士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 為便雅憫支族ê人Chhōe Bó͘
以色列人tī米斯巴bat chiùchōa講：「阮中間無kah一个人ē kā chabó͘ kiáⁿ嫁hō͘便雅憫人。」
21:2 人民來到伯特利，tī hia坐tī上主ê面前到ê-hng，出聲大啼哭，講：
21:3 「上主—以色列ê上帝ah，今á日，tī以色列中減一支族，以色列中ná ē有chit款tāichì？」
21:4 隔tńg工天光早起，人民起來，tī hia起一座壇，獻燒祭kah平安祭。
21:5 以色列人講：「Tī以色列眾支族中，啥人無kah會眾去上主hia？」因為in大chiùchōa講：「見若無上米斯巴到上主ê面前ê，tio̍h hō͘伊死。」
21:6 以色列人為tio̍h in ê兄弟便雅憫人後悔，講：「今á日，以色列中斷絕一支族à。
21:7 咱已經kí上主來chiùchōa，無beh kā chabó͘ kiáⁿ嫁hō͘ in，taⁿ就in所chhun落來ê人，咱beh tùi tó位hō͘ in有bó͘？」
21:8 Koh講：「以色列chiahê支族中，tó一个無上米斯巴到上主hia？In就查出基列雅比無kah一个人來到營內會眾hia，
21:9 因為點算人民ê時，hiahê tòa tī基列雅比ê人，無kah一个tī hia。
21:10 會眾to̍h差一萬二千個有大力ê勇士，kā in吩咐講：「Lín去用刀thâi死tòa tī基列雅比ê人，以及chabó͘人kah gín-á。
21:11 Lín所tio̍h行ê to̍h是ánne：Tio̍h kā所有ê chapo͘人，以及hiahê bat kah chapo͘人同房ê chabó͘人，全部thâi死。」
21:12 In tī基列雅比人ê中間tú tio̍h四百ê iáu未kah chapo͘人同房ê在室女，to̍h kā in chhōa來到迦南地示羅ê軍營。
21:13 全會眾差人kā臨門石磐ê便雅憫人講，用和平ê話報in。
21:14 Hit時，便雅憫人tńg來，以色列人to̍h kā所留hō͘她活ê基列雅比ê chabó͘ gín-á嫁hō͘ in，iáu koh無夠額。
21:15 人民為tio̍h便雅憫人to̍h後悔，因為上主hō͘以色列支族khih一角。
21:16 會中ê長老講：「便雅憫中間ê chabó͘人已經剿滅，taⁿ就in所chhun落來ê人，咱beh tùi tó位來hō͘ in有bó͘？」
21:17 Koh講：「便雅憫逃走ê人猶原tio̍h有業hō͘ in，免得以色列中斷絕一支族。
21:18 總是，咱bē tàng kā kakī ê chabó͘ gín-á hō͘ in做bó͘，因為以色列人bat chiùchōa講，kā chabó͘ kiáⁿ嫁hō͘便雅憫人ê，tio̍h受咒詛。」
21:19 In koh講：「Tī Lī-pho-ná ê南pêng，伯特利ê北pêng，to̍h是tùi伯特利去示劍大路東pêng ê示羅，ta̍k年有上主ê節期。」
21:20 to̍h吩咐便雅憫人講：「Lín tio̍h去bih tī葡萄園中，
21:21 若看tio̍h示羅ê chabó͘ gín-á出來跳舞，lín tio̍h tùi葡萄園出來，tī示羅ê女子中ta̍k人搶一个做bó͘，倒tńg去便雅憫地。
21:22 In ê父老兄弟若來對阮告訴，阮會對in講：『請lín帶念tio̍h阮，來對in施恩典，因為早前交戰ê時，無留chabó͘ gín-á hō͘ in ta̍k人做bó͘。Taⁿ mā m̄是lín hō͘ in；若是，lín to̍h有罪。』」
21:23 便雅憫人to̍h照ánne行，照in ê人額tùi跳舞ê chabó͘ gín-á中間所掠ê來娶in做bó͘，to̍h倒tńg去in本地，koh起城來tòa tī hia。
21:24 Hit時，以色列人離開hia，ta̍k人倒tńg去in ê支族，in ê宗族；tùi hia出來ê ta̍k人lóng tńg去in本地。
21:25 Hit當時，以色列中無王，ta̍k人照伊所看做tio̍h ê來行。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。