士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 偤大kah西緬支族掠tio̍h亞多尼比色
約書亞死了後，以色列人問上主講：「啥人tio̍h做頭去kah kā阮攻擊ê迦南人交戰？」
1:2 上主講：「偤大tio̍h去，你看，我已經kā hitê地交tī伊ê手中。」
1:3 偤大對伊ê阿兄西緬講：「請你kah我做伙來去我所拈tio̍h ê地，kah迦南人交戰；我mā beh kah你去，到你所拈tio̍h ê地。」西緬to̍h kah伊去。
1:4 偤大to̍h去，上主kā迦南人kah比利洗人，交tī in ê手中。
1:5 In tī比色kā in phah死一萬人，koh tī比色tú tio̍h亞多尼比色，kah伊交戰，結果thâi贏迦南人kah比利洗人。
1:6 亞多尼比色逃走，in kā伊jiok，掠tio̍h伊，斬斷伊ê手kah腳ê大頭拇。
1:7 亞多尼比色講：「早前有七十個王，手kah腳ê大頭拇lóng斬起來，tī我ê桌腳拾食物。Τaⁿ上主照我所行ê，來kā我報應。」In kā伊chhōa到耶路撒冷，伊to̍h死tī hia。
1:8 偤大支族佔領耶路撒冷kah希伯崙
偤大人攻擊耶路撒冷，征服她，用刀kā inthâi死，koh放火燒城。
1:9 後來，偤大人落去，kah tòa tī山地南pêng ê地，to̍h是平原ê地ê迦南人交戰。
1:10 偤大koh去phah hiahê tòa tī希伯崙ê迦南人，thâi死Sī-su、A-hi-mān kah That-mái。希伯崙以前ê名叫做基列亞巴。
1:11 俄陀聶佔領底璧城
(書15：13-19)
伊tùi hia去phah tòa tī底璧ê人民；底璧以前ê名叫做Ki-lia̍t-se-hut。
1:12 迦勒講：「若有人phah Ki-lia̍t-se-hut來kā它征服，我beh kā我ê chabó͘ kiáⁿ押撒hō͘伊做bó͘。」
1:13 迦勒ê小弟基納斯ê kiáⁿ俄陀聶kā它征服，伊to̍hka7伊ê chabó͘ kiáⁿ押撒hō͘俄陀聶做bó͘。
1:14 押撒過門ê時，她勸丈夫對in老父討一坵田。押撒tùi驢頂落來，迦勒to̍h問她講：「你ài啥物？」
1:15 她應講：「求你kā我賜福，你已經kā我安置tī南方ê地，求你hō͘我水泉。」迦勒to̍h kā頂面ê水泉kah下面ê水泉hō͘她。
1:16 偤大kah便雅憫支族ê勝利
摩西ê外戚是基尼人，伊ê kiáⁿ孫kah偤大ê kiáⁿ孫tùi棗樹城做伙去，來到亞拉得南pêng ê偤大ê曠野，kah hia ê人做伙tòa。
1:17 偤大kah伊ê阿兄西緬做伙去，phah死tòa tī Che-hoat ê迦南人，全部kā in滅掉，hitê城就ánne叫做何珥瑪。
1:18 偤大koh征服迦薩kah它ê境界，A-si̍t-kî-lûn kah它ê境界，以革倫kah它ê境界。
1:19 上主kah偤大同在，伊to̍hka7 tòa tī山地ê人民趕出去，總是，bē tàng kā tòa tī平原ê人民趕出去，因為in有鐵車。
1:20 In照摩西所講ê，用希伯崙hō͘迦勒，伊to̍htui3 hia kā亞納三个kiáⁿ趕出去。
1:21 便雅憫人無kā tòa tī耶路撒冷ê耶布斯人趕出去。耶布斯人猶原tī耶路撒冷kah便雅憫人做伙tòa，一直到今á日。
1:22 以法連kah瑪拿西支族佔領伯特利
約瑟家mā去攻擊伯特利，有上主kah in同在。
1:23 約瑟家差人去偷看伯特利，hitê城ê名起頭是叫做路斯。
1:24 做偵探ê看tio̍h一个人tùi城內出來，to̍h對伊講：「求你kā入城ê路報阮知，阮會好款待你。」
1:25 Hitê人to̍h報in入城ê路，in to̍h用刀thâi死城內ê人民，獨獨放hitê人kah伊ê全家離開。
1:26 Hitê人去赫人ê地，起一座城，號名叫做路斯。到今á日iáu叫chitê名。
1:27 無hō͘以色列人趕出ê人民
瑪拿西mā無趕出Biat-siang kah她ê庄頭ê人民，他納kah她ê庄頭ê人民，多珥kah她ê庄頭ê人民，Ip-le-àm kah她ê庄頭ê人民，米吉多kah她ê庄頭ê人民；迦南人to̍h決定tòa tī hiahê所在。
1:28 到以色列強盛了後，to̍h hō͘迦南人做苦工，無全部kā in趕出去。
1:29 以法連mā無kā tòa tī基色ê迦南人趕出去，迦南人to̍h tī in中間，猶原tòa tī基色。
1:30 西布倫mā無kā Ki-lûn kah Na-ha-lal ê人民趕出去。迦南人to̍h猶原tòa tī in中間，來做苦工。
1:31 亞設mā無kā A-kho tòa tī西頓、A-hek-la̍h、Ak-chip、Hek-pa、A-hut-kek kah利合ê人民趕出去。
1:32 亞設人kah tòa hit所在迦南人ê中間做伙tòa，因為無kā in趕出去。
1:33 拿弗他利無kā伯示麥kah Pek-a-la̍p tòa ê人民趕出去，拿弗他利就tòa tī hit所在迦南人ê中間；總是，tòa tī伯示麥kah Pek-a-la̍p ê人民lóng做苦工。
1:34 亞摩利人強迫但ê人tòa tī山地，無容允in落來平原。
1:35 亞摩利人to̍h決定beh tòa tī Hi-lia̍t山、亞雅崙kah Sial-bím。後來，約瑟家強盛起來，to̍h hō͘ in做苦工。
1:36 亞摩利人ê地界，是tùi A-khek-la̍h-pin山坪，tùi西拉一直去。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。