撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 大衛koh再無thâi掃羅
西弗人到基比亞來見掃羅，講：「大衛kám m̄是kakī bih tī Iâ-sī-bûn頭前ê Hap-ki-la̍h山？」
26:2 掃羅to̍h起來，chhōa以色列中揀選ê兵三千，落去到西弗ê曠野，beh tī西弗ê曠野chhōe大衛。
26:3 掃羅tī Iâ-sī-bûn頭前ê Hap-ki-la̍h山，紮營tī路裡。大衛tòa tī曠野，知影掃羅來曠野beh jiok伊。
26:4 大衛to̍h差幾nā个偵探，chiah知掃羅真正來。
26:5 大衛to̍h起來，來到掃羅紮營ê所在，大衛看tio̍h掃羅kah伊ê軍長尼珥ê kiáⁿ押尼珥睏ê所在，掃羅睏tī排列車ê內面，人民紮營tī伊ê四箍圍。
26:6 大衛對赫人亞希米勒kah洗魯雅ê kiáⁿ約押ê兄弟亞比篩講：「啥人beh kah我落去，到營房，到掃羅hia？」亞比篩講：「我kah你落去。」
26:7 大衛kah亞比篩透暝來到人民hia，看tio̍h掃羅倒tī排列車ê內面teh睏；伊ê鎗tī頭殼邊，插tī地裡。押尼珥kah人民睏tī伊ê四箍圍。
26:8 亞比篩kā大衛講：「上主今á日kā你ê對敵交tī你ê手中，求你准我用鎗kā伊鑿tī地裡，鑿一下，m̄免兩下。」
26:9 大衛kā亞比篩講：「M̄-thang kā伊害死，啥人起手害上主所抹油ê會無罪？」
26:10 大衛koh講：「我kí永遠活ê上主來chiùchōa，上主ē kā伊phah，kiámchhái伊ê死日beh到，á是伊ē落戰陣來死。
26:11 我對上主絕對m̄敢起手phah上主所抹油ê，taⁿ你thang kā伊取頭殼邊ê鎗kah水瓶，咱thang the̍h來去。」
26:12 大衛tùi掃羅ê頭殼邊kā伊取鎗kah水瓶，兩人to̍h去，無人看tio̍h，無人知，mā無人醒，是in lóng teh睏，因為上主hō͘ in睏重眠。
26:13 大衛過去到hit-pêng，遠遠khiā tī山頂，kah in相離不止遠。
26:14 大衛叫人民kah尼珥ê kiáⁿ押尼珥，講：「押尼珥，你ná ē無應？」押尼珥講：「你是啥人teh叫王？」
26:15 大衛對押尼珥講：「你kám m̄是一个勇士？以色列中啥人ē比得你？你ná ē無保護你ê主—你ê王？因為人民中有一个人入去beh害你ê王—你ê主。
26:16 你chit款ê所做是m̄好！我kí永遠活ê上主chiùchōa，lín lóng是該死ê，因為無保護lín ê主，to̍h是上主所抹油ê。Taⁿ，你看，王ê頭殼邊ê鎗kah水瓶tī tó位？」
26:17 掃羅認得是大衛ê聲，to̍h講：「我ê kiáⁿ大衛，這是你ê聲？」大衛講：「王—我ê主，是我ê聲。」
26:18 Koh講：「我ê主ná ē beh jiok奴僕？我kám有做啥物m̄ tio̍h？我ê手有啥物pháiⁿ？
26:19 我ê王，我ê主，taⁿ求你聽奴僕ê話：若是上主激動你攻擊我，願祂鑒納祭物；若是人激動你，願in tī上主ê面前受咒詛，因為in今á日趕我出來，hō͘我tī上主ê產業無份，講：『你去服事別个神明！』
26:20 Taⁿ m̄ thang hō͘我ê血流tī離開上主ê面前ê地，因為以色列王出來，是teh chhōe一隻ka蚤，親像人tī山裡jiok一隻鷓鴣（chià-ko͘）。」
26:21 掃羅講：「我有罪à！我ê kiáⁿ大衛，你thang tńg來，我無beh koh害你，因為你今á日看我ê性命做寶貝。你看，我所做ê是真戇，錯誤到極。」
26:22 大衛應講：「我ê王，你ê鎗tī chia，你tio̍h叫一个少年人過來gia̍h。
26:23 上主ē照ta̍k人ê公義kah忠信來kā伊報答，因為今á日上主kā你交tī我ê手中。總是，我m̄肯伸手來害上主所抹油ê。
26:24 我今á日看重你ê性命，願上主mā ánne看重我ê性命，koh救我脫離所有ê患難。」
26:25 掃羅kā大衛講：「我ê kiáⁿ大衛，願你受祝福！你ē做出大ê tāichì，mā穩當會khah贏。」大衛to̍h做伊行去。掃羅tńg去伊ê本所在。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。