士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 米迦kah但支族
Hit時，以色列中無王。Hit時，但ê人ê支族chhōe tē做產業thang tòa，因為到hit日，tī以色列支族中，in iáu未得tio̍h業。
18:2 但ê人tùi瑣拉kah以實陶，差本族眾人中五個勇士，去偷看hitê地來查考，kā in吩咐講：「Lín去查考hitê地。」In來到以法連山，入去米迦ê厝，就歇tī hia。
18:3 In接近米迦ê厝，認tio̍h hitê少年利未人ê聲音，to̍h入去問伊：「啥人chhōa你來chia？你tī chia做啥物？你tī chia得tio̍h啥物？」
18:4 伊講：「米迦款待我ánne，ánne，伊有倩我，我做伊ê祭司。」
18:5 In kā伊講：「請你問上帝，hō͘阮知阮所teh行ê路，會興通á無？」
18:6 祭司kā in講：「Lín thang平安去，lín所行ê路是tī上主ê面前。」
18:7 五人to̍h出發，來到拉億，看tio̍h hia ê人民，安然tòa，平安，無操煩，親像西頓人。Τī hia無有掌權者用啥物tāichì來kā in攪擾，in離開西頓人遠遠，無kah別人往來。
18:8 五人tńg來到瑣拉kah以實陶in ê兄弟hia，兄弟問in講：「Lín有啥物話？」
18:9 In應講：「起來，咱來去攻擊in，因為阮已經看tio̍h hitê地，你看，hitê地真好，lín án怎恬恬？Tio̍h入去，thang得tio̍h hitê地做產業，m̄ thang延chhiân。
18:10 Lín到hia，會看tio̍h安然teh tòa ê人民，所在mā開闊。上帝已經kā hitê所在交tī lín ê手，地chiūⁿ所有ê物，hit所在無欠kah一項。」
18:11 就ánne，但族ê六百人，ta̍k个帶軍器，tùi瑣拉kah以實陶進前去。
18:12 In去tī偤大ê基列耶琳紮營，所以，kā chit所在ê名叫做Ma-hat-lī-tàn，到今á日。你看，這是tī基列耶琳ê後面。
18:13 In tùi hia去以法連山地，來到米迦ê厝。
18:14 早前偷看拉億地ê五人kā in ê兄弟講：「Chiahê厝內有祭司服kah厝內ê偶像，koh有雕刻ê像kah鑄ê像，lín kám知？Taⁿ lín tio̍h想，看beh án怎做chiah好？」
18:15 Into̍h oat去hia，到hitê少年ê利未人ê厝，to̍h是米迦ê厝，kā伊請安。
18:16 但族hiahê六百人帶軍器，lóng khiā tī門口。
18:17 偷看地ê五個人to̍h入去，kā雕刻ê像、祭司服、厝內ê像，kah鑄ê像lóng the̍h去。祭司kah帶軍器ê六百人做伙khiā tī門口。
18:18 Hit五個人入去米迦ê厝，the̍h雕刻ê偶像、祭司服、厝內ê偶像kah鑄ê像，祭司to̍h問in講：「Lín teh做啥物？」
18:19 In應講：「M̄-thang出聲，用手掩嘴，tòe阮來去，做阮ê父，做阮ê祭司。你做一个人ê家ê祭司khah好，á是做以色列一支族ê祭司khah好？」
18:20 祭司心內歡喜，就the̍h祭司服kah厝內ê偶像，以及雕刻ê像，行tī人民ê中間。
18:21 Into̍h oa̍t-tńg身離開hia，hō͘ gín-á、chengseⁿ、財物做頭前。
18:22 離開米迦ê厝嶄然遠ê時，米迦hiahê厝邊lóng聚集óa來，jiok但ê人，大聲hoah但ê人。
18:23 但ê人oa̍t頭看，問米迦講：「你聚集hiahê人來，是啥物tāichì？」
18:24 米迦講：「我所妝ê神明kah祭司，lín lóng帶去，我iáu有chhun啥物？Ná會iáu問我講：你啥物tāichì？」
18:25 但ê人kā伊講：「你m̄ thang hō͘阮聽tio̍h你ê聲，恐驚躁性ê人來對lín動手，致使你kah全家lóng ē失落性命。」
18:26 但ê人做in繼續行落去，米迦看tio̍h in比伊khah強，to̍h oa̍t-tńg身tńg去伊ê厝。
18:27 In帶米迦所做ê kah伊所有ê祭司來到拉億，看tio̍h安然無操煩ê人民，to̍h用刀kā inthâi死，koh放火燒hitê城，
18:28 mā無人來拯救，因為離開西頓真遠，in koh無kah別人往來。Hitê城tī hitê óa近Biat-le-ho͘p ê山谷。
18:29 但ê人koh tī hia起城來tòa，照in祖先以色列ê kiáⁿ但ê名，kā hitê城ê名叫做但。Hitê城起頭ê名叫做拉億。
18:30 但ê人to̍h為kakī chhāi hitê雕刻ê像。摩西ê孫，革順ê kiáⁿ約拿單，kah伊ê kiáⁿ孫，做但ê支族ê祭司，一直到hit地方ê人tú tio̍h受掠ê日。
18:31 上帝ê厝tī示羅hiahê日，但ê人為kakī chhāi米迦所做雕刻ê像。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。