列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 所羅門祈求智慧
(代下1：3-12)
所羅門kah埃及王法老結親，娶法老ê chabó͘ kiáⁿ做bó͘，chhōa她入大衛城，thèng候伊起kakī ê厝kah上主ê殿，以及耶路撒冷四箍圍ê城牆完工。
3:2 當時iáu未有為上主ê名起殿，所以，人民猶原tī山頭壇獻祭。
3:3 所羅門疼上主，照ánne行伊ê老父大衛ê律法，獨獨tī山頭壇獻祭燒香。
3:4 王去基遍獻祭，因為tī hia有極大ê山頭壇，所羅門tī壇頂獻燒祭ê chengseⁿ一千隻。
3:5 Tī基遍，暗時tī夢中，上主對所羅門出現，上主講：「你ài我賞賜hō͘你啥物？你thang對我求。」
3:6 所羅門講：「祢bat施大恩hō͘祢ê奴僕—我ê老父大衛，照伊用誠實、公義、正直ê心，kah祢同在，行tī祢ê面前。祢mā kā伊留chitê大恩典，to̍h是賞賜伊一个kiáⁿ來坐伊ê位，親像今á日ánne。
3:7 上主—我ê上帝ah，taⁿ祢hō͘祢ê奴僕續接我ê老父大衛做王；總是，我是gín-á，m̄知tio̍h án怎出入。
3:8 祢ê奴僕tiàm tī祢所揀ê人民中間，chiahê人民chē到算bē了。
3:9 求祢賞賜祢ê奴僕智慧ê心，thang判斷祢ê子民，來分別好pháiⁿ，因為啥人ē tàng判斷祢chiah chē ê人民？」
3:10 因為所羅門求這，主歡喜伊ê話。
3:11 上主對伊講：「你既然求這，無為kakī 求歲壽，無為kakī 求好額，mā無求滅亡你ê對敵ê性命，kantaⁿ為kakī 求智慧thang分別審判ê道理，
3:12 你看，我beh照你ê話來做，我beh賞賜hō͘你聰明智慧ê心，致到以前無人親像你，以後mā無有人親像你。
3:13 你所無求ê，to̍h是好額kah尊貴，我mā ē hō͘你，hō͘你tī世間ê日子，列王無一个ē tàng kah你比得。
3:14 你若行我ê道路，守我ê律例kah我ê誡命，學你ê老父大衛所行ê，我to̍h ēhō͘你長歲壽。」
3:15 所羅門睏醒，知影是眠夢。to̍h去耶路撒冷khiā tī上主ê約櫃前，獻燒祭kah謝恩祭，koh為tio̍h伊hiahê人臣排設宴席。
3:16 所羅門判斷疑難案件
有一日，兩 个妓女來王hia，khiā tī王ê面前。
3:17 一个chabó͘人講：「我ê主，我kah chitê chabó͘人做伙tòa一間厝，我tī厝內生一个kiáⁿ。
3:18 我生kiáⁿ了後第三日，chitê chabó͘人mā生gín-á，阮做伙tòa，除阮兩人以外，厝內無別人kah阮做伙。
3:19 暗時，chitê chabó͘人ê kiáⁿ死去，因為她睏ê時teh tio̍h伊。
3:20 她半暝起來，趁你ê女婢teh睏，tùi我ê身邊kā我ê gín-á抱去，hē tī她ê胸前，kā她ê死gín-á hē tī我ê胸前。
3:21 天beh光ê時，我起來beh hō͘我ê gín-á食奶，無想講，gín-á已經死去；到天光，我詳細看，伊m̄是我所生ê kiáⁿ。」
3:22 Hitê chabó͘人講：「M̄是！活ê是我ê kiáⁿ，死ê是你ê kiáⁿ。Chitê chabó͘人講：「M̄是！死ê是你ê kiáⁿ，活ê是我ê kiáⁿ。」In tī王ê面前ánne相諍。
3:23 王講：「Chitê chabó͘人講：『活ê kiáⁿ是我ê，死ê kiáⁿ是你ê。』Hitê chabó͘人講：『M̄是！死ê kiáⁿ是你ê，活ê kiáⁿ是我ê。』」
3:24 王to̍h講：「Kā我gia̍h刀來！」In就gia̍h刀來到王ê面前。
3:25 王koh講：「Kā活ê gín-á破做兩pêng，一pêng hō͘ hitê，一pêng hō͘ chitê。」
3:26 活ê gín-á ê老母為tio̍h kakī ê kiáⁿ，心親像火teh-to̍h，to̍h對王講：「我ê主，kā活ê kiáⁿ hō͘ hitê chabó͘人，千萬m̄ thang hō͘伊死！」Hitê chabó͘人講：「Chitê gín-á m̄ thang歸你，mā m̄ thang歸我。Kā伊破，thang照ánne做！」
3:27 王應講：「Kā活ê gín-á hō͘ chitê chabó͘人，千萬m̄ thang kā伊thâi，因為她實在是伊ê老母。」
3:28 以色列人民聽tio̍h王所判斷ê案，to̍h lóng敬畏伊，因為in有看tio̍h伊ê心內有上主ê智慧來teh判斷。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。