撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 大衛做偤大王
後來，大衛問上主講：「我kám thang 上去偤大ê一个城？」上主kā伊講：「Thang上去。」大衛講：「我tio̍h上去tó位？」祂講：「去希伯崙。」
2:2 大衛to̍h kah伊兩 个bó͘，to̍h是耶斯列人亞希暖kah迦密人bat做拿八ê bó͘ hitê名叫亞比該，lóng上去hia。
2:3 大衛mā hō͘跟tòe伊ê人kah in ta̍k人ê家眷lóng去，in to̍htoa3 tī希伯崙hiahê城。
2:4 偤大人來到，tī hia用油抹大衛，hō͘伊做偤大家ê王。 有人kā大衛講：「埋葬掃羅ê是基列雅比ê人。」
2:5 大衛to̍h差使者去見基列雅比ê人，kā in講：「願上主賜福hō͘ lín，因為lín用chitê仁慈款待你ê主掃羅，kā伊埋葬。
2:6 願上主用仁慈誠實kā lín款待，我mā beh報答lín chitê仁慈，因為lín有行chitê tāichì。
2:7 Lín ê手tio̍h giám硬，lín tio̍h勇敢，因為lín ê主掃羅已經死，偤大族mā有用油抹我做in ê王。」
2:8 伊施波設受設立做以色列王
掃羅ê軍長尼珥ê kiáⁿ押尼珥bat kā掃羅ê kiáⁿ伊施波設chhōa過去瑪哈念，
2:9 kā伊設立做王來治理基列、A-su-lī、耶斯列、以法連、便雅憫kah以色列ê群眾。
2:10 掃羅ê kiáⁿ伊施波設起頭做以色列王，hit時四十歲，坐位兩年，獨獨偤大族跟tòe大衛。
2:11 大衛tī希伯崙做偤大族ê王，經過七年koh六月日。
2:12 以色列kah偤大ê交戰
尼珥ê kiáⁿ押尼珥kah掃羅ê kiáⁿ伊施波設ê人臣，tùi瑪哈念出來去基遍。
2:13 洗魯雅ê kiáⁿ約押kah大衛ê人臣mā出來，tī基遍ê池邊相tú ·tio̍h；in to̍h坐落來，一隊坐tī池ê chit pêng，一隊坐tī池ê hit-pêng。
2:14 押尼珥對約押講：「請你hō͘少年人起來，tī咱ê面前滾笑。」約押講：「Thang hō͘伊起來。」
2:15 Into̍h起來，照數額過去：屬掃羅ê kiáⁿ伊施波設ê便雅憫人十二名，大衛ê人臣mā有十二名。
2:16 Ta̍k個khiú伊ê對面hitê人ê頭殼，用刀鑿伊對面hitê人ê脇下，做一下倒落去死。所以，基遍hit所在叫做Hi-lī-kah-hap-sò͘-lîm（註：希伯來文讀音，意思是「劍場」。）。
2:17 Hit日ê交戰真雄，押尼珥kah以色列人tī大衛ê兵ê面前khah輸。
2:18 Tī hia有洗魯雅三个kiáⁿ：約押、亞比篩kah亞撒黑。亞撒黑ê腳gâu走，ná親像野鹿；
2:19 亞撒黑jiok押尼珥，無偏左無偏右，直直jiok tio̍h押尼珥。
2:20 押尼珥oa̍t頭看，講：「亞撒黑，是你á m̄是？」亞撒黑應講：「是我。」
2:21 押尼珥kā伊講：「你tio̍h oa̍t-tńg正pêng á是倒pêng，掠一个少年人，為你本身剝伊ê戰衫。」總是，亞撒黑直直jiok伊，m̄肯oa̍t tńg來。
2:22 押尼珥koh kā亞撒黑講：「你oa̍t tńg去，mài koh jiok我！我ná tio̍h kā你phah倒地？若ánne，我有啥物面子thang去見你ê阿兄約押？」
2:23 伊猶原m̄肯oa̍t-tńg去。押尼珥chiah用鎗柄後ê刀鑿入去伊ê腹肚，鎗to̍h thàng過伊ê尻脊後，伊to̍h倒tī hia死去。見若來到亞撒黑倒teh死ê所在，to̍h lóng停腳。
2:24 約押kah亞比篩jiok押尼珥，in到Ki-a相對面ê A-má山，tī基遍曠野ê路，日to̍h落山。
2:25 便雅憫人聚集tòe押尼珥做一陣，khiā tī山頂。
2:26 押尼珥叫約押講：「刀劍thâi人kám永無soah？你kám m̄知到尾ē有艱苦？你beh到tang時chiah hō͘人民tńg去，無koh jiok in ê兄弟？」
2:27 約押講：「我kí永遠活ê上主來chiùchōa，若m̄是你講，早起人民to̍h tńg去，無jiok伊ê兄弟。」
2:28 就ánne，約押pûn哨角，眾人to̍h khiā ·leh，無koh jiok以色列人，mā無koh交戰。
2:29 押尼珥kah tòe伊ê人行kui暝，經過亞拉巴，過約旦河，tùi Pit-lûn過去到瑪哈念。
2:30 約押無koh jiok押尼珥，to̍h tńg來，聚集眾人。大衛ê兵減十九人kah亞撒黑。
2:31 總是，大衛ê兵phah死便雅憫人kah tòe押尼珥ê人，總共三百六十人。
2:32 In扛亞撒黑去伯利恆，kā伊埋葬tī in老父ê墓。約押kah tòe伊ê人行kui暝，來到希伯崙ê時，天tú-á光。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。