撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 殘殺祭司
大衛to̍h離開hia，走到亞杜蘭ê洞。伊ê兄弟kah伊ê老父全家聽tio̍h，to̍h lóng落去到伊hia。
22:2 見若迫害ê，欠債ê，心內鬱卒ê，lóng聚集到伊hia；大衛to̍h做in ê頭，óa伊ê差不多有四百人。
22:3 大衛tùi hia去摩押ê米斯巴，kā摩押王講：「求你容允我ê老父kah我ê老母出來，tiàm lín chia tòa，thèng候到我明白上主ē kā我án怎行。」
22:4 伊chhōa in到摩押王ê面前。大衛tòa tī山寨ê時chūn，伊ê父母mā tòa tī摩押王hia。
22:5 先知迦得kā大衛講：「你m̄ thang tòa tī城堡，tio̍h去偤大地。」大衛to̍h離開hia，去到Hap-lia̍t ê樹林。
22:6 掃羅殘殺祭司
掃羅tī基比亞ê拉瑪，坐tī垂絲柳ê樹腳，手裡gia̍h鎗，眾人臣圍tī伊ê左右。掃羅聽tio̍h講大衛kah tòe ê人hō͘人tú tio̍h，
22:7 伊to̍hka7圍伊ê人臣講：「便雅憫人，lín tio̍h聽，耶西ê kiáⁿ kámē kā田kah葡萄園hō͘ lín ta̍k人？Kám會設立lín ta̍k人做營長，連長？
22:8 Lín竟然做伙計謀攻擊我！我ê kiáⁿ bat kah耶西ê kiáⁿ結約，無人報我知；lín中間無一个人可憐我；我ê kiáⁿ煽動我ê人臣攻擊我，當等我，親像今á日ê款，lín lóng無報我知。」
22:9 Hit時，以東人多益khiā tī掃羅人臣ê中間，kā伊講：「我bat看tio̍h耶西ê kiáⁿ去到挪伯，來到亞希突ê kiáⁿ亞希米勒hia。
22:10 亞希米勒替伊問上主，koh hō͘伊食物，mā用腓利士人歌利亞ê刀hō͘伊。」
22:11 王to̍h差人去召亞希突ê kiáⁿ，祭司亞希米勒，kah伊老父全家，to̍h是tòa tī 挪伯hiahê祭司，in to̍hlong2來王hia。
22:12 掃羅講：「亞希突ê kiáⁿ，你tio̍h聽。」亞希米勒應講：「我ê主，我tī chia。」
22:13 掃羅kā伊講：「Lín án怎kah耶西ê kiáⁿ計謀beh來攻擊我？你竟然kā餅kah刀hō͘伊，koh替伊問上主，hō͘伊起來攻擊我，當等我，親像今á日ê款？」
22:14 亞希米勒應王講：「你ê人臣中間，啥人ē比得大衛ê盡忠？伊是王ê kiáⁿ婿，koh做你ê參謀，mā tī你ê厝內是尊貴ê。
22:15 我kám是tùi今á日chiah替伊問上主？我絕對無hit款意思，請王m̄ thang kā啥物歸tī奴僕kah我ê老父全家，因為chiahê所有ê tāichì，無論大細，你ê奴僕lóng m̄知。」
22:16 王講：「亞希米勒，你kah你ê老父全家lóng一定tio̍h死。」
22:17 王命令左右ê侍衛講：「Lín oa̍t tńg去thâi上主ê祭司，因為in mā幫贊大衛，koh因為in知大衛逃走，竟然無報我知。」總是，王ê人臣m̄肯伸手phah死上主ê祭司。
22:18 王kā多益講：「你oa̍t tńg去phah hiahê祭司。」以東人多益to̍h oa̍t tńg去phah祭司，hit日，thâi死穿幼苧布ê祭司八十五人。
22:19 Koh用刀phah祭司ê城—挪伯其中ê男女、gín-á、食奶ê嬰á kah牛、驢、羊，lóng用刀thâi死。
22:20 亞希突ê kiáⁿ亞希米勒有一个kiáⁿ，名叫做亞比亞他，脫離走去tòe大衛。
22:21 亞比亞他kā大衛講：「掃羅有thâi死上主ê祭司。」
22:22 大衛kā亞比亞他講：「Hit日，以東人多益tī hia，我知伊一定ē kā掃羅講。你ê老父全家失落性命，lóng是因為我ê緣故。
22:23 你tio̍h kah我tòa，m̄免驚，因為siàu想我ê性命ê to̍h是siàu想你ê性命；你kah我tòa，ē得tio̍h保全。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。