列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Só͘-lô-móng Kî-kiû Tì-hūi
( LTH 1: 3-12)
Só͘-lô-móng kah Ai-gi̍p ông Hôa-láu kiat-chhin, chhōa Hôa-láu ê chabó͘ kiáⁿ chò bó͘, chhōa i ji̍p Ta-bi̍t siâⁿ, thèng-hāu i khí kakī ê chhù kah Siōng-chú ê tiān, í-ki̍p Ê-lú-sa-lèm sì-kho͘-ûi ê siâⁿ chhiûⁿ oân-kang.
3:2 Tong-sî iáu-bōe ū ūi Siōng-chú ê miâ khí tiān, só͘-í, jîn-bîn iû-goân tī soaⁿ-thâu tôaⁿ hiàn chè.
3:3 Só͘-lô-móng thiàⁿ Siōng-chú, chiàu ánne kiâⁿ i ê lāu-pē Ta-bi̍t ê lu̍t-hoat, to̍k-to̍k tī soaⁿ-thâu tôaⁿ hiàn chè sio hiuⁿ.
3:4 Ông khì Gi-bóng hiàn chè, in-ūi tī hia ū ke̍k tōa ê soaⁿ-thâu tôaⁿ, Só͘-lô-móng tī tôaⁿ téng hiàn sio-chè ê chengseⁿ chi̍t-chheng chiah.
3:5 Tī Gi-bóng, àm-sî tī bāng tiong, Siōng-chú tùi Só͘-lô-móng chhut-hiān, Siōng-chú kóng, " Lí ài Góa siúⁿ-sù hō͘ lí siáⁿ-mi̍h? Lí thang tùi Góa kiû. "
3:6 Só͘-lô-móng kóng, " Lí bat si tōa-un hō͘ Lí ê lô͘-po̍k — góa ê lāu-pē Ta-bi̍t, chiàu i ēng sêng-si̍t, kong-gī, chèng-ti̍t ê sim kah Lí tông-chāi, kiâⁿ tī Lí ê bīn-chêng. Lí mā kā i lâu chit-ê tōa un-tián, to̍h-sī siúⁿ-sù i chi̍t-ê kiáⁿ lâi chē i ê ūi, chhin-chhiūⁿ kin-á-ji̍t ánne.
3:7 Siōng-chú — góa ê Siōng-tè ah, taⁿ Lí hō͘ Lí ê lô͘-po̍k sòa-chiap góa ê lāu-pē Ta-bi̍t chò ông; chóng-.sī, góa sī gín'á, m̄-chai tio̍h án-chóaⁿ chhut-ji̍p.
3:8 Lí ê lô͘-po̍k tiàm tī Lí só͘ kéng ê jîn-bîn tiong-kan, chiahê jîn-bîn chē kàu sǹg bē liáu.
3:9 Kiû Lí siúⁿ-sù Lí ê lô͘-po̍k tì-hūi ê sim, thang phòaⁿ-toàn Lí ê chú-bîn, lâi hun-pia̍t hó-pháiⁿ, in-ūi siáⁿ lâng ē-tàng phòaⁿ-toàn Lí chiah chē ê jîn-bîn? "
3:10 In-ūi Só͘-lô-móng kiû che, Chú hoaⁿ-hí i ê ōe.
3:11 Siōng-chú tùi i kóng, " Lí kì-jiân kiû che, bô ūi kakī kiû hòe-siū, bô ūi kakī kiû hó-gia̍h, mā bô kiû bia̍t-bông lí ê tùi-te̍k ê sèⁿ-miā, kantaⁿ ūi kakī kiû tì-hūi thang hun-pia̍t sím-phòaⁿ ê tō-lí,
3:12 lí khòaⁿ, Góa beh chiàu lí ê ōe lâi chò, Góa beh siúⁿ-sù hō͘ lí chhong-bêng tì-hūi ê sim, tì-kàu í-chêng bô lâng chhin-chhiūⁿ lí, í-āu mā bô ū lâng chhin-chhiūⁿ lí.
3:13 Lí só͘ bô kiû ê, to̍h-sī hó-gia̍h kah chun-kùi, góa mā ē hō͘ lí, hō͘ lí tī sè-kan ê ji̍t-chí, lia̍t ông bô chi̍t-ê ē-tàng kah lí pí-tit.
3:14 Lí nā kiâⁿ Góa ê tō-lō͘, siú Góa ê lu̍t-lē kah Góa ê kài-bēng, o̍h lí ê lāu-pē Ta-bi̍t só͘ kiâⁿ ê, Góa chiū ē hō͘ lí tn̂g hòe-siū. "
3:15 Só͘-lô-móng khùn-chhéⁿ, chai-iáⁿ sī bîn-bāng. Chiū khì Ê-lú-sa-lèm khiā tī Siōng-chú ê iok-kūi chêng, hiàn sio-chè kah siā-un-chè, koh ūi tio̍h i hiahê jîn-sîn pâi-siat iàn-se̍k.
3:16 Só͘-lô-móng Phòaⁿ-toàn Gî-lân Àn-kiāⁿ
Ū chi̍t ji̍t, nn̄g-ê ki-lí lâi ông hia, khiā tī ông ê bīn-chêng.
3:17 Chi̍t-ê chabó͘ lâng kóng, " Góa ê chú, góa kah chit-ê chabó͘ lâng chò-hóe tòa chi̍t keng chhù, góa tī chhù lāi seⁿ chi̍t-ê kiáⁿ.
3:18 Góa seⁿ kiáⁿ liáu-āu tē-saⁿ ji̍t, chit-ê chabó͘ lâng mā seⁿ gín'á, goán chò-hóe tòa, tû goán nn̄g lâng í-gōa, chhù lāi bô pa̍t lâng kah goán chò-hóe.
3:19 Àm-sî, chit-ê chabó͘ lâng ê kiáⁿ sí-.khì, in-ūi i khùn ê sî teh tio̍h i.
3:20 I pòaⁿ-mê khí-.lâi, thàn lí ê lú-pī teh khùn, tùi góa ê sin piⁿ kā góa ê gín'á phō-.khì, hē tī i ê heng chêng, kā i ê sí gín'á hē tī góa ê heng chêng.
3:21 Thiⁿ beh kng ê sî, góa khí-lâi beh hō͘ góa ê gín'á chia̍h leng, bô siūⁿ kóng, gín'á í-keng sí-.khì; kàu thiⁿ-kng, góa siông-sè khòaⁿ, i m̄-sī góa só͘ seⁿ ê kiáⁿ. "
3:22 Hitê chabó͘ lâng kóng, " M̄-sī! Oa̍h ê sī góa ê kiáⁿ, sí ê sī lí ê kiáⁿ. Chit-ê chabó͘ lâng kóng, " M̄ sī! Sí ê sī lí ê kiáⁿ, oa̍h ê sī góa ê kiáⁿ. " In tī ông ê bīn-chêng ánne sio-chèⁿ.
3:23 Ông kóng, " Chit-ê chabó͘ lâng kóng, ' Oa̍h ê kiáⁿ sī góa ê, sí ê kiáⁿ sī lí ê. ' Hitê chabó͘ lâng kóng, ' M̄ sī! Sí ê kiáⁿ sī lí ê, oa̍h ê kiáⁿ sī góa ê. '"
3:24 Ông chiū kóng, " Kā góa gia̍h to lâi! " In chiū gia̍h to lâi-kàu ông ê bīn-chêng.
3:25 Ông koh kóng, " Kā oa̍h ê gín'á phòa-chò nn̄g pêng, chi̍t-pêng hō͘ hit-ê, chi̍t-pêng hō͘ chit-ê. "
3:26 Oa̍h ê gín'á ê lāu-bú ūi tio̍h kakī ê kiáⁿ, sim chhin-chhiūⁿ hóe teh-to̍h, chiū tùi ông kóng, " Góa ê chú, kā oa̍h ê kiáⁿ hō͘ hit-ê chabó͘ lâng, chhian-bān m̄ thang hō͘ i sí! " Hitê chabó͘ lâng kóng, " Chit-ê gín'á m̄ thang kui lí, mā m̄ thang kui góa. Kā i phòa, thang chiàu ánne chò! "
3:27 Ông ìn kóng, " Kā oa̍h ê gín'á hō͘ chit-ê chabó͘ lâng, chhian-bān m̄ thang kā i thâi, in-ūi i si̍t-chāi sī i ê lāu-bú. "
3:28 I-su-la-el jîn-bîn thiaⁿ tio̍h ông só͘ phòaⁿ-toàn ê àn, chiū lóng kèng-ùi i, in-ūi in ū khòaⁿ tio̍h i ê sim-lāi ū Siōng-chú ê tì-hūi lâi teh phòaⁿ-toàn.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。