撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 基列耶琳人來，帶上主ê約櫃上去，到tī山頂亞比拿達ê厝，kā伊ê kiáⁿ以利亞撒分別做聖，來顧守上主ê約櫃。
7:2 約櫃tī基列耶琳ê日子真久，經過二十年，以色列全家追念上主。
7:3 撒母耳統治以色列
撒母耳kā以色列全家講：「Lín若一心歸順上主，to̍h tio̍h tùi lín中間除去外邦ê神明kah亞斯她錄，堅心歸向上主，kantaⁿ服事祂，祂ē救lín脫離腓利士人ê手。」
7:4 以色列人to̍h除去chiahê巴力kah亞斯她錄，kantaⁿ服事上主。
7:5 撒母耳講：「Τio̍h tī米斯巴聚集以色列人民，我ē替lín對上主祈禱。」
7:6 Into̍h聚集tī米斯巴，chhiūⁿ水來piàⁿ tī上主ê面前，tī hit日禁食，tī hia講：「阮有得罪上主。」撒母耳to̍h tī米斯巴做士師，來拯救以色列人。
7:7 腓利士人聽tio̍h以色列人聚集tī米斯巴，腓利士ê首領to̍h起來beh攻擊以色列人，以色列人聽tio̍h就驚腓利士人。
7:8 以色列人kā撒母耳講：「願你替阮求叫上主—咱ê上帝無soah，求祂救咱脫離腓利士人ê手。」
7:9 撒母耳to̍h用一隻食奶ê羊á，燒kui隻來獻hō͘上主做燒祭，撒母耳替以色列人求叫上主，上主有應伊。
7:10 撒母耳teh獻燒祭ê時，腓利士人進前來，beh kah以色列人交戰。Τī hit日，上主起大聲ê雷來攻擊腓利士人，kā in phah亂，in to̍hti7以色列人ê面前thâi輸。
7:11 以色列人tùi米斯巴出來，jiok腓利士人，kā in phah，一直到Pek-kah ê下面。
7:12 撒母耳用一塊石頭khiā tī米斯巴kah E-sia-nah ê中間，kā伊ê名叫做E-bian-ne-chel，講：「到chit時，上主幫贊咱。」
7:13 Tùi chit時起，腓利士人to̍h屈服，m̄敢koh入來以色列人ê境內。撒母耳一生ê日子中間，上主ê手攻擊腓利士人。
7:14 腓利士人所有征服以色列人ê城，tùi以革倫到迦特，lóng還以色列人。In hiahê境界，以色列人mā tùi腓利士人ê手收倒tńg來。Hit時，以色列人kah亞摩利人和好。
7:15 撒母耳一生做以色列ê士師。
7:16 伊ta̍k年巡視伯特利、吉甲、米斯巴chiahê所在，處理以色列人中間ê問題。
7:17 然後，伊倒tńg去到拉瑪，因為伊ê家tī hia，mā tī hia處理以色列人中間ê問題，mā tī hia kā上主起一座壇。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。