列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 大衛王ê晚年
大衛王歲chē年老，雖然kā伊kah被，猶原bē燒。
1:2 伊hiahê奴僕to̍h kā伊講：「Tio̍h kā我ê主—我ê王chhōe一个在室女，hō͘她khiā tī王ê面前來kā你事奉，koh睏tī你ê胸前，thang hō͘我ê主—我ê王得tio̍h燒。」
1:3 Into̍h tī以色列ê四箍圍chhōe súi ê chabó͘ gín-á，chhōe tio̍h書念一个女子，名亞比煞，to̍h chhōa她來到王hia。
1:4 Chitê chabó͘ gín-á非常súi，她奉養王，kā伊侍候，總是，王無親近她。
1:5 亞多尼雅圖謀篡奪王位
Hit時，哈及ê kiáⁿ亞多尼雅驕傲，講：「我beh做王。」伊to̍h為kakī 準備車kah馬兵，koh有五十人走tī伊ê頭前。
1:6 伊ê老父平時m̄ bat hō͘伊憂悶，m̄ bat對伊講：「你ná ē ánne做？」伊生做不止好看；伊出世tī押沙龍ê尾後。
1:7 伊kah洗魯雅ê kiáⁿ約押，以及祭司亞比亞他參詳；in to̍htoe3亞多尼雅，來kā伊幫贊。
1:8 總是，祭司撒督kah耶何耶大ê kiáⁿ比拿亞，拿單先知kah示每，Lī-í kah大衛ê勇士，lóng無為亞多尼雅。
1:9 亞多尼雅tī近Ian-lo-gel，Só-hi-lia̍t ê石磐邊，thâi羊、牛kah肥ê chengseⁿ，請伊ê眾兄弟，to̍h是王ê kiáⁿ，以及偤大所有做王ê人臣ê眾人。
1:10 總是，拿單先知kah比拿亞，以及勇士kah伊ê小弟所羅門，伊lóng無請in。
1:11 所羅門受設立做王
拿單kā所羅門ê老母拔示芭講：「哈及ê kiáⁿ亞多尼雅做王à，你kám無聽tio̍h？咱ê主大衛mā m̄知。
1:12 Taⁿ你來，我替你phah算，thang保全你kah你ê kiáⁿ所羅門ê性命。
1:13 你入去見大衛王，kā伊講：『我ê主—我ê王，你kám m̄ bat對你ê女婢chiùchōa講：你ê kiáⁿ所羅門會續接我做王，伊ē坐我ê位？Ná會亞多尼雅teh做王？』
1:14 你tī hia kah王講話ê時，我mā tòe你ê尻脊後入去，來證明你ê話是實在。」
1:15 拔示芭入去房內見王，王真老，書念ê chabó͘ gín-á亞比煞teh侍候王。
1:16 拔示芭鞠躬拜王，王講：「你beh啥物？」
1:17 她kā王講：「我ê主ah，你bat kí上主—你ê上帝，來對你ê女婢chiùchōa講：『你ê kiáⁿ所羅門會續接我做王，伊ē坐tī我ê位。』
1:18 你看，taⁿ亞多尼雅做王，我ê主—我ê王，你mā m̄知。
1:19 伊有thâi真chē牛、肥ê chengseⁿ kah羊，請王ê眾kiáⁿ kah祭司亞比亞他，以及軍長約押；獨獨你ê奴僕所羅門，伊無請。
1:20 我ê主—我ê王，以色列人民ê目chiu lóng teh看你，thèng候你kā in講，啥人ē續接我ê主—我ê王，來坐伊ê位。
1:21 若無，等到我ê主—我ê王kah祖先做伙睏了後，我kah我ê kiáⁿ所羅門會算做有罪ê人。」
1:22 她iáu teh kah王講話ê時，拿單先知mā入來。
1:23 有人kā王講：「拿單先知tī chia。」拿單入去王ê面前，仆tī土腳拜王。
1:24 拿單講：「我ê主—我ê王，你kám有講：『亞多尼雅beh續接我做王，beh坐我ê位？』
1:25 因為今á日伊落去，thâi真chē牛kah肥ê chengseⁿ，以及羊，請王ê眾kiáⁿ kah chiahê軍長，以及祭司亞比亞他；你看，in tī伊ê面前lim食，to̍h講：『願亞多尼雅王萬歲！』
1:26 獨獨我，to̍h是你ê奴僕kah祭司撒督，kah耶何耶大ê kiáⁿ比拿亞，以及你ê奴僕所羅門，伊lóng無請。
1:27 這kám是我ê主—我ê王所做，而且mā無kā你ê奴僕講，啥人ē續接我ê主—我ê王，來坐伊ê位？」
1:28 大衛王應講：「Kā我叫拔示芭來。」她to̍h入來，tī王ê面前khiā ·leh。
1:29 王chiùchōa講：「我kí救我ê性命脫離一切ê患難ê永遠活ê上主來講。
1:30 我既然有kí上主—以色列ê上帝對你chiùchōa講：你ê kiáⁿ所羅門會續接我做王，伊beh坐我ê位來替我，我今á日ē照ánne行。」
1:31 拔示芭就鞠躬仆tī土腳，拜王，講：「願我ê主—大衛王萬萬歲！」
1:32 大衛王koh講：「Kā我叫祭司撒督、拿單先知kah耶何耶大ê kiáⁿ比拿亞來！」Into̍h lóng來王ê面前。
1:33 王kā in講：「Tio̍h chhōa lín ê主hiahê奴僕kah lín去，hō͘我ê kiáⁿ所羅門騎我ê騾，hō͘伊落去到基訓；
1:34 tī hia，祭司撒督kah拿單先知tio̍h kā伊抹油做以色列王；lín mā tio̍h pûn哨角，講：『願所羅門王萬歲！』
1:35 然後tòe伊起來，伊beh來坐我ê位，續接我做王。因為我已經設立伊做以色列kah偤大ê君王。」
1:36 耶何耶大ê kiáⁿ比拿亞應王講：「阿們！願上主—我ê主—我ê王ê上帝mā ánne講。
1:37 上主án怎kah我ê主—我ê王同在，願祂mā照ánne kah所羅門同在，koh hō͘伊ê國位比我ê主—大衛王ê國位koh khah大。」
1:38 就ánne，祭司撒督kah拿單先知，耶何耶大ê kiáⁿ比拿亞kah基利提人、比利提人，lóng落去，hō͘所羅門騎大衛王ê騾，送伊到基訓。
1:39 祭司撒督to̍h tùi布棚內the̍h貯油ê角，用油抹所羅門。人to̍hpun5哨角，眾人lóng講：「願所羅門王萬歲！」
1:40 眾人tòe伊上來，koh pûn笛á，大大歡喜，致使地因為in ê聲到beh裂開。
1:41 亞多尼雅以及kah伊tī ·leh hiahê人客tú-á食桌soah，in聽tio̍h chitê聲。約押聽tio̍h哨角ê聲to̍h講：「城內ná ē有hōa-hōa哮ê聲？」伊iáu teh講ê時，你看，祭司亞比亞他ê kiáⁿ約拿單來到位。
1:42 亞多尼雅kā伊講：「入來！你是妥當ê人，一定是報好消息。」
1:43 約拿單應亞多尼雅講：「有影to̍h tio̍h，咱ê主—大衛王已經設立所羅門做王。
1:44 王差祭司撒督、拿單先知，耶何耶大ê kiáⁿ比拿亞kah基利提人、比利提人，kah所羅門去，in hō͘伊騎王ê 騾。
1:45 祭司撒督kah拿單先知，tī基訓已經kā伊抹油做王；in lóng tùi hia起來，真歡喜，致使城應聲，這to̍h是lín所聽tio̍h ê聲；
1:46 而且所羅門已經坐國位。
1:47 王ê人臣mā來kā咱ê主—大衛王祝福，講：『願你ê上帝hō͘所羅門ê名比你ê名khah贏，hō͘伊ê國位比你ê國位khah大。』王to̍h tī床裡àⁿ落去拜。
1:48 王mā ánne講：『上主—以色列ê上帝是應該oló ê，因為祂有賞賜我一个人今á日坐我ê位，我mā親目看tio̍h。』」
1:49 Hiahê kah亞多尼雅tī ·leh ê人客lóng驚惶起來，ta̍k人行in ê路四散去。
1:50 亞多尼雅為tio̍h所羅門就驚，起來去掠tiâu祭壇ê角。
1:51 有人kā所羅門講：「你看，亞多尼雅驚所羅門王，因為伊擒tiâu祭壇ê角，講：『願所羅門王今á日對我chiùchōa，一定無用刀thâi死伊ê奴僕。』」
1:52 所羅門講：「伊若beh做好人，一支頭毛mā bē ka-la̍uh tī地裡；若看伊有做pháiⁿ，就一定tio̍h死。」
1:53 所羅門王to̍h差人去，in to̍htui3壇裡帶伊落來。伊to̍h來tī所羅門王ê面前kā伊拜。所羅門kā伊講：「你tńg去你ê厝！」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。