列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 所羅門ê王宮
所羅門起kakī ê厝，用十三年厝chiah起好。
7:2 伊koh起黎巴嫩樹林ê厝，長一百肘，闊五十肘，高三十肘，有柏香柴ê柱四chōa，柱頂有柏香柴ê楹á。
7:3 頂面用柏香柴蓋，蓋tī四十五支柱頂ê楹á，每chōa十五支柱。
7:4 Koh有窗門三chōa，窗kah窗相對，三chōa lóng是ánne。
7:5 Chiahê門kah門框是用柴做ê，lóng是四方；有窗門三chōa，窗kah窗相對；三chōa lóng是ánne。
7:6 伊koh起有柱ê門廊，長五十肘，闊三十肘；tī in ê頭前koh有門廊，tī in ê頭前有柱kah戶碇。
7:7 伊koh起座位ê廊，to̍h是審判ê廊，thang tī hia審判；chitê廊tùi地板到天羅板，lóng是用柏香柴蓋。
7:8 所羅門kakī 所beh tòa ê厝，是tī廊後ê另外一个院內，起造ê方法相仝。所羅門娶法老ê chabó͘ kiáⁿ，mā kā她起一間厝，起法kah chitê廊相仝。
7:9 伊起chiahê lóng是用寶貝ê石；照寸尺來phah好ê石，內外用鋸á鋸hō͘齊；tùi地基到簾簷，tùi外面到大院lóng是ánne。
7:10 地基是用siōng貴koh好ê石，是大塊石，有十肘ê石，有八肘ê石。
7:11 頂面有上等ê石，是照寸尺phah好ê石，mā有柏香柴。
7:12 大院四箍圍有phah好ê石三勻，柏香柴一勻所起造ê牆，lóng親像上主ê殿ê內院kah殿ê廊。
7:13 希南ê任務
所羅門王差人tùi推羅kā希南召來。
7:14 伊是拿弗他利支族中一个寡婦ê kiáⁿ，伊ê老父是推羅人，是phah銅師傅。希南有智慧koh聰明，本事滿滿，gâu phah ta̍k項ê銅器，伊來所羅門hia，做伊所有ê工。
7:15 兩支銅柱
(代下3：15-17)
希南製造兩支銅柱，每支高十八肘，柱ê四箍圍十二肘。
7:16 伊koh用銅來鑄兩 个柱斗，hē tī柱頂；chitê柱斗高五肘，hitê柱斗mā高五肘。
7:17 柱頂ê柱斗有刺一目一目ê網á kah一環一環ê鍊á；chitê柱斗有七个鍊á，hitê柱斗mā有七个。
7:18 伊tī網á ê四箍圍造石榴兩chōa，用來遮蓋柱頂ê柱斗；hitê柱斗mā是ánne。
7:19 廊ê內面ê柱頂ê柱斗，有刻百合花，koân四肘。
7:20 兩支柱頂，近網á邊膨圓ê所在，有柱斗，koh有石榴兩百粒tī第二个柱斗，ta̍k chōa kā它圍teh。
7:21 伊khiā兩支柱tī殿ê門廊，khiā tī正pêng ê柱名叫做雅斤，khiā tī倒pêng ê名叫做波阿斯。
7:22 伊tī柱頂刻百合花。Αń-ne造柱ê工就完成。
7:23 銅海
(代下4：2-5)
希南koh鑄一个銅海，款式是圓ê，高五肘，tùi chit pêng到hit-pêng十肘，四箍圍三十肘。
7:24 Tī它ê墘ê下面，有瓠á ê款式圍teh；每肘十粒來圍hitê銅海。瓠á有兩chōa，鑄銅海ê時順續鑄ê。
7:25 銅海掛（khòa）tī十二隻銅牛ê頂面，三隻ǹg北，三隻ǹg西，三隻ǹg南，三隻ǹg東；銅海hē tī牛ê頂面，牛尾ǹg內面。
7:26 銅海厚一巴掌，它ê墘親像杯ê墘，koh親像百合花。它thang貯二千罷特（註：液體容量單位，mā叫做「伊法」，44,000公升）。
7:27 銅座
伊用銅做十個座，每座長四肘，闊四肘，高 三肘。
7:28 Ta̍k個座ê款式是ánne：四pêng lóng有隔堵，它ê隔堵tī四個角ê所在相接。
7:29 Tī它ê四角相接ê所在，以及tī隔堵ê頂面有獅kah牛，以及ki-lō͘-peng；tī四角相接ê所在ê頂面有小座，獅kah牛ê下面有垂花環ê鬚。
7:30 Ta̍k個座有四個銅輪kah銅ê軸心；盆ê四腳各有架，架鑄tī盆ê下面，ta̍k个架ê邊á有花環ê鬚。
7:31 盆ê嘴tī斗ê內面ǹg頂面，深一肘；它ê嘴是圓ê，親像小座ê款式，一肘半；tī它ê嘴有雕刻，它ê隔堵是四角形ê，m̄是圓ê。
7:32 四個輪tī隔堵ê下面，輪ê軸心kah座相連，ta̍k个輪高一肘半。
7:33 輪ê款親像車輪ê款；它ê軸心，它ê外環，它ê軹（註：車輪橫杆ê尾溜），它ê內環，lóng是鑄ê。
7:34 座ê四角有四個架，架kah座連做一个。
7:35 座ê頂面有圓ê緣，高半肘；座ê頂面有它ê托á kah它ê隔堵，lóng kah座連做一个。
7:36 它ê托á ê板kah它ê隔堵ê頂面，照它ê空位，伊刻ki-lō͘-peng kah獅，kah棗樹，四箍圍有刻花環。
7:37 伊照ánne做十個銅座，in ê鑄法、寸尺kah款式lóng相仝。
7:38 伊koh造銅盆十個，每盆thang貯四十罷特。Ta̍k個盆ê直徑四肘，十個銅座ê頂面，ta̍k个座hē一个盆。
7:39 Hiahê銅座，五個hē tī殿ê正pêng，五個hē tī殿ê倒pêng，koh kā銅海hē tī殿ê正pêng，殿ê東南角ê所在。
7:40 聖殿器物總表
(代下4：11-5：1)
希南koh做盆、托á kah盤。就ánne，希南為tio̍h所羅門王做完上主ê殿一切ê工。
7:41 伊所做ê工to̍h是：兩支柱kah柱頂ê柱斗ê兩粒球，以及蓋tī柱頂柱斗ê球ê兩 个網；
7:42 為兩 个網做四百粒石榴；一个網有兩chōa ê石榴，來圍柱頂柱斗ê兩粒球；
7:43 十個座kah座頂ê十個盆；
7:44 銅海一个，kah銅海下面ê十二隻牛；
7:45 盆、托á kah盤。Chiahê一切lóng是希南為所羅門王做ê上主ê殿ê器具，lóng是用磨光ê銅來做ê；
7:46 是王tī約旦河ê平原，tī疏割kah撒拉但ê中間，tī黏土ê地，用黏土ê模á鑄成ê。
7:47 Chiahê一切ê器具，所羅門lóng無過秤，因為非常chē，銅ê輕重mā bē tàng知。
7:48 所羅門mā做上主ê殿內一切ê器具，to̍h是金壇kah排列餅ê桌，是用金做ê；
7:49 後殿ê頭前ê燈台，正pêng五個，倒pêng五個，lóng是用純金做ê；它ê花、它ê燈、它ê鉗，是用金做ê；
7:50 它ê杯、它ê剪刀、它ê碗、它ê匙、它ê火鼎，是用純金做ê；koh有門臼，to̍h是後殿至聖所kah前殿ê門臼，lóng是用金做ê。
7:51 Án-ne，所羅門王做完上主ê殿一切ê工。所羅門kā伊ê老父大衛所獻ê物帶入去，kā銀、金kah器具，hē tī上主ê殿ê庫房。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。