士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 Sâm-sóng kah Tim-nah ê Cha-bó͘ gín'á
Sâm-sóng lo̍h-khì Tim-nah, tī Tim-nah khòaⁿ tio̍h chi̍t-ê chabó͘ gín'á, to̍h-sī Hui-lī-sū lâng ê chabó͘ kiáⁿ.
14:2 Sâm-sóng chiūⁿ-khì kā i ê lāu-pē kah lāu-bú kóng, " Góa tī Tim-nah khòaⁿ tio̍h chi̍t-ê chabó͘ gín'á, sī Hui-lī-sū lâng ê chabó͘ kiáⁿ, goān lín kā góa chhōa i lâi chò bó͘. "
14:3 I ê lāu-pē kah lāu-bú kā i kóng, " Tī lí hiaⁿ-tī tiong ê chabó͘ gín'á á-.sī tī lán jîn-bîn tiong, kám bô chi̍t-ê chabó͘ gín'á, tì-sú lí khì tī bô siū kat-lé ê Hui-lī-sū lâng tiong-kan chhōa bó͘? " Sâm-sóng kā i ê lāu-pē kóng, " Goān lí kā góa chhōa i, in-ūi i sī góa kah-ì ê. "
14:4 Chóng-.sī, i ê lāu-pē kah lāu-bú m̄-chai chit-ê tāichì sī chhut tī Siōng-chú, in-ūi i chhōe ki-hōe beh kong-kek Hui-lī-sū. Hit sî, Hui-lī-sū lâng koán-hat I-su-la-el.
14:5 Sâm-sóng kah i ê pē-bú lo̍h-khì Tim-nah, lâi-kàu Tim-nah ê phû-tô hn̂g, tú-hó ū chi̍t chiah sai-á-thûn óa-lâi tùi i háu.
14:6 Siōng-chú ê Sèng Sîn tōa-tōa lîm-kàu Sâm-sóng, i ê chhiú bô ke-si, mā kā i thiah-li̍h, chhin-chhiūⁿ thiah-li̍h soaⁿ-iûⁿ-á ánne. I mā bô kā i ê pē-bú kóng i só͘ kiâⁿ ê tāichì.
14:7 I lo̍h-khì kah chabó͘ gín'á kóng-ōe, i sī Sâm-sóng só͘ kah-ì ê.
14:8 Koh ū hiah-.kú, tò tńg-lâi beh chhōa i, oat tùi lō͘ piⁿ beh khòaⁿ sí-.khì ê sai, khòaⁿ tio̍h ū chi̍t siū phang kah bi̍t tī sai ê sin-si lāi-té,
14:9 chhiú khì the̍h bi̍t chiū kiâⁿ, ná kiâⁿ ná chia̍h, lâi-kàu i ê pē-bú hia, chiū kā bi̍t the̍h hō͘ in, in mā chia̍h; chóng-.sī, bô kā i ê pē-bú kóng chit-ê bi̍t sī tùi sai ê sin-si the̍h chhut-.lâi ê.
14:10 I ê lāu-pē lo̍h-khì kàu chabó͘ gín'á hia, Sâm-sóng tī hia siat iàn-se̍k, in-ūi pêng-sî siàu-liân lâng lóng ū chit khoán ê hong-sio̍k.
14:11 In khòaⁿ tio̍h Sâm-sóng, chiū chhōa saⁿ-cha̍p-ê phōaⁿ lâi pôe i.
14:12 Sâm-sóng kā in kóng, " Góa taⁿ beh chhut chi̍t-ê bī-chhai hō͘ lín, lín tī iàn-se̍k ê chhit ji̍t lāi nā chhai-chhut ì-sù lâi kā góa kóng, góa chiū beh hō͘ lín saⁿ-cha̍p niá ê iù-tē saⁿ, saⁿ cha̍p thò ê gōa-saⁿ;
14:13 lín nā bē tàng kā góa kóng, lín chiū tio̍h hō͘ góa saⁿ-cha̍p niá ê iù-tē saⁿ, saⁿ cha̍p thò ê gōa-saⁿ. " In kóng, " Chhiáⁿ chhut lí ê bī-chhai hō͘ goán thiaⁿ. "
14:14 I chiū kā in kóng, " Tùi chia̍h ê chhut chia̍h-mi̍h, Τùi kiông ê chhut tiⁿ. " In saⁿ ji̍t lāi chhai bē chhut.
14:15 Kàu tē-chhit ji̍t, in kā Sâm-sóng ê bó͘ kóng, " Lí tio̍h khì làu lí ê tiōng-hu, hō͘ i kā bī-chhai ê ì-sù kā goán kóng, bián-tit goán ēng hóe sio lí kah lín lāu-pē ê chhù. Lín chhiáⁿ goán lâi, sī beh chhiúⁿ goán á m̄-sī? "
14:16 Sâm-sóng ê bó͘ tī i ê bīn-chêng thî-khàu, kóng, " Lí sī oàn-hūn góa, m̄-sī thiàⁿ góa, in-ūi lí chhut bī-chhai hō͘ góa pún-kok ê lâng, mā bô kā góa kóng bêng. " Sâm-sóng ìn i kóng, " Góa liân lāu-pē lāu-bú to bô kā in kóng, kám thang kā lí kóng? "
14:17 Tī iàn-se̍k ê chhit ji̍t lāi, i tī tiōng-hu ê bīn-chêng thî-khàu, kàu tē-chhit ji̍t chiū kā i kóng, in-ūi i pek i chin thiám, i ê bó͘ chiū kā i pún-kok ê lâng kóng.
14:18 Kàu tē-chhit ji̍t, ji̍t iáu-bōe lo̍h soaⁿ ê chìn-chêng, siâⁿ lāi ê jîn-bîn kā Sâm-sóng kóng, " Ū siáⁿ-mi̍h pí bi̍t khah tiⁿ? Ū siáⁿ-mi̍h pí sai khah kiông? " Sâm-sóng kā in kóng, " Lín nā m̄-sī ēng góa ê gû-chéng-á lê-chhân, góa ê bī-chhai chiū chhai bē chhut. "
14:19 Siōng-chú ê Sèng Sîn tōa-tōa lîm-kàu Sâm-sóng, i chiū lo̍h-khì kàu A-si-ke-lông, kā in tiong-kan thâi-sí saⁿ-cha̍p lâng, kā in chhiúⁿ, kā hiahê saⁿ hō͘ chhai tio̍h ê lâng. Sâm-sóng tōa siū-khì, chiū chiūⁿ-khì in lāu-pē ê ke.
14:20 Sâm-sóng ê bó͘ chiū kè hō͘ i ê pôe-phōaⁿ, to̍h-sī Sâm-sóng kā i tòng-chò pêng-iú ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。