士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 耶弗他
基列人耶弗他是一个大權能ê勇士，是妓女ê kiáⁿ，耶弗他是基列所生ê。
11:2 基列ê bó͘ mā kā伊生幾nā个kiáⁿ，伊ê bó͘所生ê kiáⁿ已經大漢，to̍h kā耶弗他趕出去，kā伊講：「你m̄ thang tī阮老父ê家承接產業，因為你是別个 chabó͘人ê kiáⁿ。」
11:3 耶弗他to̍h走，閃避伊ê兄弟，去tòa tī Tô-pek ê地，有匪類聚集tī耶弗他hia，tòe伊出入。
11:4 過有hiah久，亞捫人kah以色列交戰。
11:5 亞捫人kah以色列交戰ê時，基列ê長老去beh招耶弗他 tùi Tô-pek ê地來；
11:6 對耶弗他講：「請你來做阮ê元帥，阮to̍h thang kah亞捫人交戰。」
11:7 耶弗他應基列ê長老講：「以前lín kám m̄是怨恨我，kā我趕出老父ê家？Taⁿ lín tú tio̍h患難，ná ē來我chia？」
11:8 基列ê長老應耶弗他講：「阮taⁿ所以歸向你，是ài你kah阮去，kah亞捫人交戰，你thang做阮ê頭，來管轄tòa tī基列所有ê人民。」
11:9 耶弗他對基列ê長老講：「Lín chhōa我倒tńg去kah亞捫人交戰，上主kā in交tī我ê面前，我kám真正ē tàng做lín ê頭人？」
11:10 基列ê長老應耶弗他講：「上主tī咱中間做見證，阮一定beh照你ê話行。」
11:11 耶弗他to̍h kah基列ê長老倒tńg去，人民就立伊做頭人，做元帥。耶弗他tī米斯巴kā kakī 一切ê話，排列tī上主ê面前。
11:12 耶弗他差hiahê使者去見亞捫人ê王講：「你kah我有啥物牽連，竟然來我chia攻擊我ê地？」
11:13 亞捫人ê王應耶弗他ê使者講：「因為以色列人tùi埃及起來ê時，佔我ê地，tùi亞嫩到雅博，一直到約旦。Τaⁿ lín tio̍h 好好á kā chiahê地還我！」
11:14 耶弗他koh差使者去見亞捫人ê王，kā伊講：
11:15 「耶弗他ánne講：以色列人並無佔摩押地kah亞捫人ê地。
11:16 以色列人tùi埃及出來，經過曠野到紅海，來到加低斯，
11:17 hit時，以色列to̍h差使者去見以東王講：『求你准阮經過你ê地。』總是，以東王m̄聽伊ê話。Koh差使者去見摩押王，伊mā m̄准，以色列人to̍htoa3 tī加低斯。
11:18 In koh經過曠野，se̍h以東地kah摩押地，tùi摩押地ê 東pêng過來，tī亞嫩hit-pêng紮營，mā無入去摩押ê境內，因為亞嫩河是摩押ê交界。
11:19 以色列差人去見亞摩利王西宏，to̍h是希實本ê王，以色列對伊講：『求你准阮過你ê地，去阮kakī ê所在。』
11:20 總是，西宏m̄相信以色列，m̄ hō͘ in經過伊ê境界，西宏to̍h聚集伊ê人民，tī雅雜紮營，kah以色列人交戰。
11:21 「上主—以色列ê上帝kā西宏kah伊ê人民，交tī以色列人ê手中，in to̍hka7 in phah。就ánne，以色列得tio̍h tòa hit所在ê亞摩利人ê全地。
11:22 In得tio̍h亞摩利人ê全境界，tùi亞嫩到雅博，tùi曠野到約旦。
11:23 「上主—以色列ê上帝tī祂ê子民—以色列人ê面前，趕出亞摩利人，kám講你mā beh得tio̍h in ê地？
11:24 你ê神明基抹所賞賜hō͘你得tio̍h ê，你kám無得tio̍h它來做產業？上主—阮ê上帝見若tùi阮ê面前所趕出ê，阮to̍h ē得tio̍h它。
11:25 你kám ē贏過摩押王西撥ê kiáⁿ巴力？伊kám bat kah以色列人計較？Kám bat kah in交戰？
11:26 以色列人tòa tī希實本kah她ê庄頭，亞羅珥kah她ê庄頭，以及亞嫩河邊hiahê城，已經有三百年，lín tī hit時án怎無kā in征服倒tńg來？
11:27 我無得罪你，你顛倒kah我交戰，實在無理。願審判ê上主，今á日tī以色列kah亞捫ê中間來判斷。」
11:28 總是，亞捫人ê王m̄肯聽耶弗他差人對伊講ê話。
11:29 上主ê聖神臨到耶弗他，伊to̍h經過基列kah瑪拿西，koh經過到基列ê米斯巴，koh tùi基列ê米斯巴經過，來到亞捫人hia。
11:30 耶弗他to̍h對上主下願，講：「祢若kā亞捫人交tī我ê手中，
11:31 hō͘我tùi亞捫人hia平安tńg來ê時，見若tùi我ê厝ê門出來迎接我ê，beh歸tī上主，我beh獻伊做燒祭。」
11:32 就ánne，耶弗他去亞捫人hia kah in交戰，上主kā in交tī伊ê手中，
11:33 伊to̍hka7 in phah，大大kā inthâi死，tùi亞羅珥到Bí-le̍k，一直到A-pī-le̍k-ki-la̍h-bêng，共二十個城。Án-ne，亞捫人to̍h屈服tī以色列人。
11:34 耶弗他ê Cha-bó͘ kiáⁿ
耶弗他tńg來米斯巴來到kakī ê厝，hit時伊ê chabó͘ kiáⁿ gia̍h lin-long鼓跳舞，出來kā伊迎接，chitê是伊獨生ê，以外無kiáⁿ，無chabó͘ kiáⁿ。
11:35 耶弗他看tio̍h她，to̍h拆裂衫講：「Ai-ah，我ê chabó͘ kiáⁿ，你hō͘我真慘，你mā是hō͘我真大艱難，因為我已經對上主開嘴，bē tàng收倒tńg來。」
11:36 她應講：「我ê阿爸，你已經對上主開嘴，to̍h tio̍h照你ê嘴所講出ê來對我做，因為上主已經為tio̍h你報仇你ê對敵亞捫人。」
11:37 Koh對她ê老父講：「有一件tāichì求你允准，容允我兩月日，hō͘我kah我ê同伴去山裡，thang為tio̍h我一世人做在室女來啼哭。」
11:38 伊講：「做你去。」to̍h差她去兩月日，她kah同伴去，tī山裡為tio̍h她一世人做在室女啼哭。
11:39 兩月日已經滿，她tńg來到老父hia，老父就照伊所下ê願kā她款待。她lóng無親近chapo͘人。
11:40 後來，以色列中有chitê例，以色列chiahê chabó͘ gín-á ta̍k年去追悼基列人耶弗他ê chabó͘ kiáⁿ，每年四日。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。