路得記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Lù-thuh tī Bô-oh-chuh ê Chhân-.ni̍h Khioh Be̍h-sūi
Na-o-mih ū chi̍t-ê i ê tiōng-hu ê chhin-lâng, to̍h-sī E-li-me-le̍k ê chhin-cho̍k, i ê miâ kiò-chò Bô-oh-chuh, sī chi̍t-ê tōa hó-gia̍h ê lâng.
2:2 Mô͘-ap ê chabó͘ kiáⁿ Lù-thuh kā Na-o-mih kóng, " Hō͘ góa khì hn̂g-.ni̍h, góa nā tī siáⁿ lâng ê bīn-chêng tit tio̍h un-tián, chiū thang tī hit-ê lâng ê āu-bīn khioh be̍h-sap. " I ê ta-ke kā i kóng, " Góa ê chabó͘ kiáⁿ, chò lí khì. "
2:3 I chiū khì, kàu-ūi liáu-āu, chiū tòe koah be̍h ê lâng tī hn̂g-.ni̍h khioh be̍h-sap. I chiok tú-hó lâi-kàu E-li-me-le̍k ê chhin-cho̍k Bô-oh-chuh ê chi̍t khu hn̂g.
2:4 Bô-oh-chuh tùi Bia̍t-lé-hèm lâi, tùi koah be̍h ê lâng kóng, " Goān Siōng-chú kah lín tông-chāi. " In ìn kóng, " Goān Siōng-chú kā lí sù-hok. "
2:5 Bô-oh-chuh mn̄g i só͘ phài koah be̍h ê thâu-lâng kóng, " Hitê sī siáⁿ lâng ê chabó͘ kiáⁿ? "
2:6 Koah-be̍h ê thâu-lâng ìn kóng, " Chit-ê sī Mô͘-ap ê chabó͘ kiáⁿ kah Na-o-mih tùi Mô͘-ap tē tńg-.lâi ê.
2:7 I kóng, ' Chhiáⁿ lí chún góa khioh be̍h-sap, tī koah be̍h ê ê āu-bīn, tī be̍h-khún tiong lâi khioh. ' Só͘-í, i chiū lâi, tùi chá-khí kàu taⁿ, tiāⁿtiāⁿ tòa chia teh khioh, kantaⁿ tī chhù lāi hioh chi̍t-sî-á. "
2:8 Bô-oh-chuh kā Lù-thuh kóng, " Góa ê chabó͘ kiáⁿ, lí tio̍h thiaⁿ, m̄ thang khì pa̍t khu hn̂g khioh be̍h-sap, mā m̄ thang lī-khui chia, tio̍h ánne kah góa chiahê lú-pī chò-tīn.
2:9 Lí tio̍h khòaⁿ in tī tó chi̍t khu teh siu-koah, chiū tòe in khì. Góa í-keng hoan-hù hiahê siàu-liân lâng m̄ thang bong tio̍h lí. Lí nā chhùi-ta, chiū khì hiahê té chúi ê khì-kū hia, lim siàu-liân lâng só͘ chhiūⁿ ê chúi. "
2:10 I chiū phak tī thô͘-kha kā i pài, kā i kóng, " Góa sī gōa-kok lâng, ná ē-tàng tī lí ê bīn-chêng tit tio̍h un-tián, lí ná ē ánne teh kā góa khòaⁿ-kò͘? "
2:11 Bô-oh-chuh ìn kóng, " Tùi lí ê tiōng-hu sí liáu-āu, kiàn-nā lí hó khoán-thāi lí ê ta-ke ê tāichì, í-ki̍p lí lī-khui pē-bú kah lí chhut-sì ê só͘-chāi, lâi-kàu lí pêng-sî m̄ bat ê jîn-bîn chia ê tāichì, lâng lóng ū kā góa kóng bêng à.
2:12 Goān Siōng-chú pò-tap lí ê só͘ chò. Lí lâi hioh tī Siōng-chú — I-su-la-el Siōng-tè ê si̍t-ē, goān lí tit tio̍h I ê tōa siúⁿ-sù. "
2:13 I kóng, " Góa ê chú, goān góa tī lí ê bīn-chêng tit tio̍h un-tián. Góa sûi-jiân bē pí-tit lí ê lú-pī tiong ê chi̍t-ê, lí iáu koh an-ùi góa, tùi lí ê lú-pī kóng hó ōe. "
2:14 Chia̍h tàu ê sî, Bô-oh-chuh kā i kóng, " Lí lâi chia chia̍h piáⁿ, koh ēng lí hit tè piáⁿ lâi ùn chhò͘. " I chiū chē tī koah be̍h ê lâng ê piⁿ-a, i the̍h hang hó ê be̍h-sūi hō͘ i. I chia̍h pá, iáu ū chhun. I chiū khí-lâi khì khioh be̍h-sap.
2:15 Bô-oh-chuh hoan-hù siàu-liân lâng kóng, " I nā tī kui khún ê tiong-kan khioh be̍h-sap, mā tio̍h iông-ín i, m̄ thang hō͘ i kiàn-siàu;
2:16 mā tio̍h tùi kui khún ê thiu tām-po̍h, pàng tī tē-.ni̍h hō͘ i khioh, m̄ thang kā i hoah. "
2:17 Lù-thuh chiū ánne, tī hn̂g-.ni̍h khioh be̍h-sap; kàu ê-hng ê sî, chiū phah i só͘ khioh ê be̍h-sap, chha-put-to ū chi̍t e-hoat ê tōa-be̍h.
2:18 I tòa i só͘ khioh ê ji̍p siâⁿ, hō͘ i ê ta-ke khòaⁿ, mā kā i chia̍h pá só͘ chhun lo̍h-.lâi ê the̍h chhut-lâi hō͘ ta-ke chia̍h.
2:19 Ta-ke mn̄g i kóng, " Lí kin-á-ji̍t tī tó-ūi khioh be̍h-sap? Tī tó-ūi chò-kang? Goān hit-ê khòaⁿ-kò͘ lí ê tit tio̍h hok-khì. " I chiū kā ta-ke kóng i tī tó-ūi chò-kang, kóng, " Kin-á-ji̍t, góa tī hia chò-kang, hit-ê lâng ê miâ kiò-chò Bô-oh-chuh. "
2:20 Na-o-mih kā i ê sim-pū kóng, " Goān i tit tio̍h Siōng-chú sù-hok, to̍h-sī si un hō͘ oa̍h-lâng kah sí-lâng bô soah ê. " Na-o-mih koh kóng, " Hitê lâng sī lán ê chhin-lâng, sī lán chhin-cho̍k ê chi̍t-ê, thang sio̍k-hôe lán ê sán-gia̍p. "
2:21 Mô͘-ap ê chabó͘ kiáⁿ Lù-thuh kóng, " I mā ū kā góa kóng, ' Lí tio̍h kin-tòe góa hiahê siàu-liân lâng, it-ti̍t kàu in siu-koah hó-sè. '"
2:22 Na-o-mih kā i ê sim-pū Lù-thuh kóng, " Góa ê chabó͘ kiáⁿ, lí kah i ê lú-pī chhut-.khì, ánne sī hó; lí bô hō͘ lâng khòaⁿ tio̍h lí tī pa̍t lâng ê hn̂g teh khioh be̍h-sap. "
2:23 Chiū ánne, i kah Bô-oh-chuh ê lú-pī chò-hóe khioh be̍h-sap, it-ti̍t kàu tōa-be̍h, sió-be̍h lóng siu-sêng liáu-āu. I iû-goân kah ta-ke chò-hóe tòa.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。