撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
28:1 Hit時，腓利士人聚集軍兵出陣，beh kah以色列人交戰。亞吉對大衛講：「你tio̍h確實知，你kah tòe你ê人lóng tio̍h tòe我出陣。」
28:2 大衛對亞吉講：「是，奴僕所會做ê tāichì，你一定ē知。」亞吉kā大衛講：「Án-ne，我設立你永遠做我ê侍衛長。」
28:3 掃羅去問紅姨
Hit時，撒母耳已經死，以色列人民為tio̍h伊哀哭，kā伊埋葬tī 拉瑪，to̍h是tī伊ê本城。掃羅bat趕逐鬼附身ê kah行邪術ê離開伊ê境內。
28:4 腓利士人聚集，紮營tī書念；掃羅聚集以色列人民，紮營tī基利波。
28:5 掃羅看tio̍h腓利士ê軍兵，to̍h真驚，心肝pho̍k-pho̍k-chhéng到極。
28:6 掃羅問上主，上主lóng無用眠夢，á是烏陵，á是先知來kā伊應答。
28:7 掃羅吩咐伊ê奴僕講：「你tio̍h kā我chhōe尪姨，hō͘我thang去伊hia問伊。」奴僕講：「Tī Ian-tol有一个尪姨。」
28:8 掃羅就改換伊ê容貌，穿別種ê衫，有兩 个人kah伊去，暗時去hitê chabó͘人hia。掃羅講：「請你用附你ê身ê神，kā我行法術，我所kā你講ê人，你kā我牽伊出來。」
28:9 Cha-bó͘人對伊講：「你看，你知掃羅ê所做，伊tùi境內剪除chiahê鬼附身ê，kah行邪術ê。你ná ē設計beh害死我ê性命？」
28:10 掃羅kí上主對她chiùchōa講：「我kí永遠活ê上主來chiùchōa，你bē因為chitê tāichì受刑罰。」
28:11 Cha-bó͘人講：「我tio̍h kā你牽啥人起來？」掃羅講：「Kā我khan撒母耳起來。」
28:12 Cha-bó͘人看tio̍h撒母耳，to̍h大聲叫，chabó͘人kā掃羅講：「你ná ē騙我，因為你是掃羅。」
28:13 王對她講：「M̄免驚，你看tio̍h啥物？」Cha-bó͘人kā掃羅講：「我看tio̍h神明tùi地裡起來。」
28:14 掃羅講：「伊ê形狀án怎？」她講：「有一个老人起來，身軀moa長衫。」掃羅知是撒母耳，to̍h仆tī土腳kā伊拜。
28:15 撒母耳kā掃羅講：「你ná ē kā我攪擾，牽我起來？」掃羅講：「我困苦到極；因為腓利士人kah我交戰，上帝mā離開我，無koh用先知á是眠夢來應答我，所以，我請你來，thang指示我tio̍h án怎行。」
28:16 撒母耳講：「上主已經離開你，koh做你ê對敵，你ná ē來問我？
28:17 上主照祂託我所講ê話行tī你，上主已經tùi你ê手搶奪國位，交hō͘你ê同伴大衛。
28:18 因為你無遵thàn上主ê話：祂bat行祂ê大受氣tī亞瑪力，所以，上主今á日ánne行tī你ê身上。
28:19 而且上主ē kā你kah以色列交tī腓利士人ê手中，明á載你kah你hiahê kiáⁿē kah我同在，上主ē kā以色列ê軍兵交tī腓利士人ê手中。」
28:20 掃羅忽然身軀倒直直tī地裡，因為撒母耳ê話，to̍h真驚，致到lóng無力，因為伊一日一暝lóng無食啥物。
28:21 Cha-bó͘人óa近掃羅，看tio̍h伊真心悶，對伊講：「你ê女婢聽你ê話，無顧kakī ê性命，聽你所kā我講ê話。
28:22 Taⁿ求你聽女婢ê話，容允我tī你ê面前排淡薄食物，hō͘你食，你行路chiah有氣力。」
28:23 掃羅推辭講：「我m̄食。」總是，伊ê奴僕kah chabó͘人好嘴勸伊，伊chiah聽in ê嘴tùi地裡起來，坐tī床裡。
28:24 Cha-bó͘人厝內有一隻肥ê牛á，趕緊kā牠thâi，koh the̍h麵粉，chhiau做無酵餅來煏，
28:25 排tī掃羅kah伊ê奴僕ê面前，in to̍h食。Hit暝 in to̍h出發去。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。