創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30:1 拉結看她kakī 無kā雅各生kiáⁿ，就怨妒她ê大姊。她對雅各講：「你tio̍h hō͘我有kiáⁿ，若無，我beh死。」
30:2 雅各對拉結受氣，講：「Hō͘你無生ê是上帝，我kám ē tàng代替祂？」
30:3 拉結講：「你看我ê女婢辟拉tī chia，你去kah她同房，hō͘她生kiáⁿ，抱tī我ê腳頭u，我mā thang tùi她得tio̍h kiáⁿ。」
30:4 拉結to̍h kā她ê女婢辟拉hō͘伊做bó͘，雅各to̍h kah她同房。
30:5 辟拉懷孕，kā雅各生一个kiáⁿ。
30:6 拉結講：「上帝kā我判斷，mā聽我ê聲，hō͘我有kiáⁿ。」所以，她kā伊ê名號做但。
30:7 拉結ê女婢辟拉koh懷孕，kā雅各生第二个kiáⁿ。
30:8 拉結講：「我kah我ê大姊激烈相爭，已經得tio̍h khah贏。」to̍h kā伊ê名叫做拿弗他利。
30:9 利亞看kakī 停歇無koh生，to̍h kā她ê女婢悉帕hō͘雅各做bó͘。
30:10 利亞ê女婢悉帕kā雅各生kiáⁿ。
30:11 利亞講：「佳哉！」to̍h kā伊ê名叫做迦得。
30:12 利亞ê女婢悉帕，koh kā雅各生第二个kiáⁿ。
30:13 利亞講：「我有福氣！Chiahê chabó͘ gín-á lóng ē講我有福氣。」to̍h kā伊號名叫做亞設。
30:14 割麥ê時，流便去田裡，得tio̍h催情果，the̍h來hō͘伊ê老母利亞。拉結對利亞講：「請kā你ê kiáⁿ ê催情果hō͘我。」
30:15 利亞對她講：「你搶奪我ê丈夫，kám是小khóa tāichì？你koh beh搶奪我ê kiáⁿ ê催情果？」拉結講：「為tio̍h你ê kiáⁿ ê催情果，所以，今暝伊thang kah你做伙睏。」
30:16 到暗，雅各tùi田裡tńg來，利亞出去kā伊迎接，講：「你tio̍h kah我做伙睏，因為我已經用我ê kiáⁿ ê催情果倩你。」Hit暝，雅各to̍h kah她做伙睏。
30:17 上帝允准利亞，她就懷孕，kā雅各生第五个kiáⁿ。
30:18 利亞講：「上帝hō͘我工錢，因為我kā女婢hō͘我ê丈夫。」就ánne，kā伊號名叫做以薩迦。
30:19 利亞koh懷孕，kā雅各生第六个kiáⁿ。
30:20 利亞講：「上帝賞賜我好ê賞賜，我ê丈夫beh kah我tòa，因為我kā伊生六個kiáⁿ。」就ánne，kā伊號名叫做西布倫。
30:21 後來，她生一个chabó͘ kiáⁿ，kā她號名叫做底拿。
30:22 上帝數念拉結，上帝允准她，hō͘她會生kiáⁿ。
30:23 她就懷孕生kiáⁿ；講：「上帝除去我ê見笑。」
30:24 to̍h kā伊號名叫做約瑟，講：「願上主koh加添我一个kiáⁿ。」
30:25 雅各kah拉班談判
拉結生約瑟了後，雅各對拉班講：「請差我離開，hō͘我tńg去我ê本所在，我ê故鄉。
30:26 請你kā我服事你所得tio̍h ê bó͘-kiáⁿ hō͘我，請容允我去；我án怎服事你，你lóng知。」
30:27 拉班kā伊講：「我若tī你ê面前得tio̍h恩典，請你kah我tòa，因為我深知上主賜我福氣，是因為你ê緣故。」
30:28 拉班koh kā伊講：「請你定tio̍h你ê工錢，我to̍h hō͘你。」
30:29 雅各kā伊講：「我服事你án怎，你ê chengseⁿ tī我ê手頭án怎，你lóng知。
30:30 我iáu未來ê chìn前，你所有ê真少，taⁿ你大發達；上主kā福氣tòe我ê腳來hō͘你，taⁿ我tio̍h到tang時chiah ē tàng為我ê家建置產業？」
30:31 拉班講：「我tio̍h hō͘你啥物？」雅各講：「你mā m̄免特別hō͘我啥物，有一項tāichì，你若答應，我to̍h猶原飼你ê羊群來kā in顧守。
30:32 今á日，我beh kā你ê羊群巡一遍，kā綿羊中見若有點ê，有斑ê kah烏色ê，以及山羊中見若有斑ê kah有點ê lóng撥出來，到時chit款ê羊to̍h hō͘我來當做我ê工錢。
30:33 以後你來看我ê工錢，hit中間若有山羊無點、無斑ê，綿羊若m̄是烏色ê，to̍h算是我偷ê；用ánne來證明我ê公道。」
30:34 拉班講：「好，我願意照你ê話行。」
30:35 Hit日，拉班就先kā有紋、有斑ê山羊káng，有點、有斑、làng白ê山羊母，以及烏色ê綿羊，lóng撥出來交hō͘伊kakī hiahê kiáⁿ。
30:36 伊hō͘ kakī kah雅各相離有三日ê路程，雅各to̍h去顧拉班其他ê羊。
30:37 雅各the̍h青ê楊樹、杏樹、楓樹，軟ê枝，kā樹皮剝成白紋，hō͘樹枝內白色ê部分露現出來。
30:38 伊kā有白紋ê樹枝插tī羊lim水ê水溝kah水槽，hō͘它kah羊相對相；羊來lim水ê時，公母交合。
30:39 羊tī樹枝ê對面交合，to̍h生有紋ê、有點ê、有斑ê。
30:40 雅各kā羊á撥出來，hō͘拉班ê羊kah chiahê有紋kah烏色ê羊相對。伊kā kakī ê羊另外放tī一个所在，無hō͘ in kah拉班ê羊lām做伙。
30:41 Tú tio̍h羊群中勇壯ê羊交合ê時，雅各to̍h用樹枝插tī水溝內，hō͘羊tī樹枝ê對面交合。
30:42 Tú tio̍h羊群中間ê瘦ê，to̍h無插樹枝。就ánne，瘦ê歸拉班，勇壯ê歸雅各。
30:43 雅各就ánne大發達，得tio̍h真chē羊群、女婢、奴僕、駱駝kah驢。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。