士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
16:1 參孫tī迦薩
參孫來到迦薩，tī hia看tio̍h一个妓女，就親近她。
16:2 有人kā迦薩人講：「參孫來到chia。」In就透暝kā伊圍起來，tī城門當等伊，kui暝恬恬，講：「到天光早起，咱to̍h thang kā伊thâi死。」
16:3 參孫睏到半暝，tī半暝起來，kā城門ê門扇kah兩支門框，以及門閂lóng拆起來，hē tī肩胛頭頂，giâ到希伯崙對面ê山頂。
16:4 參孫kah大利拉
後來，參孫tī So-lia̍t山谷戀愛一个chabó͘人，她ê名叫做大利拉。
16:5 腓利士人hiahê首領去見hitê chabó͘人，對她講：「你tio̍h làu參孫，看伊ê大氣力在tī tó位，阮án怎chiah ē贏伊，thang kā伊縛起來hō͘伊困苦，阮to̍h ēta̍k人hō͘ 你一千一百銀。」
16:6 大利拉kā參孫講：「求你kā我講，你ê大氣力在tī tó位？Tio̍h án怎chiah ē tàng kā你縛起來，hō͘你困苦？」
16:7 參孫應講：「人若用七條iáu未乾，青ê藤á kā我縛，我to̍h ē軟弱親像別人。」
16:8 就ánne，腓利士人hiahê首領the̍h七條iáu未乾，青ê藤á來，交hō͘ chabó͘人，她to̍h用hitê來縛參孫。
16:9 chabó͘人已經有埋伏人tī伊ê內房，chabó͘人講：「參孫，腓利士人來beh掠你。」參孫to̍h chhoah斷藤á，親像chhoah斷經過火ê麻絲，ánne，人猶原m̄知伊ê大氣力。
16:10 大利拉kā參孫講：「你騙我，對我講白賊，taⁿ求你kā我講，tio̍h án怎chiah ē tàng kā你縛起來？」
16:11 參孫應講：「人若用m̄ bat用過ê新索á縛我，我to̍h ē軟弱親像別人。」
16:12 大利拉to̍h用新索á kā伊縛起來，對伊講：「參孫ah，腓利士人來beh掠你！」Hit時，埋伏ê人bih tī內房，參孫to̍h chhoah斷伊手骨裡ê索á，親像chhoah斷一條線hiah簡單。
16:13 大利拉kā參孫講：「你到taⁿ iáu teh kā我騙，對我講白賊。求你kā我講，tio̍h án怎chiah ē tàng kā你縛起來？」參孫應講：「你若用七股ê頭毛kah緯線做伙織，to̍h ē。」
16:14 chabó͘人to̍h用釘á釘伊ê頭毛，kā伊講：「參孫，腓利士人來beh掠你！」參孫就醒，kā布機ê釘á kah緯線做一下拔出來。
16:15 大利拉kā伊講：「你ê心無kah我結聯，án怎講你疼我？你已經騙我三pái，無kā我講你ê氣力在tī tó位。」
16:16 大利拉日日用話催伊，逼伊，致使伊ê心鬱悶kah beh死。
16:17 to̍h kā伊ê心底所khǹg-ê lóng報伊知，kā伊講：「永過m̄ bat有剃頭刀臨到我ê頭殼，因為我tùi母胎就歸上主做獻身者；若kā我剃起來，我ê氣力to̍h ē離開我，我to̍h ē軟弱親像別人。」
16:18 大利拉看tio̍h伊kā心底所khǹg-ê lóng kā她講，to̍h差人叫腓利士人ê首領，kā in講：「請lín chit pái koh起來，因為伊已經kā心底所khǹg-ê lóng kā我講。」腓利士人ê首領上去chabó͘人hia，hitê銀帶tī手裡。
16:19 她to̍h hō͘參孫睏tī她ê腳頭u，叫一个人來剃伊七股ê頭毛。就ánne hō͘伊困苦，伊ê氣力to̍h離開伊。
16:20 她講：「參孫，腓利士人來beh掠你！」參孫睏就醒，心內想講：「我beh親像以前幾nā pái kakī 滾開」；總是，伊m̄知上主已經離開伊。
16:21 腓利士人kā伊掠起來，挖伊ê目chiu ，押伊來到迦薩，用銅鏈kā伊縛起來，伊to̍hti7監裡挨磨。
16:22 M̄ koh，伊ê頭毛受剃了後，koh漸漸長起來。
16:23 腓利士人hiahê首領聚集，beh獻大祭hō͘ in ê神明大袞，mā beh宴樂，因為in講：「咱ê神明kā咱ê對敵參孫交tī咱ê手à。」
16:24 人民看tio̍h參孫，to̍h oló in ê神明，講：「咱ê對敵毀咱ê地，kohthâi死咱真chē人ê，taⁿ咱ê神明已經kā 伊交tī咱ê手。」
16:25 In宴樂ê時，to̍h講：「叫參孫來，hō͘咱來kā伊弄chhitthô。」Into̍h叫參孫出監，伊to̍hhou7 in弄chhitthô，in hō͘伊khiā tī兩支柱ê中間。
16:26 參孫kā牽伊ê手ê gín-á講：「請你hō͘我摸tio̍h thuh厝ê柱，hō͘我thang óa靠 in。」
16:27 Hit時，厝內男女滿滿，腓利士人ê眾首領mā lóng tī hia。厝頂男女差不多有三千人，看人teh弄參孫chhitthô。
16:28 參孫對上主祈禱講：「至koân上主ah，求祢數念我，上主ah，求祢賜我盡chit pái ê氣力，hō͘我為我ê兩蕊目chiu ，對腓利士人做一下報仇。」
16:29 參孫就lám thuh hit間厝ê兩支中柱來óa靠，正手lám一支，倒手lám一支。
16:30 參孫講：「願我kah腓利士人做伙死。」就盡力屈身，厝to̍h倒，來teh tī hiahê首領，kah tī hit內面ê群眾。Án-ne，參孫死ê時所害死ê比活ê時所害死ê koh khah chē。
16:31 參孫ê兄弟kah伊ê老父全家，lóng落來收拾伊ê身屍，扛去埋葬tī瑣拉kah以實陶ê中間，tī伊ê老父瑪羅亞ê墓地。參孫做以色列ê士師二十年。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。