創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
29:1 雅各來到拉班ê厝
雅各出發，來到東方ê人ê地。
29:2 伊看tio̍h田裡有一口井，有三陣羊倒tī井邊，因為人lóng是用hit口井ê水hō͘羊群lim水；井嘴用大石蓋teh。
29:3 平時羊群聚集tī hia ê時，人to̍h kā石頭徙離井嘴，hō͘羊lim水了後，chiah koh kā石頭徙到原位。
29:4 雅各對in講：「兄弟，lín tùi tó位來？」In講：「阮tùi哈蘭來。」
29:5 雅各問in講：「拿福ê孫拉班，lín kám bat伊？」
29:6 In講：「阮bat伊。」Koh對in講：「伊kám平安？」應講：「平安。你看，伊ê chabó͘ kiáⁿ拉結chhōa羊群teh來。」
29:7 雅各講：「日iáu koân，chengseⁿ聚集ê時iáu未到，tio̍h hō͘羊lim水，koh hō͘ in去食草。」
29:8 In講：「阮bē tàng。Tio̍h thèng候真chē陣lóng聚集óa來，人kā石徙離開井嘴，chiah thang hō͘羊lim水。」
29:9 雅各teh kah in講話ê時，拉結chhōa in老父ê羊óa來，因為羊是她teh顧。
29:10 雅各看tio̍h母舅拉班ê chabó͘ kiáⁿ拉結kah母舅拉班ê羊群，就進前kā石徙離井嘴，hō͘ in母舅拉班ê羊群lim水。
29:11 雅各kā拉結chim嘴，出聲哭。
29:12 雅各koh kā拉結講伊是in老父ê外甥，是利百加ê kiáⁿ。拉結to̍h走去kā in老父講。
29:13 拉班聽tio̍h外甥雅各ê消息，to̍h走去kā伊迎接，kā伊攬，kah伊chim嘴，chhōa伊到in tau。雅各kā一切ê tāichì lóng對拉班講。
29:14 拉班kā雅各講：「你實在是我ê骨肉。」雅各to̍h kah伊tòa一月日。
29:15 雅各為拉結kah利亞來服事拉班
拉班kā雅各講：「你雖然是我ê親chiâⁿ，kám thang白白做我ê工？請kā我講，你ài啥物工錢？」
29:16 拉班有兩 个chabó͘ kiáⁿ，大ê名叫做利亞，細ê名叫做拉結。
29:17 利亞目chiu khah輸，拉結生做好看。
29:18 雅各愛拉結，to̍h講：「我願意為tio̍h你ê細漢chabó͘ kiáⁿ拉結，kā你做工七年。」
29:19 拉班講：「Kā她嫁hō͘你，khah好hō͘別人。你kah我tòa！」
29:20 雅各to̍h為tio̍h拉結kā伊做工七年。因為深深愛她，雅各kā七年看做幾日á。
29:21 雅各對拉班講：「日期已經滿，求你kā我ê bó͘ hō͘我，我thang kah她同房。」
29:22 拉班聚集hit所在ê群眾，辦宴席請in。
29:23 到日暗，拉班kā伊ê chabó͘ kiáⁿ利亞，送來hō͘雅各；雅各to̍h kah她同房。
29:24 拉班kā伊ê女婢悉帕hō͘伊ê chabó͘ kiáⁿ利亞做女婢。
29:25 到天光，雅各一下看tio̍h是利亞，to̍h對拉班講：「你對我做ê是啥物？我kā你做工，kám m̄是為tio̍h拉結？你ná ē騙我？」
29:26 拉班講：「未嫁大ê chìn前先嫁細ê，tī阮chia無人ánne做。
29:27 你kah利亞ê結婚tio̍h滿七日，然後阮就ē kā拉結mā嫁hō͘你，你tio̍h為拉結koh kā我做工七年。」
29:28 雅各就照ánne做。Kah利亞ê婚期滿七日，拉班to̍h kā伊ê chabó͘ kiáⁿ拉結hō͘伊做bó͘。
29:29 拉班kā伊ê女婢辟拉hō͘伊ê chabó͘ kiáⁿ拉結做女婢。
29:30 雅各mā kah拉結同房，koh疼拉結贏過利亞。伊to̍hkoh kā拉班做工七年。
29:31 雅各ê Kiáⁿ兒
上主看利亞無得tio̍h雅各ê疼，to̍h hō͘她懷孕；獨獨拉結無。
29:32 利亞懷孕生kiáⁿ，to̍h kā伊號名叫做流便，因為她講：「上主看tio̍h我ê苦情；taⁿ我ê丈夫會疼我。」
29:33 她koh懷孕生kiáⁿ，講：「上主聽tio̍h我無得人疼，所以，koh hō͘我chitê kiáⁿ。」她to̍h kā伊號名叫做西緬。
29:34 她koh懷孕生kiáⁿ，講：「我kā丈夫生三个kiáⁿ，伊beh kah我結聯。」to̍h kā伊號名叫做利未。
29:35 她koh懷孕生kiáⁿ，講：「Chit-má我beh oló上主。」所以，她kā伊ê名叫做偤大。然後她to̍h停止，無koh生。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。