士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 利未人kah伊ê細姨
當以色列無王ê時，有寄腳tī以法連山地hit-pêng ê一个利未人，娶一个偤大伯利恆ê chabó͘ gín-á做細姨。
19:2 細姨行姦淫來背叛她ê丈夫，離開伊倒tńg去偤大伯利恆，到老父ê家，tòa hia四月日。
19:3 她ê丈夫起來，chhōa一个奴僕kah牽兩隻驢á去，beh用好話kā她安慰，來chhōa她tńg來。伊入去她ê老父ê厝，chabó͘人ê老父看tio̍h，to̍h kā伊歡迎。
19:4 伊ê丈人，to̍h是chabó͘ gín-á ê老父kā伊留落來，伊to̍hkah丈人tòa三日，in to̍h做伙lim食，tī hia tòa。
19:5 到第四日，in透早起來，伊beh出發去，chabó͘ gín-á ê老父kā kiáⁿ婿講：「請你食淡薄餅做點心，後來，chiah thang出發行。」
19:6 兩人to̍h坐落去，做伙lim食。Cha-bó͘-gín-á ê老父tùi hitê人講：「請你歡喜koh tòa一暝，hō͘你ê心快樂。」
19:7 Hitê人起來beh出發，伊ê丈人強強kā伊留，伊to̍hkoh再歇一暝。
19:8 到第五日，伊透早起來beh出發，chabó͘ gín-á ê老父kā伊講：「請你koh食kóa點心，thèng候到日落西山chiah出發。」In兩人to̍h koh做伙食。
19:9 Hitê人kah伊ê細姨以及奴僕起來beh起行，伊ê丈人，to̍h是chabó͘ gín-á ê老父，kā伊講：「你看，日beh暗à，請你koh歇一暝，日頭beh落山à，你tio̍h歇chia，hō͘你ê心快樂，明á載透早chiah出發倒tńg去lín tau。」
19:10 Hitê人m̄肯koh歇一暝，to̍h起身出發，來到耶布斯ê對面，耶布斯to̍h是耶路撒冷。兩隻掛鞍ê驢以及伊ê細姨，kah伊做伙去。
19:11 行近耶布斯ê時，日已經beh落山，奴僕kā主人講：「來，咱不如 oat入去耶布斯人chitê城，tī hia歇暝。」
19:12 主人講：「咱無beh oat入去外邦人ê城，to̍h是無屬以色列人ê，khah好咱tio̍h過來去基比亞。」
19:13 伊koh kā奴僕講：「來，咱tio̍h來去chiahê所在中間ê一个，來歇tī基比亞á是拉瑪。」
19:14 In就進前去，將近便雅憫ê基比亞ê時，日頭已經落山。
19:15 Into̍h oat入去，beh tī基比亞歇暝，to̍h入去坐tī城內ê街路，因為無人接納in入去厝內歇暝。
19:16 日暗了後，有一个老人tùi田裡做工tńg來。伊本是以法連山地ê人，寄腳tī基比亞；總是，hit所在ê人是便雅憫人。
19:17 老人gia̍h頭看tio̍h人客tī城內ê街路，to̍h問伊講：「你tùi tó位來？Beh去tó位？」
19:18 伊應講：「阮tùi偤大伯利恆來，beh去以法連山地hit-pêng。我本來tī hia，to̍h是過去偤大伯利恆，taⁿ我beh去上主ê殿，tī chia無人接納我入去伊ê厝。
19:19 其實我有草有糧thang hō͘驢á，mā有餅有酒thang hō͘我本身kah女婢，以及tòe我來ê奴僕ê少年人，lóng無欠kah一項。」
19:20 老人講：「願你平安，你所需要ê由我來處理，只是你m̄ thang tī街路裡過暝。」
19:21 就ánne，老人chhōa in到伊ê厝，飼伊ê驢á，in to̍h洗腳lim食。
19:22 In ê心tú teh快樂ê時，城內hiahê匪類來圍伊ê厝，直直phah門，對厝主老人講：「你kā hitê入去你ê厝ê人chhōa出來，阮beh kah伊交合。」
19:23 Hitê厝主出來in hia，kā in講：「親愛ê兄弟，千萬m̄ thang做chitê pháiⁿ tāichì。Chitê人既然入來我ê厝，lín to̍hm̄ thang做chitê見笑ê tāichì。
19:24 我有chabó͘ kiáⁿ iáu是在室女，koh有伊ê細姨，我chhōa in出來，lín thang kā in凌辱，chhut-chāi lín ê意思來款待in，獨獨對chitê人lín m̄ thang行chitê見笑事。」
19:25 總是，hiahê人m̄聽伊ê話，hitê人to̍h kā伊ê細姨 牽出去外面交in，in to̍hkah她交合，kui暝kā她凌辱，到早起天beh光ê時，chiah放她去。
19:26 天phú光ê時，chabó͘人來到伊ê主人所歇hitê厝門口，to̍h倒tī hia，一直到天光。
19:27 天光早起，伊ê主人起來開厝ê門，出去beh出發ê時，看tio̍h hitê chabó͘人，to̍h是伊ê細姨，倒tī厝門口，兩支手掛tī戶碇裡。
19:28 to̍h kā chabó͘人講：「起來，咱beh出發！」總是，她無應，伊to̍hka7她扶起lí驢ê頂面，出發去伊ê本所在。
19:29 到伊ê厝，to̍h用刀kā伊ê細姨ê身屍kah骨頭割做十二塊，差人the̍h去全以色列ê全境。
19:30 見若看tio̍h ê人lóng講：「Tùi以色列人出埃及ê日，一直到今á日，m̄ bat ánne行，mā無看tio̍h。Τaⁿ lín tio̍h想，tio̍h參詳，然後chiah講。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。