士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 亞比米勒
耶路巴力ê kiáⁿ亞比米勒來到示劍，見伊ê眾母舅，對in kah伊外公全家ê人講：
9:2 「請lín講hō͘示劍ê群眾聽，看是耶路巴力ê眾kiáⁿ七十人管lín，á是一个人管lín，tó一項khah好？Lín mā tio̍h數念我是lín ê骨肉。」
9:3 伊hiahê母舅to̍h kā所有ê話，替伊講hō͘示劍ê人聽，in ê心就歸向亞比米勒，因為講：「伊是咱ê兄弟。」
9:4 to̍h tùi Pa-le̍k-pí-lī-thó͘ ê厝the̍h七十個銀á hō͘亞比米勒，伊to̍h用hiahê錢來倩chiahê無hē落ê匪類，hiahê人to̍h來tòe伊。
9:5 伊去俄弗拉來到伊ê老父ê家，kā耶路巴力ê kiáⁿ，to̍h是伊ê兄弟七十人，lóng tī一塊石磐頂kā inthâi死，只有耶路巴力ê soah尾kiáⁿ約坦留teh，因為伊有走去bih。
9:6 示劍人kah米羅ê家lóng聚集，去設立亞比米勒做王，tī示劍chhāi柱ê橡樹腳。
9:7 有人kā約坦講chitê tāichì，伊to̍h去khiā tī Ki-lī-sim山頂，大聲hoah，kā in講：「示劍人，lín tio̍h聽我ê話，hō͘上主mā聽lín。
9:8 Bat有一pái，chiahê樹lóng去，beh設立一欉樹做in ê王，to̍h去對橄欖樹講：『請你做阮ê王。』
9:9 橄欖樹應講：『我kám thang放sak我ê油，to̍h是人所用來尊重上主kah人ê，去tī眾樹ê頂面搖？』
9:10 Chiahê樹對無花果樹講：『你來，來做阮ê王。』
9:11 無花果樹應講：『我kám thang放sak我ê甜koh好ê果子，去tī眾樹ê頂面搖？』
9:12 Chiahê樹對葡萄樹講：『你來，來做阮ê王。』
9:13 葡萄樹應講：『我kám thang放sak我ê新酒，to̍h是hō͘上主kah人歡喜ê，去tī眾樹ê頂面搖？』
9:14 Chiahê樹對刺á講：『你來，來做阮ê王。』
9:15 刺á應hiahê樹講：『Lín若實在設立我做lín ê王，to̍h tio̍h tī我ê蔭影下閃bih；若m̄，願火tùi刺á出，燒滅黎巴嫩ê柏香樹。』
9:16 「Taⁿ lín設立亞比米勒做王，若照誠實公義來行，koh好款待耶路巴力kah伊ê家，照伊ê手所勞苦ê來kā伊報答。
9:17 因為我ê老父bat拚命為lín交戰，救lín脫離米甸人ê手。
9:18 Lín今á日起來攻擊我老父ê家，tī一塊石磐頂thâi死伊ê kiáⁿ七十人，koh設立伊ê女婢ê kiáⁿ亞比米勒做示劍人ê王，因為伊是lín ê兄弟。
9:19 Lín今á日若照誠實公義款待耶路巴力kah伊ê家，lín to̍hthang tùi亞比米勒來歡喜，伊mā thang tùi lín來歡喜；
9:20 若無，願火tùi亞比米勒出，燒示劍人kah米羅ê家，koh願火tùi示劍人kah米羅ê家出，燒亞比米勒。」
9:21 約坦因為驚伊ê兄弟to̍h逃走，走去bih tī比珥，tī hia tòa。
9:22 亞比米勒管以色列三年。
9:23 上主差pháiⁿ神tī亞比米勒kah示劍人ê中間，示劍人to̍h用詭詐款待亞比米勒，
9:24 來報應耶路巴力七十個kiáⁿ所受ê殘害，mā hō͘ in ê血歸tī kā inthâi死ê人，to̍h是in ê兄弟亞比米勒，mā歸tī示劍人，to̍h是幫贊伊ê手來thâi死伊ê兄弟ê人。
9:25 示劍人tī山頂設埋伏來當等伊。見若tùi hit條路經過ê人，in to̍hka7伊搶。有人to̍h kā chitê tāichì去報告亞比米勒。
9:26 以別ê kiáⁿ迦勒，kah伊ê兄弟來到示劍，示劍人lóng信靠伊。
9:27 In出去園裡，收葡萄來踏酒，設宴席，入去in ê神明ê廟lim食，咒詛亞比米勒。
9:28 以別ê kiáⁿ迦勒講：「亞比米勒是啥人，示劍是啥人，tio̍h hō͘咱kā伊服事？伊kám m̄是耶路巴力ê kiáⁿ？伊ê軍長kám m̄是西布勒？Lín tio̍h服事示劍ê老父哈抹ê人，咱án怎tio̍h kā伊服事？
9:29 願chiahê人民歸tī我ê手下，我to̍h除亞比米勒。」伊to̍hka7亞比米勒講：「加添你ê軍兵出來。」
9:30 城守西布勒聽tio̍h以別ê kiáⁿ迦勒ê話，就受氣，
9:31 偷偷á差人去見亞比米勒，講：「以別ê kiáⁿ迦勒kah伊ê兄弟來到示劍，誘惑城內ê人民來攻擊你。
9:32 所以，你kah tòe你ê人tio̍h透暝起來，埋伏tī田裡。
9:33 早起時，日tú-á出，你tio̍h早早起來，衝óa去攻城。迦勒kah tòe伊ê人出來攻擊你ê時，你to̍h thang siòng機ē來對付in。」
9:34 亞比米勒kah tòe伊ê群眾透暝起來，分做四隊，ǹg示劍去埋伏。
9:35 以別ê kiáⁿ迦勒出去，khiā tī城門口。亞比米勒kah tòe ê人tùi埋伏ê所在起來。
9:36 迦勒看tio̍h hiahê人，to̍h對西布勒講：「你看，有人tùi山頂落來。」西布勒講：「你看tio̍h山ê影，掠做是人。」
9:37 迦勒koh講：「你看，有人tùi koân地落來，koh有一隊tùi Bí-ok-nî-nî橡樹ê路起來。」
9:38 西布勒對伊講：「你bat講：亞比米勒是啥人，hō͘咱kā伊服事，你講chiahê話ê嘴tī tó位？這kám m̄是你所藐視ê人民？你taⁿ tio̍h出去kah in交戰。」
9:39 迦勒to̍h對示劍人ê頭前出去，kah亞比米勒交戰。
9:40 亞比米勒jiok伊，伊tī伊ê面前逃走，有真chē人tio̍h傷倒teh，一直到城門口。
9:41 亞比米勒tòa tī A-ló͘-má。西布勒趕迦勒kah伊ê兄弟，m̄准in tòa tī示劍。
9:42 隔tńg工，人民出去到田裡，有人kā亞比米勒講；
9:43 伊to̍hka7伊ê人分做三隊，埋伏tī田裡，看tio̍h示劍人tùi城裡出來，to̍h起來kā in攻擊，kā inthâi。
9:44 亞比米勒kah tòe伊hit一隊衝進前，khiā tī城門口；另外hit兩隊直直衝到田裡hiahê人，來kā inthâi。
9:45 亞比米勒kui日攻擊城，征服hitê城，thâi死hit內面ê人民，拆毀hitê城，用鹽kā她掖。
9:46 Tòa tī示劍台ê人聽tio̍h，就閃入去Pa-le̍k-pí-lī-thó͘ ê厝ê城堡。
9:47 有人kā亞比米勒講：「示劍台ê人lóng聚集tī一个所在。」
9:48 亞比米勒kah tòe伊ê人，to̍h lóng上去撒門山。亞比米勒手the̍h斧頭，剉一欉樹枝，giâ tī肩胛頭頂，對tòe伊ê人講：「Lín看我所行ê，mā tio̍h趕緊學我來行。」
9:49 眾人to̍htak8个剉一支，來tòe亞比米勒，kā樹枝疊tī城堡，tī hiahê人ê頂面放火燒城堡，致使示劍台ê人lóng死，男女差不多有一千人。
9:50 亞比米勒去到Thê-pī-su，tī Thê-pī-su紮營，來kā她征服。
9:51 城內有堅固ê台，城內ê群眾，無論男女lóng走去hia，關門，上台頂。
9:52 亞比米勒來到hitê台beh kā它攻擊，óa近台門，beh用火kā它燒。
9:53 有一个chabó͘人kā一塊頂tún ê磨石，tìm tio̍h亞比米勒ê頭殼，phah破伊ê頭殼碗。
9:54 伊to̍h趕緊叫gia̍h伊ê軍器ê少年人來，kā伊講：「拔你ê刀thâi我，免得人講我，伊是chabó͘人所thâiê。」少年人to̍h kā伊鑿落去，伊to̍h死。
9:55 以色列人看tio̍h亞比米勒已經死，ta̍k个to̍h tńg去伊kakī ê所在。
9:56 Án-ne，上帝報應亞比米勒ǹg伊ê老父所行ê pháiⁿ事，to̍h是thâi死伊ê兄弟七十人。
9:57 示劍人一切ê pháiⁿ，上主mā lóng報應tī in ê頭殼頂；耶路巴力ê kiáⁿ約坦ê咒詛歸tī in ê頂面。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。