路得記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 路得tī波阿斯ê田裡拾麥穗
拿俄米有一个她ê丈夫ê親人，to̍h是以利米勒ê親族，伊ê名叫做波阿斯，是一个大好額ê人。
2:2 摩押ê chabó͘ kiáⁿ路得kā拿俄米講：「Hō͘我去園裡，我若tī啥人ê面前得tio̍h恩典，to̍h thang tī hitê人ê後面拾麥屑(sap)。」她ê ta-ke kā她講：「我ê chabó͘ kiáⁿ，做你去。」
2:3 她to̍h去，到位了後，就tòe割麥ê人tī園裡拾麥屑。她chiok tú好來到以利米勒ê親族波阿斯ê一坵園。
2:4 波阿斯tùi伯利恆來，對割麥ê人講：「願上主kah lín同在。」In應講：「願上主kā你賜福。」
2:5 波阿斯問伊所派割麥ê頭人講：「Hitê是啥人ê chabó͘ kiáⁿ？」
2:6 割麥ê頭人應講：「Chitê是摩押ê chabó͘ kiáⁿ，kah拿俄米tùi摩押地tńg來ê。
2:7 她講：『請你准我拾麥屑，tī割麥ê ê後面，tī麥捆中來拾。』所以，她to̍h來，tùi早起到taⁿ，tiāⁿ-tiāⁿ tòa chia teh拾，kantaⁿ tī厝內歇一時á。」
2:8 波阿斯kā路得講：「我ê chabó͘ kiáⁿ，你tio̍h聽，m̄ thang去別坵園拾麥屑，mā m̄ thang離開chia，tio̍h ánne kah我chiahê女婢做陣。
2:9 你tio̍h看in tī tó一坵teh收割，就tòe in去。我已經吩咐hiahê少年人m̄ thang摸tio̍h你。你若嘴乾，to̍h去hiahê貯水ê器具hia，lim少年人所chhiūⁿ ê水。」
2:10 她to̍h仆tī土腳kā伊拜，kā伊講：「我是外國人，ná ē tàng tī你ê面前得tio̍h恩典，你ná ē ánne teh kā我看顧？」
2:11 波阿斯應講：「Tùi你ê丈夫死了後，見若你好款待你ê ta-ke ê tāichì，以及你離開父母kah你出世ê所在，來到你平時m̄ bat ê人民chia ê tāichì，人lóng有kā我講明à。
2:12 願上主報答你ê所做。你來歇tī上主—以色列上帝ê翼下，願你得tio̍h祂ê大賞賜。」
2:13 她講：「我ê主，願我tī你ê面前得tio̍h恩典。我雖然bē比得你ê女婢中ê一个，你iáu koh安慰我，對你ê女婢講好話。」
2:14 食晝ê時，波阿斯kā她講：「你來chia食餅，koh用你hit塊餅來ùn醋。」她to̍h坐tī割麥ê人ê邊a，伊the̍h烘好ê麥穗hō͘她。她食飽，iáu有chhun。她to̍h起來去拾麥屑。
2:15 波阿斯吩咐少年人講：「她若tī kui捆ê中間拾麥屑，mā tio̍h容允她，m̄ thang hō͘她見笑；
2:16 mā tio̍h tùi kui綑ê抽淡薄，放tī地裡hō͘她拾，m̄ thang kā她hoah。」
2:17 路得就ánne，tī園裡拾麥屑；到ê-hng ê時，就phah她所拾ê麥屑，差不多有一伊法ê大麥。
2:18 她帶她所拾ê入城，hō͘她ê ta-ke看，mā kā她食飽所chhun落來ê the̍h出來hō͘ ta-ke食。
2:19 Ta-ke問她講：「你今á日tī tó位拾麥屑？Tī tó位做工？願hitê看顧你ê得tio̍h福氣。」她to̍h kā ta-ke講她tī tó位做工，講：「今á日，我tī hia做工，hitê人ê名叫做波阿斯。」
2:20 拿俄米kā她ê新婦講：「願伊得tio̍h上主賜福，to̍h是施恩hō͘活人kah死人無soah ·ê。」拿俄米koh講：「Hitê人是咱ê親人，是咱親族ê一个，thang贖回咱ê產業。」
2:21 摩押ê chabó͘ kiáⁿ路得講：「伊mā有kā我講：『你tio̍h跟tòe我hiahê少年人，一直到in收割好勢。』」
2:22 拿俄米kā伊ê新婦路得講：「我ê chabó͘ kiáⁿ，你kah伊ê女婢出去，ánne是好；你無hō͘人看tio̍h你tī別人ê園teh拾麥屑。」
2:23 就ánne，她kah波阿斯ê女婢做伙拾麥屑，一直到大麥、小麥lóng收成了後。她猶原kah ta-ke做伙tòa。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。