列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Só͘-lô-móng ê Ông-kiong
Só͘-lô-móng khí kakī ê chhù, ēng cha̍p-saⁿ nî chhù chiah khí hó.
7:2 I koh khí Le-ba-nòng chhiū-nâ ê chhù, tn̂g chi̍t pah tiú, khoah gō͘ cha̍p tiú, koân saⁿ cha̍p tiú, ū pek-hiuⁿ chhâ ê thiāu sì chōa, thiāu téng ū pek-hiuⁿ chhâ ê êⁿ-á.
7:3 Téng-bīn ēng pek-hiuⁿ chhâ khàm, khàm tī sì-cha̍p-gō͘ ki thiāu téng ê êⁿ-á, múi chōa cha̍p-gō͘ ki thiāu.
7:4 Koh ū thang-mn̂g saⁿ chōa, thang kah thang sio-tùi, saⁿ chōa lóng sī ánne.
7:5 Chiahê mn̂g kah mn̂g-kheng sī ēng chhâ chò ê, lóng sī sù-hong; ū thang-mn̂g saⁿ chōa, thang kah thang sio-tùi; saⁿ chōa lóng sī ánne.
7:6 I koh khí ū thiāu ê mn̂g-lông, tn̂g gō͘-cha̍p tiú, khoah saⁿ-cha̍p tiú; tī in ê thâu-chêng koh ū mn̂g-lông, tī in ê thâu-chêng ū thiāu kah hō͘-tēng.
7:7 I koh khí-chō-ūi ê lông, to̍h-sī sím-phòaⁿ ê lông, thang tī hia sím-phòaⁿ; chit-ê lông tùi tē-pán kàu thian-lô-pán, lóng sī ēng pek-hiuⁿ chhâ khàm.
7:8 Só͘-lô-móng kakī só͘ beh tòa ê chhù, sī tī lông āu ê lēng-gōa chi̍t-ê īⁿ lāi, khí-chō ê hong-hoat sio-kāng. Só͘-lô-móng chhōa Hôa-láu ê chabó͘ kiáⁿ, mā kā i khí chi̍t keng chhù, khí-hoat kah chit-ê lông sio-kāng.
7:9 I khí chiahê lóng sī ēng pó-pòe ê chio̍h; chiàu chhùn-chhioh lâi phah hó ê chio̍h, lāi-gōa ēng kì-á kì hō͘ chê; tùi tē-ki kàu nî-chîⁿ, tùi gōa-bīn kàu tōa-īⁿ lóng sī ánne.
7:10 Tē-ki sī ēng siōng kùi koh hó ê chio̍h, sī tōa tè chio̍h, ū cha̍p tiú ê chio̍h, ū peh tiú ê chio̍h.
7:11 Téng-bīn ū siōng-téng ê chio̍h, sī chiàu chhùn-chhioh phah hó ê chio̍h, mā ū pek-hiuⁿ chhâ.
7:12 Tōa-īⁿ sì-kho͘-ûi ū phah hó ê chio̍h saⁿ ûn, pek-hiuⁿ chhâ chi̍t ûn só͘ khí-chō ê chhiûⁿ, lóng chhin-chhiūⁿ Siōng-chú ê tiān ê lāi-īⁿ kah tiān ê lông.
7:13 Hi-lâm ê Jīm-bū
Só͘-lô-móng ông chhe lâng tùi Tu-lô kā Hi-lâm tiàu lâi.
7:14 I sī Ná-hu-tha-lím chi-cho̍k tiong chi̍t-ê kóaⁿ-hū ê kiáⁿ, i ê lāu-pē sī Tu-lô lâng, sī phah-tâng sai-hū. Hi-lâm ū tì-hūi koh chhong-bêng, pún-sū móa-móa, gâu phah ta̍k hāng ê tâng-khì, i lâi Só͘-lô-móng hia, chò i só͘-ū ê kang.
7:15 Nn̄g Ki Tâng-thiāu
( LTH 3: 15-17)
Hi-lâm chè-chō nn̄g ki tâng-thiāu, múi ki koân cha̍p-peh tiú, thiāu ê sì-kho͘-ûi cha̍p-jī tiú.
7:16 I koh ēng tâng lâi chù nn̄g-ê thiāu-táu, hē tī thiāu téng; chit-ê thiāu-táu koân gō͘ tiú, hit-ê thiāu-táu mā koân gō͘ tiú.
7:17 Thiāu-téng ê thiāu-táu ū chhì chi̍t ba̍k chi̍t ba̍k ê bāng-á kah chi̍t khoân chi̍t khoân ê liān-á; chit-ê thiāu-táu ū chhit-ê liān-á, hit-ê thiāu-táu mā ū chhit-ê.
7:18 I tī bāng-á ê sì-kho͘-ûi chō sia̍h-liû nn̄g chōa, ēng lâi jia-khàm thiāu téng ê thiāu-táu; hit-ê thiāu-táu mā sī ánne.
7:19 Lông ê lāi-bīn ê thiāu téng ê thiāu-táu, ū khek pek-ha̍p hoe, koân sì tiú.
7:20 Nn̄g ki thiāu téng, kīn bāng-á piⁿ phòng-îⁿ ê só͘-chāi, ū thiāu-táu, koh ū sia̍h-liû nn̄g pah lia̍p tī tē-jī-ê thiāu-táu, ta̍k chōa kā i ûi-.leh.
7:21 I khiā nn̄g ki thiāu tī tiān ê mn̂g-lông, khiā tī chiàⁿ pêng ê thiāu miâ kiò-chò Iá-kin, khiā tī tò pêng ê miâ kiò-chò Bô-oh-chuh.
7:22 I tī thiāu téng khek pek-ha̍p hoe. Αń-ne chō thiāu ê kang chiū oân-sêng.
7:23 Tâng-hái
( LTH 4: 2-5)
Hi-lâm koh chù chi̍t-ê tâng-hái, khoán-sit sī îⁿ ê, koân gō͘ tiú, tùi chit pêng kàu hit pêng cha̍p tiú, sì-kho͘-ûi saⁿ-cha̍p tiú.
7:24 Tī i ê kîⁿ ê ē-bīn, ū pû-á ê khoán-sit ûi-.leh; múi tiú cha̍p lia̍p lâi ûi hit-ê tâng-hái. Pû-á ū nn̄g chōa, chù tâng-hái ê sî sūn-sòa chù ê.
7:25 Tâng-hái khòa tī cha̍p-jī chiah tâng-gû ê téng-bīn, saⁿ chiah ǹg pak, saⁿ chiah ǹg sai, saⁿ chiah ǹg lâm, saⁿ chiah ǹg tang; tâng-hái hē tī gû ê téng-bīn, gû bóe ǹg lāi-bīn.
7:26 Tâng-hái kāu chi̍t pa-chiúⁿ, i ê kîⁿ chhin-chhiūⁿ poe ê kîⁿ, koh chhin-chhiūⁿ pek-ha̍p hoe. I thang té nn̄g-chheng bat （ Chù, e̍k-thé iông-liōng tan-ūi, mā kiò-chò " E-hoat ", 44,000 kong-seng ）.
7:27 Tâng-chō
I ēng tâng chò cha̍p-ê chō, múi chō tn̂g sì tiú, khoah sì tiú, koân saⁿ tiú.
7:28 Ta̍k-ê chō ê khoán-sit sī ánne, sì pêng lóng ū keh-tó͘, i ê keh-tó͘ tī sì-ê kak ê só͘-chāi sio-chiap.
7:29 Tī i ê sì-kak sio-chiap ê só͘-chāi, í-ki̍p tī keh-tó͘ ê téng-bīn ū sai kah gû, í-ki̍p ki-lō͘-peng; tī sì-kak sio-chiap ê só͘-chāi ê téng-bīn ū sió-chō, sai kah gû ê ē-bīn ū sôe hoe-khoân ê chhiu.
7:30 Ta̍k-ê chō ū sì-ê tâng-lûn kah tâng ê te̍k-sim; phûn ê sì-kha kok ū kè, kè chù tī phûn ê ē-bīn, ta̍k-ê kè ê piⁿ-á ū hoe-khoân ê chhiu.
7:31 Phûn ê chhùi tī táu ê lāi-bīn ǹg téng-bīn, chhim chi̍t tiú; i ê chhùi sī îⁿ ê, chhin-chhiūⁿ sió-chō ê khoán-sit, chi̍t tiú pòaⁿ; tī i ê chhùi ū tiau-khek, i ê keh-tó͘ sī sì-kak-hêng ê, m̄-sī îⁿ ê.
7:32 Sì-ê lián tī keh-tó͘ ê ē-bīn, lián ê te̍k-sim kah chō sio-liân, ta̍k-ê lián koân chi̍t tiú pòaⁿ.
7:33 Lián ê khoán chhin-chhiūⁿ chhia-lián ê khoán; i ê te̍k-sim, i ê gōa-khoân, i ê chí （ Chù, chhia-lián hoâiⁿ-koaiⁿ ê bóe-liu ）, i ê lāi-khoân, lóng sī chù ê.
7:34 Chō ê sì-kak ū sì-ê kè, kè kah chō liân chò chi̍t-ê.
7:35 Chō ê téng-bīn ū îⁿ ê iân, koân pòaⁿ tiú; chō ê téng-bīn ū i ê thuh-á kah i ê keh-tó͘, lóng kah chō liân chò chi̍t-ê.
7:36 I ê thuh-á ê pán kah i ê keh-tó͘ ê téng-bīn, chiàu i ê khang-ūi, i khek ki-lō͘-peng kah sai, kah chó chhiū, sì-kho͘-ûi ū khek hoe-khoân.
7:37 I chiàu ánne chò cha̍p-ê tâng-chō, in ê chù-hoat, chhùn-chhioh kah khoán-sit lóng sio-kāng.
7:38 I koh chō tâng-phûn cha̍p-ê, múi phûn thang té sì-cha̍p bat. Ta̍k-ê phûn ê ti̍t-kèng sì tiú, cha̍p-ê tâng-chō ê téng-bīn, ta̍k-ê chō hē chi̍t-ê phûn.
7:39 Hiahê tâng-chō, gō͘-ê hē tī tiān ê chiàⁿ pêng, gō͘-ê hē tī tiān ê tò pêng, koh kā tâng-hái hē tī tiān ê chiàⁿ pêng, tiān ê tang-lâm kak ê só͘-chāi.
7:40 Sèng-tiān Khì-bu̍t Chóng-pió
( LTH 4: 11-5: 1)
Hi-lâm koh chò phûn, thuh-á kah pôaⁿ. Chiū ánne, Hi-lâm ūi tio̍h Só͘-lô-móng ông chò oân Siōng-chú ê tiān it-chhè ê kang.
7:41 I só͘ chò ê kang to̍h-sī: Nn̄g ki thiāu kah thiāu téng ê thiāu-táu ê nn̄g lia̍p kiû, í-ki̍p khàm tī thiāu téng thiāu-táu ê kiû ê nn̄g-ê bāng;
7:42 ūi nn̄g-ê bāng chò sì pah lia̍p sia̍h-liû; chi̍t-ê bāng ū nn̄g chōa ê sia̍h-liû, lâi ûi thiāu téng thiāu-táu ê nn̄g lia̍p kiû;
7:43 cha̍p-ê chō kah chō téng ê cha̍p-ê phûn;
7:44 tâng-hái chi̍t-ê kah tâng-hái ē-bīn ê cha̍p-jī chiah gû;
7:45 phûn, thuh-á kah pôaⁿ. Chiahê it-chhè lóng sī Hi-lâm ūi Só͘-lô-móng ông chò ê Siōng-chú ê tiān ê khì-kū, lóng sī ēng bôa-kng ê tâng lâi chò ê;
7:46 sī ông tī Iol-tàn hô ê pêng-goân, tī Su-kot kah Cha-le-thàn ê tiong-kan, tī liâm-thô͘ ê tē, ēng liâm-thô͘ ê bô͘-á chù-chiâⁿ ê.
7:47 Chiahê it-chhè ê khì-kū, Só͘-lô-móng lóng bô kòe chhìn, in-ūi hui-siông chē, tâng ê khin-tāng mā bē tàng chai.
7:48 Só͘-lô-móng mā chò Siōng-chú ê tiān lāi it-chhè ê khì-kū, to̍h-sī kim-tôaⁿ kah pâi-lia̍t piáⁿ ê toh, sī ēng kim chò ê;
7:49 āu-tiān ê thâu-chêng ê teng-tâi, chiàⁿ pêng gō͘-ê, tò pêng gō͘-ê, lóng sī ēng sûn-kim chò ê; i ê hoe, i ê teng, i ê khîⁿ, sī ēng kim chò ê;
7:50 i ê poe, i ê chián-to, i ê óaⁿ, i ê sî, i ê hóe-tiáⁿ, sī ēng sûn-kim chò ê; koh ū mn̂g-khū, to̍h-sī āu-tiān chì-sèng-só͘ kah chêng-tiān ê mn̂g-khū, lóng sī ēng kim chò ê.
7:51 Án-ne, Só͘-lô-móng ông chò oân Siōng-chú ê tiān it-chhè ê kang. Só͘-lô-móng kā i ê lāu-pē Ta-bi̍t só͘ hiàn ê mi̍h tòa ji̍p-.khì, kā gîn, kim kah khì-kū, hē tī Siōng-chú ê tiān ê khò͘-pâng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。