撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
13:1 抵抗腓利士人
掃羅tú-á坐位ê時XX歲，做以色列王X2年ê時，（註：XX kah X2：學者認為chit兩 个數字tī希伯來文抄本中受損或遺失，無法度復原；因為原文照字面讀分別只有「一歲」kah「兩年」。），
13:2 伊to̍h為kakī tùi以色列中揀三千人，二千人跟tòe掃羅tī密抹kah伯特利山，一千跟tòe約拿單tī便雅憫ê基比亞；其他ê人，伊差in tńg去ta̍k人ê布棚。
13:3 約拿單phah迦巴腓利士人ê軍營，腓利士人聽tio̍h。掃羅就pûn哨角tī全地，意思是叫希伯來人lóng tio̍h聽。
13:4 以色列人民聽tio̍h掃羅phah腓利士人ê軍營，koh聽tio̍h以色列人hō͘腓利士人討厭，人民to̍h來跟tòe掃羅，聚集tī吉甲。
13:5 腓利士人聚集beh kah以色列人交戰，有車三萬台，馬兵六千，步兵親像海邊ê沙hiah chē，to̍h起來tī伯亞文東pêng ê密抹紮營。
13:6 以色列人看tio̍h kakī 危急，因為人民受窘迫，kakī 就bih tī山洞、樹林、石穴，險要ê所在kah深坑。
13:7 Mā有希伯來人過約旦河來到迦特kah基列地。掃羅iáu koh tī吉甲，人民lóng phi̍h-phi̍h chhoah來跟tòe伊。
13:8 掃羅照撒母耳所定tio̍h ê日期，thèng候七日。撒母耳iáu未來吉甲，人民to̍h離開伊四散去。
13:9 掃羅講：「Kā燒祭kah謝恩祭帶來我chia。」伊to̍h獻燒祭。
13:10 伊獻燒祭tú-á了後，你看，撒母耳到à，掃羅出去kā伊迎接，beh kā伊請安。
13:11 撒母耳講：「你做啥物tāichì？」掃羅講：「因為我看tio̍h人民四散離開我，你mā無照所定tio̍h ê日期到，而且腓利士人已經聚集tī密抹。
13:12 所以，我講：腓利士人ē到吉甲來攻擊我，我koh iáu未求上主施恩，我to̍h勉強獻燒祭。」
13:13 撒母耳對掃羅講：「你做戇事à，因為你無遵守上主—你ê上帝所命令你ê誡命。若是有守，上主to̍h ētī以色列中堅固你ê王位到永遠。
13:14 Taⁿ你ê王位無久長，上主已經chhōe tio̍h合祂ê心意ê一个人，而且上主mā定tio̍h伊來做祂ê子民ê頭，因為你無遵守上主所命令你ê。」
13:15 撒母耳to̍h起來，tùi吉甲上去便雅憫ê基比亞。掃羅點算tòe伊ê人，差不多有六百人。
13:16 掃羅kah伊ê kiáⁿ約拿單，以及tòe in ê人，lóng tòa tī便雅憫ê 迦巴；總是，腓利士人紮營tī密抹。
13:17 有搶劫ê tùi腓利士ê軍營中出來，分做三隊：一隊oat tùi俄弗拉ê路，到書亞ê地去，
13:18 koh一隊oat tùi Pek-hô-lûn ê路去；koh一隊oat tùi Che-pho-im ê山谷對面地界ê路，ǹg曠野去。
13:19 Hit時，以色列全地無一个phah鐵師傅，因為腓利士人講，恐驚希伯來人製造劍kah鎗。
13:20 以色列人ē kā伊ê犁、耙、斧頭kah鋤頭磨利，ta̍k人tio̍h落去腓利士人hia。
13:21 若beh鑢（lè）鋤頭、犁、三齒ê叉、斧頭kah趕牛ê鐵刺，tio̍h一pim ê工錢。
13:22 所以，到交戰ê日，tòe掃羅kah約拿單ê人無kah一个人手裡有劍有鎗ê，kantaⁿ掃羅kah伊ê kiáⁿ約拿單有。
13:23 腓利士防守ê兵出去到密抹ê關口。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。