撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 Sàu-lô Tú tio̍h Sa-mu-el
Ū chi̍t-ê Biān-iá-mín lâng, miâ kiò-chò Ki-si, sī Biān-iá-mín lâng A-húi-a ê goân-sun, Pí-ko-la̍h ê kan-á-sun, Sián-lô ê sun, A-mí-el ê kiáⁿ, sī chi̍t-ê ū tōa khùi-la̍t ê ióng-sū.
9:2 I ū chi̍t-ê kiáⁿ, miâ kiò-chò Sàu-lô, ióng-chòng koh hó khòaⁿ thâu, tī I-su-la-el tiong bô chi̍t-ê lâng ē pí-tit i ê hó khòaⁿ thâu; seng-khu pí kûn-chiòng khah koân chi̍t lia̍p thâu-khak.
9:3 Sàu-lô ê lāu-pē Ki-si phah-m̄-kiàn kúi-nā chiah lô͘-bú, Ki-si kā i ê kiáⁿ Sàu-lô kóng, " Lí chhōa chi̍t-ê lô͘-po̍k chhut-hoat khì chhōe lî-bó. "
9:4 I chiū keng-kòe E-hu-laim soaⁿ-tē kah Sa-lī-sa ê tē, lóng chhōe bô; koh keng-kòe Sa-lîm ê tē, mā bô tī hia; koh keng-kòe Biān-iá-mín ê tē, mā chhōe bô.
9:5 Kàu So͘-hut ê tē, Sàu-lô kā kin-tòe i ê lô͘-po̍k kóng, " Lâi, lán tńg lâi-.khì, khióng-kiaⁿ góa ê lāu-pē bô chhau-hoân lî-á, tian-tò lâi hoân-ló lán. "
9:6 Lô͘-po̍k kóng, " Lí khòaⁿ, chit-ê siâⁿ-.ni̍h ū chi̍t-ê Siōng-tè ê lô͘-po̍k, sī lâng só͘ chun-tiōng ê, kiàn-nā i só͘ kóng ê lóng it-tēng èng-giām. Lán put-jû khì i hia, kiámchhái i ē chí-sī lán só͘ tio̍h kiâⁿ ê lō͘. "
9:7 Sàu-lô kā lô͘-po̍k kóng, " Lán nā khì, ū siáⁿ-mi̍h thang sàng hit-ê lâng? In-ūi lán tē-á lāi ê chia̍h-mi̍h lóng chia̍h-liáu à, mā bô lé-mi̍h thang sàng hit-ê Siōng-tè ê lô͘-po̍k, lán sin piⁿ iáu ū siáⁿ-mi̍h mi̍h bô? "
9:8 Lô͘-po̍k koh ìn Sàu-lô kóng, " Góa chhiú-.ni̍h ū gîn chi̍t si-khel ê sì-hūn chi-it, góa kā chit-ê lâi sàng hit-ê Siōng-tè ê lô͘-po̍k, chhiáⁿ i chí-sī lán só͘ tio̍h kiâⁿ ê lō͘. "
9:9 Chá-chêng I-su-la-el tiong, nā ū lâng khì mn̄g Siōng-tè, chiū kóng, " Lán lâi-khì kìⁿ sian-kiàn! （ In-ūi hiān-kim chheng " Sian-ti ", í-chêng chheng " Sian-kiàn ". )
9:10 Sàu-lô kā lô͘-po̍k kóng, " Lí só͘ kóng ê ōe chin hó, lâi, lán lâi-.khì! " In chiū khì Siōng-tè ê lô͘-po̍k só͘ tòa ê siâⁿ.
9:11 In chiūⁿ soaⁿ-phiâⁿ beh ji̍p-khì siâⁿ lāi ê sî, tú tio̍h kúi-nā-ê siàu-liân ê chabó͘ gín'á chhut-lâi chhiūⁿ chúi, mn̄g in kóng, " Sian-kiàn ū tī chia bô? "
9:12 Cha-bó͘ gín'á ìn kóng, " Sī à, tī chia. Lí khòaⁿ, i tī lí ê thâu-chêng. Kóaⁿ-kín khì! I kin-á-ji̍t tú-á kàu siâⁿ, in-ūi kin-á-ji̍t jîn-bîn tī soaⁿ-thâu tôaⁿ hiàn chè.
9:13 Tī i iáu-bōe chiūⁿ-khì soaⁿ-thâu tôaⁿ beh chia̍h-toh ê chìn-chêng, lín chi̍t ē ji̍p siâⁿ chiū ē tú tio̍h i; in-ūi i nā iáu-bōe kàu, jîn-bîn bô tāi-seng chia̍h, it-tēng thèng-hāu i lâi seng chiok-hok chè-mi̍h, jiân-āu só͘ chhiáⁿ ê lâng-kheh chiah chia̍h. Taⁿ lín kín khì, chit sî ē tú tio̍h i. "
9:14 Nn̄g lâng chiū chiūⁿ siâⁿ; ji̍p siâⁿ liáu-āu, Sa-mu-el chhut-.lâi, beh chiūⁿ koân ê só͘-chāi, chiū tú tio̍h in.
9:15 Sàu-lô iáu-bōe kàu ê chêng chi̍t ji̍t, Siōng-chú í-keng khé-sī Sa-mu-el, kóng,
9:16 " Bîn-á-chài chit sî, Góa ē chhe chi̍t-ê lâng tùi Biān-iá-mín tē lâi-kàu lí chia, lí tio̍h kā i boah iû chò Góa ê chú-bîn — I-su-la-el lâng ê thâu. I ē kiù Góa ê chú-bîn thoat-lī Hui-lī-sū lâng ê chhiú; in-ūi Góa ê chú-bîn ai-kiû ê siaⁿ ū thàu kàu Góa chia, Góa beh khòaⁿ-kò͘ in. "
9:17 Sa-mu-el khòaⁿ tio̍h Sàu-lô ê sî, Siōng-chú kā i kóng, " Lí khòaⁿ, chit-ê lâng to̍h-sī Góa só͘ kā lí kóng ê, i beh lâi koán-lí Góa ê chú-bîn. "
9:18 Sàu-lô tī siâⁿ mn̂g-.ni̍h óa-kīn Sa-mu-el, kóng, " Chhiáⁿ kā góa kóng, sian-kiàn ê chhù tī tó-ūi? "
9:19 Sa-mu-el ìn Sàu-lô kóng, " Góa to̍h-sī sian-kiàn, lí tī góa ê thâu-chêng chiūⁿ-khì koân ê só͘-chāi, in-ūi lín kin-á-ji̍t beh kah góa chò-hóe chia̍h; bîn-á chá-khí góa beh hō͘ lí khì, lí sim-lāi ê tāichì lóng ē kā lí kóng.
9:20 Lí saⁿ ji̍t chêng phah-m̄-kiàn hiahê lî-bó, lí m̄-bián khòa-ì, í-keng chhōe-.tio̍h à. I-su-la-el jîn-bîn só͘ him-bō͘ ê ē kui siáⁿ lâng? Kám m̄-sī ē kui lí kah lí ê lāu-pē ê ke? "
9:21 Sàu-lô ìn kóng, " Góa kám m̄-sī Biān-iá-mín lâng, I-su-la-el chi-cho̍k tiong ke̍k sió-khóa ê? Biān-iá-mín chi-cho̍k chiahê ke ê tiong-kan, góa ê ke kám m̄-sī ke̍k bî-sè? Lí ná ē tùi góa kóng chit khoán ōe? "
9:22 Sa-mu-el chhōa Sàu-lô kah kin-tòe i ê lâng ji̍p-khì kheh-thiaⁿ, hō͘ in tī só͘ chhiáⁿ ê lâng ê tiong-kan chē tōa-ūi; só͘ chhiáⁿ ê chha-put-to ū saⁿ-cha̍p lâng.
9:23 Sa-mu-el kā tû-pâng kóng, " Góa só͘ kau-tài lí tio̍h siu-.leh hit hūn, taⁿ thang phâng chhut-.lâi. "
9:24 Tû-pâng chiū phâng hit tè siu khí-lâi khǹg ê thúi bah, hē tī Sàu-lô ê bīn-chêng. Sa-mu-el kóng, " Lí khòaⁿ, chit-ê só͘ lâu beh hō͘ lí chia̍h ê, lí tio̍h the̍h khí-lâi chia̍h. In-ūi góa chhiáⁿ jîn-bîn ê sî, thiâu-kang kā lí lâu-.leh kàu tiāⁿ tio̍h ê ji̍t. " Hit ji̍t, Sàu-lô chiū kah Sa-mu-el chò-hóe chia̍h.
9:25 In tùi koân ê só͘-chāi lo̍h-lâi ji̍p-khì siâⁿ lāi, Sa-mu-el kah Sàu-lô tī chhù téng kóng-ōe.
9:26 Sa-mu-el kā Sàu-lô Boah-iû Siat-li̍p I Chò Ông
In chá-chá khí-.lâi, phah-phú-kng ê sî, Sa-mu-el tī chhù téng kiò Sàu-lô, kóng, " Khí-.lâi, góa beh sàng lí tńg-.khì. " Sàu-lô chiū khí-.lâi, i kah Sa-mu-el nn̄g lâng chhut-khì gōa-bīn.
9:27 In lo̍h-khì kàu siâⁿ ê kak-thâu, Sa-mu-el kā Sàu-lô kóng, " Tio̍h hoan-hù lô͘-po̍k tāi-seng lán khì. "（ lô͘-po̍k chiū khì ）, koh kóng, " Lí chhiáⁿ khiā-.leh, góa beh hō͘ lí thiaⁿ Siōng-tè ê ōe. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。