōa伊tùi路tńg來ê老先知聽tioh8to̍h講：「這是hitê上帝ê奴僕，伊違背上主ê話ê，所以，上主kā伊交hō͘獅，獅kā伊peh拆，kā伊咬死；是照上主對伊講ê話。」
13:27 伊to̍h吩咐伊ê kiáⁿ講：「Lín kā我準備驢。」In就準備。
13:28 伊去，看tio̍h伊ê身屍放tī路裡，驢á kah獅khiā tī身屍ê邊á；獅無食伊ê身屍，mā無peh拆驢á。
13:29 先知to̍h kā上帝ê奴僕ê身屍hē tī驢á ê頂面載tńg來，來到老先知ê城，beh為伊啼哭，來kā伊埋葬。
13:30 伊to̍hka7伊ê身屍葬tī kakī ê墓，人to̍h為伊啼哭，講：「Ai-ah，我ê阿兄！」
13:31 埋葬了後，伊to̍hka7伊ê kiáⁿ講：「我死了後，lín tio̍h kā我埋葬tī上帝ê奴僕所埋葬ê墓內，hō͘我ê骨頭óa tī伊ê骨頭，
13:32 因為伊用上主ê話大聲hoah，來攻擊伯特利ê壇，攻擊撒馬利亞chiahê城所有ê山頭廟，伊ê話一定ē應驗。」
13:33 耶羅波安致命ê罪
Chitê tāichì了後，耶羅波安猶原無離開伊ê pháiⁿ路，koh tùi眾人中設立山頭ê祭司，見若ài ·ê，就分別伊，hō͘伊做山頭ê祭司。
13:34 Chitê tāichì成做耶羅波安ê家ê罪，致使beh tùi地chiūⁿkā伊剪除，kā伊滅掉。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。