列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 所羅門棄sak上主
所羅門王tī法老ê chabó͘ kiáⁿ以外，koh疼真chē外邦ê chabó͘ gín-á，to̍h是摩押、亞捫、以東、西頓ê赫人ê chabó͘ gín-á。
11:2 關係chiahê列國，上主bat吩咐以色列人講：「Lín m̄ thang去in hia，in mā m̄ thang來lín chia，因為inē hō͘ lín ê心偏歪，去tòe in ê神明。」總是，所羅門戀愛hiahê chabó͘ gín-á，koh kah in結聯。
11:3 伊有后妃七百，lóng是貴族ê，koh有嬪妃三百。Chiahê女子誘惑伊ê心。
11:4 因為所羅門年老ê時，伊hiahê bó͘誘惑伊ê心，去tòe別个神明；伊ê心無完全ǹg上主—伊ê上帝，親像伊ê老父大衛ê心。
11:5 所羅門去tòe西頓人ê女神亞斯她錄，kah亞捫人可惡ê神明Bí-le̍k-kong。
11:6 所羅門行上主所看做pháiⁿ ê tāichì，無專心tòe上主，親像伊ê老父大衛。
11:7 Hit時，所羅門為tio̍h摩押可惡ê神明基抹kah亞捫人可惡ê神明摩洛，tī耶路撒冷頭前ê山起山頭壇。
11:8 Hiahê外邦ê bó͘ lóng燒香祭祀in ê神明，伊mā為tio̍h in照ánne做。
11:9 上主受氣所羅門，因為伊ê心離開上主—以色列ê上帝，to̍h是bat兩pái對伊出現ê。
11:10 關係chitê tāichì，上主mā bat命令伊，m̄ thang tòe別个神明，總是，伊無守上主所命令ê。
11:11 所以，上主對所羅門講：「因為你已經行chitê tāichì，無守我所命令你tio̍h守ê約kah我ê律例，我beh對你來拆裂你ê國，kā它賞賜hō͘你ê奴僕。
11:12 總是，因為你ê老父大衛ê緣故，我無beh tī你活leh ê日行chitê tāichì。我beh tùi你ê kiáⁿ ê手kā它拆裂。
11:13 總是，我無kā全國拆裂，會帶念tio̍h我ê奴僕—大衛kah我所揀ê耶路撒冷，留一支族hō͘你ê kiáⁿ。」
11:14 所羅門ê仇敵
上主興起一个對敵來攻擊所羅門，to̍h是以東人哈達；伊是以東王ê kiáⁿ孫。
11:15 早前大衛phah以東，伊ê軍長約押上去埋葬陣亡ê人ê時，kā以東ê chapo͘丁long2thâi死。
11:16 約押kah以色列人民tòa hia六月日，一直到kā以東ê chapo͘丁全部剪除。
11:17 Hit時，哈達iáu是細漢ê gín-á。哈達kah伊ê老父ê人臣中幾nā个以東人走去埃及。
11:18 In tùi米甸起來，來到巴蘭；tùi巴蘭chhōa幾nā个人kah in去埃及，來到埃及王法老hia。法老to̍h hō͘ in厝tòa，配定tio̍h ê米糧hō͘ in，koh hō͘ in田地。
11:19 哈達tī法老ê面前大大得tio̍h恩惠，法老koh kā伊ê bó͘ ê小妹，to̍h是王后答比匿ê小妹，hō͘伊做bó͘。
11:20 答比匿ê小妹kā伊生一个kiáⁿ，名叫做Ge-nu-bat。答比匿tī法老ê王宮kā伊斷奶。Ge-nu-bat kah法老ê眾kiáⁿ做伙tòa tī法老ê王宮。
11:21 哈達tī埃及聽tio̍h大衛kah伊ê祖先做伙睏，軍長約押 mā已經死。哈達to̍h對法老講：「請容允我去，hō͘我tńg去我ê本國。」
11:22 法老kā伊講：「你tī我chia有啥物欠缺，你竟然ài beh tńg去本國？」伊應講：「我無欠缺啥物，總是，請容允我tńg去。」
11:23 上主koh興起一个對敵攻擊所羅門，to̍h是E-li-a-tah ê kiáⁿ Le-chóng，伊是tùi伊ê主瑣巴王哈大底謝hia逃走來ê。
11:24 大衛thâi瑣巴人ê時，Le-chóng招集人來óa伊，做hit黨ê頭，走去大馬士革，tòa tī hia，koh tī大馬士革做王。
11:25 所羅門活leh ê時，除了哈達成做災害以外，Le-chóng mā做以色列ê對敵。伊怨恨以色列，mā成做亞南人ê王。
11:26 上主對耶羅波安ê應允
尼八ê kiáⁿ耶羅波安是以法連族，Che-le-tah人，伊是所羅門ê奴僕，mā起手來攻擊王。伊ê老母是寡婦，名叫做Che-lu-iah。
11:27 伊起手攻擊王ê緣故是照下底所記ê：所羅門起米羅城，修補伊ê老父大衛ê城ê破隙。
11:28 耶羅波安是大勇士，所羅門看tio̍h chitê少年人慇勤，to̍h派伊管理約瑟ê家一切ê工。
11:29 Hit時，耶羅波安tùi耶路撒冷出來，示羅人亞希雅先知tī路裡tú tio̍h伊；hit時伊有穿一領新衫。In兩人tī田裡，以外無別人。
11:30 亞希雅the̍h伊所穿ê新衫，拆做十二塊，
11:31 kā耶羅波安講：「你thang the̍h十塊，因為上主—以色列ê上帝ánne講：『你看，我beh tùi所羅門ê手拆裂伊ê國，kā十支族hō͘你。』
11:32 (獨獨因為我ê奴僕—大衛ê緣故，kah我tī以色列眾支族中所揀ê耶路撒冷ê緣故，伊iáu有一支族)
11:33 因為in棄sak我，去敬拜西頓人ê神明亞斯她錄，摩押ê神明基抹，kah亞捫人ê神明Mil-kham。In無行我ê道路，mā無做我看做正直ê tāichì，koh無守我ê律例kah法度，親像伊ê老父大衛ê所做。
11:34 總是，我無beh tùi伊ê手搶伊ê全國，是beh hō͘伊一世人做君王；這是因為我ê奴僕—大衛ê緣故，因為伊是我所揀選ê，伊有守我ê律例kah法度。
11:35 總是，我beh tùi伊ê kiáⁿ ê手搶伊ê國，kā十支族hō͘你，
11:36 kā一支族hō͘伊ê kiáⁿ，hō͘我ê奴僕—大衛tī我ê面前，tiāⁿ-tiāⁿ 有一葩燈tī耶路撒冷，to̍h是我所揀ê，thang tī hia安置我ê名ê城。
11:37 我beh取你，你ē做以色列ê王，照你ê心一切所ài ê來管理。
11:38 你若聽我一切所命令你ê，行我ê道路，做我看做正直ê tāichì，守我ê律例kah法度，親像我ê奴僕—大衛ê所做，我to̍h kah你同在，kā你建立堅固ê家，親像我kā大衛建立ê，koh beh kā以色列交hō͘你。
11:39 因為這我beh hō͘大衛ê kiáⁿ孫困苦，總是，無到永遠。』」
11:40 為tio̍h ánne，所羅門ài behthâi死耶羅波安。耶羅波安to̍h逃走去埃及，來到埃及王示撒hia，就tòa tī埃及，直到所羅門死去。
11:41 所羅門ê死亡
(代下9：29-31)
所羅門其他ê tāichì，見若伊所行ê kah伊ê智慧，kám無lóng記tī所羅門ê行傳？
11:42 所羅門tī耶路撒冷做以色列全國ê王，共四十年。
11:43 所羅門kah伊ê祖先做伙睏，埋葬tī伊ê老父大衛ê城。伊ê kiáⁿ羅波安續接伊做王。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。