士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 留落來ê民族
上主所留chiahê族，是beh用伊來試驗以色列人，to̍h是hiahê m̄ bat見過迦南交戰ê tāichì ê人，
3:2 thiau-tî beh hō͘以色列後代ê人知影，來教示in交戰，to̍h是hiahê前所m̄ bat經過ê人。
3:3 所留teh hiahê族，to̍h是腓利士五個首領，kah所有ê迦南人、西頓人kah tòa tī黎巴嫩山ê希未人，tùi Ba-al-hel-móng山，到哈馬口。
3:4 這to̍h是beh用in來試驗以色列人，看in肯遵thàn上主託摩西所命令in祖先ê誡命á無。
3:5 就ánne，以色列人tòa tī迦南人、赫人、亞摩利人、比利洗人、希未人、耶布斯人ê中間，
3:6 娶in ê chabó͘ kiáⁿ做bó͘，mā kā chabó͘ kiáⁿ嫁hō͘ in ê kiáⁿ，soah服事in hiahê神明。
3:7 俄陀聶
以色列人行上主所看做pháiⁿ ê tāichì，bē記得上主—in ê上帝，去服事chiahê巴力kah亞斯她錄。
3:8 所以，上主受氣以色列人，kā in賣hō͘米所波大米王Kó͘-san-lī-sat-tiân。就ánne，以色列人服事Kó͘-san-lī-sat-tiân八年。
3:9 以色列人求叫上主ê時，上主to̍h kā以色列人興起一个獻身者來救in，to̍h是迦勒ê小弟基納斯ê kiáⁿ俄陀聶。
3:10 上主ê聖神臨到伊，伊to̍h做以色列ê士師，出去交戰。上主kā米所波大米王Kó͘-san-lī-sat-tiân交tī伊ê手，伊to̍hkhah贏Kó͘-san-lī-sat-tiân。
3:11 就ánne，hitê所在太平四十年。然後，基納斯ê kiáⁿ俄陀聶死去。
3:12 以笏
以色列人koh行上主所看做pháiⁿ ê tāichì，上主to̍h hō͘摩押王伊磯倫強盛，來攻擊以色列人，因為in行上主所看做pháiⁿ ê。
3:13 伊磯倫聚集亞捫人kah亞瑪力人來óa伊，去phah以色列人，佔棗樹ê城。
3:14 就ánne，以色列人服事摩押王伊磯倫十八年。
3:15 以色列人求叫上主ê時，上主to̍h kā in興起一个獻身者，to̍h是便雅憫人基拉ê kiáⁿ以笏，伊是習慣用倒手ê。以色列人交託伊送禮物去hō͘摩押王伊磯倫。
3:16 以笏為kakī phah一支雙面利ê劍，長一肘，縛tī正腿衫褲ê內面。
3:17 伊用禮物獻hō͘摩押王伊磯倫，伊磯倫是一个真肥ê人。
3:18 獻禮物了後，to̍h差帶禮物ê人lóng去。
3:19 伊本身tùi近吉甲phah石像ê所在oa̍t倒tńg來，講：「王，我有祕密ê tāichì beh kā你講。」王講：「肅靜！」Khiā tī伊身邊ê人to̍h lóng退出去。
3:20 以笏來見伊，王kakī 一个坐tī涼冷ê樓頂，以笏講：「我奉上主ê誡命有tāichì來報你知。」王to̍h tùi座位khiā起來。
3:21 以笏to̍h伸倒手，tùi正腿拔出劍，鑿入去王ê腹肚，
3:22 劍ê柄mā順續入去，劍hō͘油咬tiâu ·leh，因為伊無tùi伊ê腹肚拔劍出來，to̍h thàng過尻脊骿出來。
3:23 以笏to̍h出去到門廊，kā hiahê樓門關鎖起來。
3:24 伊出去了後，王ê奴僕到，看tio̍h樓門關鎖teh，to̍h講：「伊一定是tī樓頂teh大便。」
3:25 In thèng候到tio̍h驚kah gāng去，看tio̍h伊無開樓頂ê門，就gia̍h鎖匙來開，你看，in ê主人已經死去，倒tī土腳。
3:26 In延chhiân ê時，以笏to̍h逃走，經過phah石像ê地了後，就siám走去到Se-i-la̍h。
3:27 到位了後to̍hti7以法連山地pûn哨角，以色列人to̍htoe3伊tùi山地落去，以笏行tī頭前，
3:28 對in講：「Lín tòe我來，因為上主已經kā lín ê對敵摩押人交tī lín ê手。」In就tòe伊落去，tī摩押ê對面把守約旦河ê渡頭，無容允一个人過去。
3:29 Hit時，thâi死摩押人差不多一萬，lóng是大漢ê勇士，無kah一个走離開。
3:30 就ánne，摩押就屈服tī以色列人，地方太平八十年。
3:31 珊迦
以笏了後，有亞拿ê kiáⁿ珊迦，伊用趕牛ê鐵刺phah死六百個腓利士人。伊mā救以色列人。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。