撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 Ta-bi̍t kah Bat-se-ba
Nî-thâu, lia̍t ông chhut-chiàn ê sî, Ta-bi̍t chhe Io-ap kah i ê jîn-sîn, í-ki̍p I-su-la-el ê kûn-chiòng chhut-.khì. In chiū thâi-iâⁿ Am-móng lâng, ûi-kong Lap-bah. Ta-bi̍t iû-goân tòa tī Ê-lú-sa-lèm.
11:2 Ū chi̍t ji̍t beh àm ê sî, Ta-bi̍t tùi chhn̂g-.ni̍h khí-.lâi, tī ông-kiong ê chhù téng kiâⁿ lâi kiâⁿ khì, tùi chhù téng khòaⁿ tio̍h chi̍t-ê chabó͘ lâng teh sé-e̍k, chit-ê chabó͘ lâng seⁿ-chò chin súi.
11:3 Ta-bi̍t ūi tio̍h hit-ê chabó͘ lâng chiū chhe lâng khì thàm-thiaⁿ, ū lâng kóng, " I kám m̄-sī E-li-àm ê chabó͘ kiáⁿ, Hiat lâng U-lī-a ê bó͘ Bat-se-ba? "
11:4 Ta-bi̍t chhe sù-chiá khì kā i chhōa-.lâi, i chiū lâi-kàu i hia, Ta-bi̍t kah i tâng-pâng. Cha-bó͘ lâng kā i bô chheng-khì piàⁿ chheng-khì liáu-āu, chiū tńg-khì in chhù.
11:5 Cha-bó͘ lâng hoâi-īn, chhe lâng kā Ta-bi̍t kóng, " Góa í-keng hoâi-īn. "
11:6 Ta-bi̍t chhe lâng kàu Io-ap hia, kóng, " Lí chhe Hiat lâng U-lī-a lâi góa chia. " Io-ap chiū chhe U-lī-a khì kìⁿ Ta-bi̍t.
11:7 U-lī-a lâi-kàu i hia liáu-āu, Ta-bi̍t chiū mn̄g khòaⁿ Io-ap hó-.bô? Jîn-bîn hó-.bô? Kau-chiàn ū hó-sè-.bô?
11:8 Ta-bi̍t kā U-lī-a kóng, " Lí lo̍h-khì lín tau sé kha. " U-lī-a kiâⁿ-chhut ông-kiong liáu-āu, ông chiū sàng chi̍t hūn chia̍h-mi̍h hō͘ i.
11:9 Chóng-.sī, U-lī-a kah i ê chú-lâng ê lô͘-po̍k chò-hóe khùn tī ông-kiong ê mn̂g-kháu, bô tńg-khì in tau.
11:10 Ū lâng kā Ta-bi̍t kóng, " U-lī-a bô tńg-khì i ê chhù. " Ta-bi̍t chiū mn̄g U-lī-a kóng, " Lí kám m̄-sī tùi hn̄g-lō͘ lâi? Ná ē m̄ tńg-khì lí ê chhù? "
11:11 U-lī-a tùi Ta-bi̍t kóng, " Iok-kūi kah I-su-la-el í-ki̍p Iô-tah lóng tòa tī chháu-liâu-á, góa ê chú Io-ap kah góa ê chú ê lô͘-po̍k, lóng chat iâⁿ tī chhân-iá, góa kám thang tò tńg-khì góa ê chhù lim-chia̍h kah góa ê bó͘ chò-hóe khùn? Góa kí lí ê oa̍h-miā kah lí lêng-hûn ê oa̍h-miā lâi chiùchōa, góa choa̍t-tùi bô beh chò chit-ê tāichì! "
11:12 Ta-bi̍t kā U-lī-a kóng, " Lí kin-á-ji̍t iû-goân tòa chia, bîn-á-chài góa hō͘ lí khì. " U-lī-a chiū tī hit ji̍t kah tē-jī ji̍t tòa tī Ê-lú-sa-lèm.
11:13 Ta-bi̍t kiò U-lī-a lâi, i chiū tī i ê bīn-chêng lim-chia̍h, Ta-bi̍t hō͘ i chùi. Í-keng àm à, U-lī-a chiū chhut-khì kah i ê chú ê lô͘-po̍k chò-hóe chò-phōaⁿ, mā bô tńg-khì in tau.
11:14 Keh kang chá-khí, Ta-bi̍t siá chi̍t tiuⁿ phoe hō͘ Io-ap, thok U-lī-a ê chhiú tòa-.khì.
11:15 Phoe lāi siá kóng, " Tio̍h phài U-lī-a khì tī tīn-chêng ke̍k gûi-kip ê só͘-chāi, lín chiū tùi i ê āu-bīn thè tńg-.lâi, hō͘ i siū phah-sí. "
11:16 Io-ap ûi siâⁿ ê sî, tī i só͘ chai ū ióng-sū ê só͘-chāi, chiū phài U-lī-a khì hia.
11:17 Siâⁿ lāi ê lâng ū chhut-lâi kah Io-ap kau-chiàn, Ta-bi̍t ê lô͘-po̍k sí kúi-nā-ê lâng, Hiat lâng U-lī-a mā sí.
11:18 Io-ap chhe lâng kā kau-chiàn ê tāichì lóng kā Ta-bi̍t kóng.
11:19 Chiū hoan-hù sù-chiá kóng, " Lí kā kau-chiàn só͘-ū ê tāichì khì kā ông kóng liáu-āu,
11:20 ông nā siū-khì, kā lín kóng, ' Lín kau-chiàn ê sî, ná ē pek-kīn siâⁿ chhiûⁿ? Kám m̄-chai in ē tùi siâⁿ téng siā chìⁿ?
11:21 Chá-chêng phah-sí Iâ-lō͘-pí-siat ê kiáⁿ A-mí-me-le̍k ê sī siáⁿ lâng? Kám m̄-sī chi̍t-ê chabó͘ lâng tùi chhiûⁿ téng hiat chio̍h-bō ê téng-tún tī i ê téng-bīn, hō͘ i sí tī Thê-pī-su? Lín ná ē pek-kīn siâⁿ? ' Lí tio̍h kóng, ' Lí ê lô͘-po̍k Hiat lâng U-lī-a mā sí. '
11:22 Sù-chiá chiū khì, chiàu Io-ap it-chhè só͘ bēng-lēng ê lâi kā Ta-bi̍t kóng.
11:23 Sù-chiá kā Ta-bi̍t kóng, " Tùi-te̍k pí goán khah kiông, chhut-lâi kau-iá kong-kek goán, goán kā i phah kàu siâⁿ mn̂g-kháu.
11:24 Siā chìⁿ ê lâng tùi chhiûⁿ téng siā lí ê lô͘-po̍k, ông ê lô͘-po̍k sí kúi-nā-ê lâng, lí ê lô͘-po̍k Hiat lâng U-lī-a mā sí. "
11:25 Ta-bi̍t kā hit-ê sù-chiá kóng, " Lí tio̍h ánne kā Io-ap kóng, ' M̄-bián chhau-hoân chit-ê tāichì, in-ūi to-kiàm thâi-sí-lâng, chit-ê hit-ê bô it-tēng; lí tio̍h koh khah chīn-la̍t kong siâⁿ, lâi kā i chhia-tó. ' Lí tio̍h ánne kā i bián-lē. "
11:26 U-lī-a ê bó͘ thiaⁿ tio̍h tiōng-hu U-lī-a í-keng sí, chiū ūi i ê tiōng-hu thî-khàu.
11:27 Song-sū kiat-sok liáu-āu, Ta-bi̍t chhe lâng chhōa i lâi-kàu kiong lāi, i chiū chò Ta-bi̍t ê bó͘, kā i seⁿ chi̍t-ê kiáⁿ. Chóng-.sī, Ta-bi̍t só͘ chò ê tāichì, Siōng-chú chin bô hoaⁿ-hí.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。