撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 大衛kah掃羅講話了後，約拿單ê性命kah大衛ê性命生相連，約拿單疼伊親像kakī ê性命。
18:2 Hit日，掃羅kā伊留落來，無hō͘伊tńg去in老父ê厝。
18:3 約拿單kah大衛兩人結約，因為伊疼大衛親像kakī ê性命。
18:4 約拿單thǹg伊身軀ê外衫hō͘大衛，koh kā伊ê軍服，連伊ê刀，伊ê弓，伊ê腰帶，mā lóng hō͘伊。
18:5 見若掃羅差伊去tó位，大衛去做lóng真精通。掃羅to̍h設立伊做戰士ê頭人，人民kah掃羅ê人臣lóng看做是好。
18:6 掃羅嫉妒大衛
大衛phah死hitê腓利士人了後倒tńg來，in tńg來ê時，hiahê chabó͘人tùi以色列ta̍k个城出來，唱歌，跳舞，用lin-long鼓，用歡喜，用奏樂ê器具，來迎接掃羅王。
18:7 Hiahê chabó͘人跳舞，有ê唱，有ê和，講：「掃羅kā inthâi死千千，大衛kā inthâi死萬萬。」
18:8 掃羅不止受氣，無歡喜chitê話，to̍h講：「Kā萬萬hō͘大衛，千千hō͘我，只有chhun國位bē hō͘伊niā-niā。」
18:9 Tùi hit日起，掃羅看tio̍h大衛to̍h kā伊睨（gîn）。
18:10 隔tńg工，tùi上主hia來ê pháiⁿ神大大臨到掃羅，伊to̍hti7厝內講先知話。大衛照常用手彈琴，掃羅手裡有鎗。
18:11 掃羅用鎗cho̍k去，因為講，我beh鑿大衛，kā伊釘tī壁裡。大衛tī伊ê面前閃避兩pái。
18:12 掃羅驚大衛，因為上主kah伊同在，離開掃羅。
18:13 掃羅chiah hō͘大衛離開伊，設立伊做營長，伊tī人民ê面前出入。
18:14 大衛見所做ê tāichì lóng真精通，上主kah伊同在。
18:15 掃羅看tio̍h大衛做ê tāichì lóng真精通，不止驚伊。
18:16 總是，以色列kah偤大ê群眾lóng疼大衛，因為伊tī in面前出入。
18:17 大衛娶掃羅ê Cha-bó͘ kiáⁿ
掃羅kā大衛講：「你看，我beh kā大chabó͘ kiáⁿ Bí-la̍h hō͘你做bó͘，總是，ài你做我ê勇士，替上主交戰。」掃羅心內想講：「我m̄ thang親手害伊，tio̍h借腓利士人ê手害伊。」
18:18 大衛kā掃羅講：「我是啥人，我有啥物身分，我老父ê家tī以色列中是啥物款ê家，我kám thang做王ê kiáⁿ婿？」
18:19 掃羅ê chabó͘ kiáⁿ Bí-la̍h定tio̍h hō͘大衛ê期到à，竟然去hō͘ Bí-hô-la̍h人A-tek-lia̍t做bó͘。
18:20 掃羅ê chabó͘ kiáⁿ米甲疼大衛，有人kā掃羅講，掃羅歡喜chitê tāichì。
18:21 掃羅心內想講：「我kā chitê chabó͘ kiáⁿ hō͘大衛做羅網來kā伊網teh，thang借腓利士人ê手害伊。」掃羅to̍h kā大衛講：「Taⁿ chitê第二pái你thang做我ê kiáⁿ婿。」
18:22 掃羅吩咐人臣講：「Lín偷偷á kā大衛講：『王kah意你，人臣mā疼你，所以，你thang做王ê kiáⁿ婿。』」
18:23 掃羅ê人臣to̍h kā chiahê話講hō͘大衛聽，大衛講：「Lín kám想講做王ê kiáⁿ婿是小khóa tāichì？我是sànchhiah卑微ê人。」
18:24 掃羅ê人臣回覆，講：「大衛講ê，ánne，ánne。」
18:25 掃羅講：「Lín tio̍h對大衛ánne講：『王無ài啥物聘禮，只有ài一百個腓利士人ê陽物ê皮，thang報仇tī王ê對敵。」掃羅ê意思是beh hō͘大衛死tī腓利士人ê手頭。
18:26 掃羅ê人臣kā chiahê話kā大衛講，大衛歡喜beh做王ê kiáⁿ婿。
18:27 日期iáu未到，大衛起來kah tòe伊ê人，出發去，thâi死兩百個腓利士人。大衛帶hiahê陽物ê皮，in to̍h照數額全部獻hō͘王，hō͘伊thang做王ê kiáⁿ婿。就ánne，掃羅kā chabó͘ kiáⁿ米甲hō͘大衛做bó͘。
18:28 掃羅看tio̍h，koh知上主kah大衛同在，而且掃羅ê chabó͘ kiáⁿ米甲mā疼伊。
18:29 掃羅koh khah驚大衛，掃羅tiāⁿ-tiāⁿ 做大衛ê對敵。
18:30 腓利士hiahê首領出來交戰，in ta̍k pái出來，大衛做比掃羅hiahê人臣khah精通。就ánne，伊ê名hō͘人koh khah尊重。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。