撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Sa-mu-el Lī-khui Chêng ê Khó͘-khǹg
Sa-mu-el kā I-su-la-el jîn-bîn kóng, " Kiàn-nā lín tùi góa só͘ kóng ê ōe, góa lóng ū thiaⁿ-.tio̍h, siat-li̍p chi̍t-ê ông lâi koán lín.
12:2 Lí khòaⁿ, taⁿ ū chi̍t-ê ông kiâⁿ tī lín ê bīn-chêng. Góa í-keng lāu ā, thâu-mn̂g mā pe̍h, góa ê kiáⁿ lóng tī lín chia. Góa tùi siàu-liân kàu taⁿ, lóng kiâⁿ tī lín ê bīn-chêng.
12:3 Góa tī chia, lín tio̍h tī Siōng-chú ê bīn-chêng kah I só͘ boah iû-.ê ê bīn-chêng, kā góa chò kiàn-chèng. Góa ū khan siáⁿ lâng ê gû? Khan siáⁿ lâng ê lî-á? Khi-hū siáⁿ lâng? Ap-chè siáⁿ lâng? Tùi siáⁿ lâng ê chhiú chiap-siū lâng ê o͘-se, tì-sú cha̍h góa ê ba̍k-chiu? Nā ū, góa ē hêng lín. "
12:4 Bîn-chiòng kóng, " Lí m̄ bat khi-hū goán, m̄ bat ap-chè goán, mā m̄ bat tùi lâng ê chhiú the̍h siáⁿ-mi̍h mi̍h. "
12:5 Sa-mu-el kā in kóng, " Lín tī góa ê chhiú bô chhōe tio̍h siáⁿ-mi̍h mi̍h, kin-á-ji̍t Siōng-chú tùi lín chò kiàn-chèng, I só͘ boah iû ê, mā chò kiàn-chèng. " In kóng, " Goān I chò kiàn-chèng. "
12:6 Sa-mu-el kā jîn-bîn kóng, " Chá-chêng siat-li̍p Mô͘-se kah A-lông ê, chhōa lín ê chó͘-sian chhut Ai-gi̍p ê sī Siōng-chú.
12:7 Taⁿ lín tio̍h khiā-.leh, góa beh tī Siōng-chú ê bīn-chêng kah lín piān-lūn Siōng-chú tùi lín kah lín ê chó͘-sian só͘ kiâⁿ it-chhè kong-gī ê tāichì.
12:8 Chá-chêng Iâ-kop lâi-kàu Ai-gi̍p, lín ê chó͘-sian mā ū kiû-kiò Siōng-chú, hit sî, Siōng-chú chiū chhe Mô͘-se kah A-lông chhōa lín ê chó͘-sian chhut Ai-gi̍p, hō͘ in tòa tī chit-ê só͘-chāi.
12:9 Chóng-.sī, in bē kì-tit Siōng-chú — in ê Siōng-tè, I chiū kā in bē hō͘ Ha-cho͘l ê kun-tiúⁿ Si-se-la̍h ê chhiú, kah Hui-lī-sū lâng ê chhiú, kah Mô͘-ap ông ê chhiú, it-ti̍t kàu hiahê lâng lâi kā in kong-kek.
12:10 In kiû-kiò Siōng-chú kóng, ' Goán ū chōe à, in-ūi goán ū lī-khui Siōng-chú, khì ho̍k-sāi Ba-al kah A-si-tha-lot. Taⁿ kiû Lí kiù goán thoat-lī goán tùi-te̍k ê chhiú, goán beh ho̍k-sāi Lí. '
12:11 Siōng-chú chiū chhe Ia-lu-ba-al, Be-tàn, I-é-hú-thah kah Sa-mu-el, lâi kiù lín thoat-lī sì-kho͘-ûi tùi-te̍k ê chhiú, lín chiah pêng-an tòa lo̍h-.khì.
12:12 Lín khòaⁿ tio̍h Am-móng lâng ê ông Na-ha-si lâi kā lín kong-kek, chiū tùi góa kóng, ' M̄-lah, goán tiāⁿ tio̍h beh chi̍t-ê ông lâi koán-lí goán. ' Kî-si̍t Siōng-chú — lín ê Siōng-tè to̍h sī lín ê ông.
12:13 Taⁿ khòaⁿ lín só͘ kéng só͘ kiû ê ông tī chia, lí khòaⁿ, Siōng-chú í-keng siat-li̍p ông lâi koán lín.
12:14 Lín nā kèng-ùi Siōng-chú, ho̍k-sāi I, thiaⁿ I ê ōe, bô ûi-pōe Siōng-chú ê bēng-lēng, lín kah kā lín koán-hat ê ông mā sūn-ho̍k Siōng-chú — lín ê Siōng-tè chiū hó.
12:15 Siat-sú lín m̄ chun-thàn Siōng-chú ê ōe, ûi-pōe Siōng-chú ê bēng-lēng, Siōng-chú ê chhiú chiū ē kā lín kong-kek, chhin-chhiūⁿ chá-chêng kong-kek lín ê chó͘-sian ánne.
12:16 Taⁿ lín tio̍h khiā-.leh, lâi khòaⁿ Siōng-chú tī lín ê ba̍k-chiu chêng só͘ beh kiâⁿ ê tōa sū.
12:17 Kin-á-ji̍t kám m̄-sī koah sió-be̍h ê sî? Góa kiû Siōng-chú, I ē khí lûi lo̍h hō͘, hō͘ lín mā chai mā khòaⁿ-chhut, lín ūi kakī kiû siat-li̍p ông ê tāichì, tī Siōng-chú ê bīn-chêng só͘ hoān ê chōe sī chin tōa. "
12:18 Chiū ánne, Sa-mu-el kiû-kiò Siōng-chú, Siōng-chú chiū tī chit ji̍t khí lûi lo̍h hō͘, chèng lâng chiū chin kiaⁿ Siōng-chú kah Sa-mu-el.
12:19 Jîn-bîn kā Sa-mu-el kóng, " Kiû lí thè lí chiahê lô͘-po̍k kiû Siōng-chú — lí ê Siōng-tè, bián-tit goán sí-bông, in-ūi goán ūi kakī kiû chi̍t-ê ông, chin-chiàⁿ sī tī chōe ê téng-bīn ke-thiⁿ chōe. "
12:20 Sa-mu-el kā jîn-bîn kóng, " M̄-bián kiaⁿ, lín sûi-jiân kiâⁿ chit-ê pháiⁿ, chóng-.sī, m̄ thang phian-lī bô tòe Siōng-chú, to̍k-to̍k tio̍h chīn-sim ho̍k-sāi Siōng-chú.
12:21 M̄-thang phian-lī, in-ūi phian-lī to̍h-sī chun-thàn hi-ké ê mi̍h, bô lī-ek, mā bô chín-kiù ê, in-ūi in sī hi-ké.
12:22 Siōng-chú ūi tio̍h kakī ê tōa miâ, it-tēng bô khì-sak I ê chú-bîn, in-ūi Siōng-chú hoaⁿ-hí kā lín tòng-chò I ê chú-bîn.
12:23 Kóng-kàu góa thè lín kî-tó, choa̍t-tùi bô thêng-soah, tì-sú tek-chōe Siōng-chú, góa ē ēng hó koh chèng-ti̍t ê lō͘ kā lín chí-sī.
12:24 To̍k-to̍k lín tio̍h kèng-ùi Siōng-chú, sêng-sim si̍t-ì ho̍k-sāi I, in-ūi lín tio̍h ē kì-tit I ūi lín só͘ chò ê tāichì ū gōa tōa.
12:25 Lín nā iû-goân chò pháiⁿ, lín kah lín ê ông ē chò chi̍t-ē bia̍t-bông. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。