約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 約書亞tī示劍Ǹg民眾講話
約書亞聚集以色列眾支族來到示劍，召以色列ê長老kah in ê族長、審判官，以及官長來，in to̍hkhia7 tī上主ê面前。
24:2 約書亞kā眾人講：「上主—以色列ê上帝ánne講：在早lín ê祖先，to̍h是亞伯拉罕ê老父，拿福ê老父他拉，tòa tī大河hit-pêng，服事別个神明。
24:3 我tùi大河hit-pêng kā lín ê祖先亞伯拉罕取來，chhōa伊遍行迦南全地，koh hō͘伊ê kiáⁿ孫真chē，kā以撒賞賜hō͘伊做kiáⁿ；
24:4 koh kā雅各kah以掃賞賜hō͘以撒做kiáⁿ，kā西珥山賞賜hō͘以掃做產業，後來，雅各kah伊ê kiáⁿ孫落去埃及。
24:5 我差摩西kah亞倫，我mā降災禍tī埃及，照我tī hit中間所行ê，然後chhōa lín出埃及。
24:6 我chhōa lín ê祖先出埃及，lín to̍h到海岸，埃及人帶in ê車kah馬兵來jiok lín ê祖先直到紅海。
24:7 In求叫上主，祂to̍h用烏暗hē tī lín kah埃及人ê中間，koh hō͘海來kā in淹死。Lín lóng有親目看tio̍h我tī埃及所行ê tāichì。「Lín tòa tī曠野真chē日。
24:8 我chhōa lín去到tòa tī約旦河hit-pêng ê亞摩利人ê地。In kah lín交戰，我kā in交tī lín ê手中，lín to̍h得tio̍h in ê地；我tī lín ê面前kā in剿滅。
24:9 Hit時，摩押王西撥ê kiáⁿ巴力起來kah以色列交戰，in差人去叫比珥ê kiáⁿ巴蘭來kā lín咒詛。
24:10 我m̄聽巴蘭ê話，所以，祂連連kā lín祝福。Án-ne，我to̍h救lín脫離伊ê手。
24:11 「Lín過約旦河，來到耶利哥城；耶利哥城人、亞摩利人、比利洗人、迦南人、赫人、革迦撒人、希未人、耶布斯人，lóng kah lín交戰；我kā in交tī lín ê手中。
24:12 我差大隻蜂tī lín ê頭前飛，kā亞摩利人ê兩 个王，tùi lín ê面前趕出去，m̄是用你ê刀，mā m̄是用你ê弓。
24:13 我賞賜hō͘ lín ê土地m̄是lín所勞苦ê結果，á賞賜hō͘ lín城m̄是lín所起造ê，lín to̍htoa3 tī hit中間，koh有m̄是lín所栽種ê葡萄園、橄欖園，lín卻得tio̍h來食hiahê果子。
24:14 「Taⁿ lín tio̍h敬畏上帝，誠心實意服事祂，kā lín祖先tī大河hit-pêng kah tī埃及所服事ê神明除去，來服事上主。
24:15 若是lín掠服事上主做m̄好，今á日lín tio̍h揀選lín所beh服事ê：看是lín祖先tī大河hit-pêng所服事hiahê神明，á是lín所tòa in ê地ê亞摩利人hiahê神明？講tio̍h我kah我ê家，阮絕對beh服事上主。」
24:16 人民應講：「阮絕對無意思beh棄sak上主去服事別个神明，
24:17 因為上主—阮ê上帝bat chhōa阮kah阮ê祖先tùi埃及地做奴隸ê家出來，tī阮ê目chiu 前行hiahê大ê神跡，tī阮所行一切ê路，所經過ê ta̍k國，lóng有kā阮保護。
24:18 上主mā tī阮ê面前kā所有ê人民趕出去，趕出tòa tī chit所在ê亞摩利人，所以，阮mā beh服事上主，因為祂是阮ê上帝。」
24:19 約書亞對人民講：「Lín bē tàng服事上主，因為祂是聖ê上帝，絕對無容允用別个神明kah祂匹配，無beh赦免lín ê過失，lín ê罪惡。
24:20 Lín若離開上主去服事外邦ê神明，上主tī降福氣hō͘ lín了後，beh oa̍t-tńg身來降災禍hō͘ lín，kā lín滅亡。」
24:21 人民應約書亞講：「無lah；阮定tio̍h beh服事上主。」
24:22 約書亞對人民講：「Lín揀上主來kā祂服事，lín kakī 做lín ê見證。」In應講：「好，阮來做見證。」
24:23 約書亞講：「Lín taⁿ tio̍h除去lín中間所有外邦ê神明，hō͘ lín專心歸向上主—以色列ê上帝。」
24:24 人民應約書亞講：「阮beh服事上主—阮ê上帝，遵thàn祂ê話。」
24:25 Hit日，約書亞to̍h kah人民立約，tī示劍kā in設立律例kah法度。
24:26 約書亞kā chiahê話lóng寫tī上帝律法ê冊，koh tī hia khiā一塊大石頭 ，to̍h是tī上主聖所ê邊á ê橡樹腳。
24:27 約書亞對眾人講：「你看，chitê石頭beh做咱ê見證，因為它有聽tio̍h上主所吩咐咱一切ê話，所以，beh對lín做見證，恐驚lín會悖逆lín ê上帝。」
24:28 約書亞to̍h差人民出去，ta̍k人to̍h tńg去伊所得tio̍h ê地hia。
24:29 約書亞kah以利亞撒mā死亡
Chiahê tāichì以後，上帝ê奴僕，嫩ê kiáⁿ約書亞，一百十歲就死。
24:30 Into̍h kā伊埋葬tī伊ê產業ê境界內，to̍h是tī以法連山地ê Têng-ná-se-la̍h，tī Ga-sih山ê北pêng。
24:31 約書亞tī ·leh ê日，kah約書亞死了後，hiahê知影上主為以色列人所行chiahê tāichì ê長老iáu tī ·leh ê時，以色列人lóng服事上主。
24:32 以色列人tùi埃及所帶來約瑟ê骨頭，in kā伊埋葬tī示劍，to̍h是雅各早前用一百銀tùi示劍ê老父哈抹 hiahê kiáⁿ所買來ê地，to̍h做約瑟kiáⁿ孫ê產業。
24:33 亞倫ê kiáⁿ以利亞撒mā死，in to̍hka7伊埋葬tī伊ê kiáⁿ非尼哈所得tio̍h ê山崙á，to̍h是tī以法連ê山地。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。