撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 Io-ná-than Ióng-kám ê Hêng-ûi
Ū chi̍t ji̍t, Sàu-lô ê kiáⁿ Io-ná-than kā gia̍h i ê kun-khì ê siàu-liân lâng kóng, " Lâi, lán lâi-khì hit pêng, kàu Hui-lī-sū lâng kun-iâⁿ hia. " Chóng-.sī, i bô kā in lāu-pē kóng.
14:2 Sàu-lô tī Gi-be-at ê ke̍k-thâu, chē tī Mik-lông ê sia̍h-liû chhiū kha, tòe i ê chha-put-to ū la̍k pah lâng.
14:3 Koh ū A-hi-top ê kiáⁿ A-hi-iah, tòa chè-si ho̍k, sī Í-ka-phok ê a-hiaⁿ, Hui-ne-hah ê kiáⁿ, E-lī ê sun, to̍h-sī tī Sī-lô chò Siōng-chú ê chè-si ê. Jîn-bîn m̄-chai Io-ná-than ū khì.
14:4 Io-ná-than beh khì Hui-lī-sū ê kun-iâⁿ, só͘ beh kòe hiahê koan-kháu ê tiong-kan, chit pêng ū gê hêng ê kiā piah, hit pêng mā ū gê hêng ê kiā piah, chi̍t-ê miâ kiò Pò-siat, chi̍t-ê miâ kiò Se-nî.
14:5 Chi̍t-ê gê tī pak pêng kah Mik-mah sio-tùi, chi̍t-ê tī lâm pêng kah Ge-bah sio-tùi.
14:6 Io-ná-than kā gia̍h i ê kun-khì ê siàu-liân lâng kóng, " Lâi, lán lâi-khì bô siū kat-lé ê lâng ê kun-iâⁿ hia, kiámchhái Siōng-chú ē thè lán chò tāichì; in-ūi Siōng-chú ê kiù lâng, bô hān-tiāⁿ lâng ê chē-chió. "
14:7 Gia̍h i ê kun-khì ê kā i kóng, " Chiàu lí ê sim só͘ ài ê lóng chiàu ánne kiâⁿ. Thang chìn-chêng khì, góa kah lí tâng-sim, góa beh tòe lí khì. "
14:8 Io-ná-than kóng, " Lán beh keng-kòe hiahê lâng hia, hō͘ in khòaⁿ tio̍h lán.
14:9 In nā ánne kā lán kóng, ' Lín khiā-.leh, thèng-hāu goán kàu lín hia. ' Lán chiū tiāⁿtiāⁿ khiā-.leh, bô chiūⁿ-khì in hia.
14:10 In nā kóng, ' Lín khí-lâi goán chia. ' Lán chiū chiūⁿ-.khì, in-ūi Siōng-chú kā in kau tī lán ê chhiú tiong, chit-ê ōe thang chò lán ê chèng-kì. "
14:11 Nn̄g lâng chiū hō͘ Hui-lī-sū hông-siú ê peng khòaⁿ-.tio̍h, Hui-lī-sū lâng kóng, " Hi-bú-lâi lâng tùi só͘ bih ê tōng chhut-.lâi! "
14:12 Hông-siú ê peng kā Io-ná-than kah gia̍h i ê kun-khì ê lâng kóng, " Lín khí-lâi goán chia, goán ū chi̍t hāng tāichì beh pò lín chai. " Io-ná-than chiū kā gia̍h i ê ke-si-.ê kóng, " Lí tòe góa chiūⁿ-.khì, in-ūi Siōng-chú kā in kau tī I-su-la-el lâng ê chhiú tiong. "
14:13 Io-ná-than chiū chhiú khîⁿ kha lèng peh khí-lih, gia̍h i ê kun-khì ê lâng tòe i khì. Hui-lī-sū lâng tó tī Io-ná-than ê bīn-chêng, gia̍h i ê kun-khì ê lâng mā tòe i ê āu-bīn lâi kā in thâi.
14:14 Io-ná-than kah gia̍h i ê kun-khì ê lâng khí-thâu só͘ thâi ê, chha-put-to jī cha̍p lâng, lóng sī tī pòaⁿ bó͘ hn̂g ê lê-kau.
14:15 Chiū ánne, tī iâⁿ-pâng, tī chhân-iá, tī chèng lâng ê tiong-kan lóng phi̍h-phi̍h chhoah, hông-siú ê peng kah chhiúⁿ-kiap ê peng mā lóng phi̍h-phi̍h chhoah; tē mā iô-tāng, tì-sú phi̍h-phi̍h chhoah kàu-ke̍k.
14:16 Hui-lī-sū lâng Pāi-thè
Tī Biān-iá-mín ê Gi-be-at, Sàu-lô siú-bōng ê peng teh khòaⁿ, khòaⁿ tio̍h Hui-lī-sū ê chèng kun-peng sì-sòaⁿ, sì-kè loān-loān cháu.
14:17 Sàu-lô chiū kā tòe i ê jîn-bîn kóng, " Lín tiám-sǹg, khòaⁿ siáⁿ lâng tùi lán chia chhut-.khì. " In tiám-sǹg liáu, chiū chai Io-ná-than kah gia̍h i ê kun-khì ê lâng bô tī-.leh.
14:18 Sàu-lô kā A-hi-iah kóng, " Lí tio̍h kā Siōng-chú ê iok-kūi tòa-.lâi. " In-ūi hit sî Siōng-chú ê iok-kūi tī I-su-la-el lâng ê só͘-chāi.
14:19 Sàu-lô kah chè-si kóng-ōe ê sî, Hui-lī-sū iâⁿ tiong hán-hoah ê siaⁿ ná lâi ná tōa. Sàu-lô chiū kā chè-si kóng, " Bián tāng lí ê chhiú! "
14:20 Sàu-lô kah tòe i ê jîn-bîn lóng chū-chi̍p, lâi-kàu chiàn-tiûⁿ, khòaⁿ tio̍h Hui-lī-sū lâng ta̍k-ê ēng to hō͘-siong chân-sat, hui-siông tāi-loān.
14:21 Í-chêng óa Hui-lī-sū lâng ê Hi-bú-lâi lâng, tùi sì-hng tòe kàu i ê iâⁿ ê, taⁿ mā tian-tò tńg-lâi pang-chān tòe Sàu-lô kah Io-ná-than ê I-su-la-el lâng.
14:22 Hiahê bih tī E-hu-laim soaⁿ-tē ê I-su-la-el lâng, thiaⁿ tio̍h Hui-lī-sū lâng tô-cháu, in chiū chhut-.lâi, jiok óa-lâi in ê āu-bīn, lâi kau-chiàn.
14:23 Hit ji̍t, Siōng-chú chín-kiù I-su-la-el, it-ti̍t chiàn-kàu Bia̍t-a-biân.
14:24 Chiàn-āu ê Sū-kiāⁿ
Hit ji̍t, I-su-la-el lâng chin khùn-khó͘, in-ūi Sàu-lô ǹg jîn-bîn chiùchōa kóng, " Bô tán kàu ji̍t àm, thèng-hāu góa pò góa ê tùi-te̍k ê oan-siû ê chìn-chêng, chia̍h-mi̍h ê lâng tio̍h siū chiù-chó͘. " Só͘-í, jîn-bîn lóng bô chia̍h siáⁿ-mi̍h.
14:25 Chèng lâng ji̍p-khì chhiū-nâ, khòaⁿ tio̍h ū bi̍t tī tē-chiūⁿ.
14:26 Jîn-bîn ji̍p-khì chhiū-nâ, khòaⁿ tio̍h ū bi̍t teh tih, chóng-.sī, bô lâng káⁿ ēng chhiú the̍h-lâi ji̍p chhùi, in-ūi jîn-bîn kiaⁿ hiahê chiùchōa ê ōe.
14:27 Io-ná-than bô thiaⁿ tio̍h in lāu-pē ǹg jîn-bîn chiùchōa, só͘-í, chhun i chhiú-.ni̍h ê koái-á bóe tuh tī bi̍t-pâng, i ê chhiú oat kàu chhùi-.ni̍h, ba̍k-chiu chiū kim.
14:28 Jîn-bîn tiong-kan ū chi̍t-ê lâng kā i kóng, " Lí ê lāu-pē ǹg jîn-bîn giâm-giâm chiùchōa kóng, ' Kin-á-ji̍t chia̍h siáⁿ-mi̍h ê, tio̍h siū chiù-chó͘. '" Jîn-bîn chiū chin ià-siān.
14:29 Io-ná-than kóng, " Góa ê lāu-pē hāi tio̍h chit-ê só͘-chāi, lín khòaⁿ, góa chhì-thàm chit chi̍t-tiám-á bi̍t, ba̍k-chiu chiū kim.
14:30 Hô-hòng jîn-bîn kin-á-ji̍t nā chhut-chāi ì-sù chia̍h in só͘ chhiúⁿ tùi-te̍k ê mi̍h, phah-sí Hui-lī-sū lâng kám bô koh khah chē? "
14:31 Hit ji̍t, in phah Hui-lī-sū lâng, tùi Mik-mah kàu A-iá-lông, jîn-bîn chin ià-siān.
14:32 Jîn-bîn chiū kóaⁿ-kín chàu khì the̍h só͘ chhiúⁿ ê iûⁿ, gû, gû-á kiáⁿ, thâi tī tē-.ni̍h, bah iáu ū hoeh, chiū the̍h-lâi chia̍h.
14:33 Ū lâng kā Sàu-lô kóng, " Jîn-bîn tek-chōe Siōng-chú à, in-ūi in chia̍h iáu ū hoeh ê bah. " Sàu-lô kóng, " Lín chò m̄ tio̍h à, taⁿ tio̍h kō tōa tè chio̍h-thâu lâi góa chia. "
14:34 Sàu-lô koh kóng, " Lín tio̍h tī jîn-bîn ê tiong-kan sì-kè kiâⁿ, kā in kóng, ' Ta̍k lâng khan in ê gû, ta̍k lâng khan in ê iûⁿ, lâi góa chia, tī chia thâi lâi chia̍h, m̄ thang chia̍h iáu ū hoeh ê bah, lâi tek-chōe Siōng-chú. '" Hit mê, jîn-bîn ta̍k lâng khan in ê gû khì hia thâi.
14:35 Sàu-lô kā Siōng-chú khí chi̍t chō tôaⁿ, che sī i thâu chi̍t pái kā Siōng-chú khí ê tôaⁿ.
14:36 Sàu-lô kóng, " Lán taⁿ tio̍h thàu-mê lo̍h-khì jiok Hui-lī-sū lâng, kā in chhiúⁿ, kàu thiⁿ-kng, bô lâu in chi̍t-ê lâng. " Jîn-bîn ìn kóng, " Lí só͘ khòaⁿ-chò hó ê, chiū chiàu ánne kiâⁿ. " Chè-si kóng, " Lán tio̍h lâi chia, chhin-kīn Siōng-chú. "
14:37 Sàu-lô mn̄g Siōng-chú kóng, " Góa tio̍h lo̍h-khì jiok Hui-lī-sū lâng á m̄-bián? Lí kám ē kā in kau hō͘ I-su-la-el ê chhiú? " Hit ji̍t, Siōng-chú bô kā i ìn.
14:38 Sàu-lô kóng, " Lín jîn-bîn tiong-kan ê sī-tōa lóng tio̍h khí-lâi chia, chhâ-bêng kin-á-ji̍t chit-ê chōe sī chāi tī siáⁿ-mi̍h?
14:39 Góa kí kiù I-su-la-el ê éng-oán oa̍h ê Siōng-chú lâi kóng, sûi-jiân góa ê kiáⁿ Io-ná-than mā tio̍h sí. " Chóng-.sī, jîn-bîn tiong-kan bô kah chi̍t-ê lâng kā i ìn.
14:40 I chiū kā I-su-la-el ê kûn-chiòng kóng, " Lín khiā chit pêng, góa kah góa ê kiáⁿ Io-ná-than khiā hit pêng. " Jîn-bîn tùi Sàu-lô kóng, " Lí khòaⁿ-chò hó ê, chiū chiàu ánne kiâⁿ. "
14:41 Sàu-lô kā Siōng-chú — I-su-la-el ê Siōng-tè kóng, " Kiû Lí chí-sī si̍t-chêng. " Chiū ánne liam tio̍h Io-ná-than kah Sàu-lô, jîn-bîn lóng bô tāichì.
14:42 Sàu-lô kóng, " Tio̍h tī góa kah góa ê kiáⁿ Io-ná-than ê tiong-kan lâi liam-khau. " Chiū liam tio̍h Io-ná-than.
14:43 Sàu-lô kā Io-ná-than kóng, " Lí kā góa kóng lí chò siáⁿ-mi̍h sū. " Io-ná-than kóng, " Góa si̍t-chāi ēng chhiú-.ni̍h ê koái-á bóe ùn chi̍t-tiám-á bi̍t lâi chhì-khòaⁿ māi leh, ánne góa kám tio̍h sí ā? "
14:44 Sàu-lô kóng, " Io-ná-than, lí it-tēng tio̍h sí! Goān Siōng-chú ánne kiâⁿ, mā pí ánne iáu khah tāng. "
14:45 Jîn-bîn kā Sàu-lô kóng, " Io-ná-than í-keng kiâⁿ chit-ê tōa ê chín-kiù tī I-su-la-el ê, i kám tio̍h sí? Choa̍t-tùi m̄ thang. Goán kí éng-oán oa̍h ê Siōng-chú lâi kóng, i chi̍t ki thâu-mn̂g mā it-tēng bô ka-la̍uh tī tē-.ni̍h, in-ūi i kin-á-ji̍t kah Siōng-chú chò-hóe chò tāichì. " Chiū ánne, jîn-bîn kiù Io-ná-than bián sí.
14:46 Sàu-lô chiū chiūⁿ-.khì, bô koh jiok Hui-lī-sū lâng. Hui-lī-sū lâng mā tńg-khì in ê pún só͘-chāi.
14:47 Sàu-lô ê Ông-ūi kah Ka-cho̍k
Sàu-lô chiáng-koán kok ê koân-pèng, tī-lí I-su-la-el, khì kah sì-kho͘-ûi só͘-ū ê tùi-te̍k kau-chiàn, to̍h-sī kong-kek Mô͘-ap lâng, Am-móng lâng, E-tóm kah Cho͘-ba chiahê ông, í-ki̍p Hui-lī-sū lâng. I bô-lūn khì-kàu tó-ūi, lóng khah iâⁿ.
14:48 Sàu-lô hùn-ióng kong-kek A-má-le̍k lâng, kiù I-su-la-el thoat-lī chhiúⁿ in ê lâng ê chhiú.
14:49 Sàu-lô ê kiáⁿ sī Io-ná-than, E-sú-bí, Mal-ki-siu-ah. I nn̄g-ê chabó͘ kiáⁿ ê miâ, tōa ê miâ kiò-chò Bí-la̍h, sè ê miâ kiò-chò Mi-kal.
14:50 Sàu-lô ê bó͘, miâ kiò-chò A-hi-no-ám, sī A-hi-mâ-chu ê chabó͘ kiáⁿ. I ê kun-tiúⁿ, miâ kiò-chò Ap-nel, sī Ne-l ê kiáⁿ, Ne-l sī Sàu-lô ê a-chek.
14:51 Sàu-lô ê lāu-pē Ki-si, Ap-nel ê lāu-pē Ne-l, to̍h-sī A-mí-el ê kiáⁿ.
14:52 Sàu-lô it-seng tiāⁿtiāⁿ kah Hui-lī-sū lâng tōa kau-chiàn, Sàu-lô kiàn-nā khòaⁿ tio̍h ū lêng-le̍k ê lâng á-.sī ióng-sū, chiū chio-chi̍p lâi óa i.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。