士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
13:1 參孫ê出世
以色列人koh行上主所看做pháiⁿ ê tāichì，上主kā in交tī腓利士人ê手中四十年。
13:2 Hit時，有一个瑣拉人，是但ê族，名叫做瑪羅亞，伊ê bó͘無懷孕，無生。
13:3 上主ê使者對hitê chabó͘人顯現，kā她講：「你平時無懷孕，無生，taⁿ你ē懷孕生一个kiáⁿ。
13:4 所以，你tio̍h細膩，薄酒厚酒lóng m̄ thang lim，無清氣ê物mā lóng m̄ thang食。
13:5 因為你懷孕beh生一个kiáⁿ，剃頭毛ê刀m̄ thang到tī伊ê頭殼，因為chitê gín-á tùi胎裡就歸上主做獻身者（註：原譯本音譯做「拿細耳/ Ná-sè-jíⁿ人。」），伊beh做救以色列ê頭一站，脫離腓利士人ê手。」
13:6 chabó͘人來kā她ê丈夫講：「有一个上主ê人來到我chia，伊ê容貌親像上主使者ê容貌，真thang驚。我無問伊tùi tó位來，伊mā無kā我講伊ê名，
13:7 總是，伊kā我講：『你懷孕會生一个kiáⁿ，所以，薄酒厚酒lóng m̄ thang lim，無清氣ê物mā lóng m̄ thang食，因為chitê gín-á tùi胎裡到伊死ê日，lóng beh歸上主做獻身者ê人。』」
13:8 瑪羅亞to̍h求上主講：「主ah，求祢hō͘祢所差上主ê人koh來阮chia，thang教示阮án怎來款待chitê beh生ê kiáⁿ。」
13:9 上主聽瑪羅亞ê話；chabó͘人坐tī田裡ê時，上主ê使者koh來到她hia，總是，她ê丈夫瑪羅亞無kah她做伙。
13:10 chabó͘人趕緊走去報她ê丈夫，kā伊講：「Hit日來我chia hitê人koh對我出現。」
13:11 瑪羅亞起來tòe伊ê bó͘去到hitê人hia，kā伊講：「Bat kah chitê chabó͘人講話ê，kám是你？」伊講：「是我。」
13:12 瑪羅亞講：「願你ê話應驗，chitê gín-á tio̍h照啥物法度，阮tio̍h對伊án怎行？」
13:13 上主ê使者對瑪羅亞講：「我kā chabó͘人所講一切ê tāichì，她lóng tio̍h 斟酌。
13:14 見若葡萄所出ê，她m̄ thang食，薄酒厚酒lóng m̄ thang lim，一切無清氣ê物mā m̄ thang食。見若我所命令ê，她lóng tio̍h遵守。」
13:15 瑪羅亞對上主ê使者講：「請你hō͘我kā你留teh，阮thang kā你準備一隻山羊á。」
13:16 上主ê使者kā瑪羅亞講：「你雖然留我，我m̄食你ê物，你若準備燒祭，to̍h tio̍h獻hō͘上主。」因為瑪羅亞m̄知伊是上主ê使者。
13:17 瑪羅亞kā上主ê使者講：「你名叫做啥物？到你ê話應驗ê時，阮thang尊敬你。」
13:18 上主ê使者kā伊講：「你ná ē問我ê名？我ê名是奇妙ê。」
13:19 瑪羅亞kā一隻山羊á kah素祭，hē tī石磐頂來獻hō͘上主。使者行奇怪ê tāichì，瑪羅亞kah伊ê bó͘有看tio̍h。
13:20 因為火焰tùi壇頂chhèng上天ê時，上主ê使者tī壇頂ê火焰中mā上去。瑪羅亞kah伊ê bó͘看tio̍h，to̍h仆落去土腳。
13:21 上主ê使者無koh出現hō͘瑪羅亞kah伊ê bó͘看，瑪羅亞 chiah知伊是上主ê使者。
13:22 瑪羅亞kā伊ê bó͘講：「咱一定ē死，因為咱有看tio̍h上主。」
13:23 伊ê bó͘ to̍h kā伊講：「上主若beh hō͘咱死，一定無對咱ê手接納燒祭kah素祭，koh無kā chiahê一切ê tāichì指示咱，chit時mā無kā咱講chitê tāichì。」
13:24 後來，chabó͘人生一个kiáⁿ，to̍h kā伊號名叫做參孫。Gín-á大漢，上主kā伊賜福。
13:25 Tī Ma-hat-nî-tàn，to̍h是瑣拉kah以實陶ê中間，上主ê聖神第一pái kā伊感動。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。