約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 約書亞遣送東pêng支族ê人Tńg去故鄉
Hit時，約書亞叫流便人、迦得人kah瑪拿西半支族ê人來，
22:2 對in講：「上帝ê奴僕摩西所命令lín ê，lín lóng遵守，我所命令lín ê，lín mā lóng遵thàn。
22:3 Lín chiah chē日lóng無離開lín ê兄弟，一直到今á日，lín mā有守上主—lín ê上帝所命令lín tio̍h守ê。
22:4 Taⁿ上主—lín ê上帝照祂所應允ê，hō͘ lín兄弟得tio̍h平安，taⁿ lín thang倒tńg去lín ê布棚，到上帝ê奴僕摩西tī約旦河hit-pêng所賜hō͘ lín做產業ê地。
22:5 總是，lín迫切tio̍h謹慎，遵thàn上帝ê奴僕摩西所命令lín ê誡命律法，疼上主—lín ê上帝，行祂一切ê道路，守祂ê誡命，kah祂結聯，盡心盡性服事祂。」
22:6 就ánne，約書亞kā in祝福，差in去，in to̍htng2去in ê布棚。
22:7 瑪拿西半支族，摩西已經tī巴珊分業hō͘ in；iáu半支族約書亞tī約旦河hit-pêng西pêng，tī in兄弟中間分業hō͘ in。約書亞差in tńg去布棚ê時，kā in祝福，
22:8 koh kā in吩咐講：「Lín tio̍h帶真chē財物，真chē chengseⁿ，kah銀、金、銅、鐵，kah真chē衫褲，tńg去lín ê布棚，kā lín所搶對敵ê戰利品，kah lín ê兄弟做伙分。
22:9 就ánne，流便人、迦得人、瑪拿西半支族ê人，tùi迦南地ê示羅出發，離開以色列人，beh tńg去in得tio̍h基列地，to̍h是照上主託摩西所命令ê，得tio̍h做產業ê地。
22:10 約旦河邊ê祭壇
流便人、迦得人kah瑪拿西半支族，到約旦河邊一帶ê迦南地，to̍h tī近約旦河hia，起一座壇，hitê壇起了真大。
22:11 以色列人聽tio̍h講：「你看，流便人、迦得人kah瑪拿西半支族有tī迦南地ê頭前起一座壇，約旦河ê邊á，以色列人過去ê所在。」
22:12 以色列人聽tio̍h，以色列全會眾lóng聚集tī示羅，beh上去kah in交戰。
22:13 以色列人差祭司以利亞撒ê kiáⁿ非尼哈去基列地見流便人、迦得人kah瑪拿西半支族；
22:14 koh差十個首領kah伊去，to̍h是以色列ta̍k支族ta̍k族一个首領，ta̍k人tī以色列軍隊中做族長。
22:15 In到基列地，見tio̍h流便人、迦得人kah 瑪拿西半支族，對in講：
22:16 「上主ê全會眾ánne講，lín悖逆以色列ê上帝，今á日oa̍t-tńg身無koh tòe上主，為kakī 起一座壇，致使今á日悖逆上主，犯tio̍h這到底是啥物罪？
22:17 早前對比珥ê罪，咱kám iáu掠做是小khóa？雖然瘟疫臨到上主ê會眾，到今á日咱iáu未清氣。
22:18 Lín今á日竟然oa̍t-tńg身無koh tòe上主！Lín今á日悖逆上主，明á載祂ē對以色列ê全會眾受氣。
22:19 Lín所得tio̍h做產業ê地，若無清氣，to̍h thang過來上主ê地ê產業，to̍h是上主ē幕所tiàm ê所在，tī阮中間得tio̍h業。總是，m̄ thang悖逆上主，mā m̄ thang悖逆阮，m̄ thang tī上主—咱ê上帝ê壇以外，為kakī koh起壇。
22:20 早前謝拉ê干á孫亞干，kám無tī hitê應該獻ê物犯罪，to̍h有受氣臨到tī以色列ê全會眾？Hitê人tī伊所犯ê罪，m̄ nā伊kakī 一个人死。」
22:21 就ánne，流便人、迦得人kah瑪拿西半支族應以色列軍隊ê頭人講：
22:22 「全能ê上帝—上主！全能ê上帝—上主！祂知，以色列mā ē知，阮若有悖逆ê意思á是悖逆上主，(今á日無救阮)，
22:23 為kakī 起壇，beh oa̍t-tńg身無koh tòe上主，á是beh tī hit頂面獻燒祭、素祭kah謝恩祭，上主ē kā罪歸hō͘伊。
22:24 阮做chitê tāichì是為tio̍h提防chiah刁工做，是恐驚後日lín ê kiáⁿ孫會對阮ê kiáⁿ孫講：『Lín kah上主—以色列ê上帝有啥物關係？
22:25 流便人kah迦得人，上主tī lín kah阮ê中間設chitê約旦河做界限，taⁿ lín無份tī上主。』Án-ne，lín ê kiáⁿ孫to̍h ēhō͘阮ê kiáⁿ孫無koh敬畏上主。
22:26 所以，阮做伙講：『Taⁿ咱tio̍h為kakī 起一座壇，m̄是為tio̍h燒祭，mā m̄是為tio̍h別種ê祭，
22:27 to̍h是為tio̍h lín kah阮ê中間，以及lín kah阮後代ê中間做證據，hō͘阮thang tī上主ê面前，用阮ê燒祭、謝恩祭kah別種祭來服事祂，免得lín ê kiáⁿ孫後日對阮ê kiáⁿ孫講：『Lín tī上主內面無份。』
22:28 所以，阮講：『別日in若對阮á是阮ê後代ánne講，阮thang應講：Lín thang看上主ê壇ê款式，to̍h是阮ê祖先早前所起ê，m̄是為tio̍h燒祭kah別種ê祭，to̍h是為tio̍h beh做lín kah阮中間ê證據。』
22:29 阮tī上主—咱ê上帝ê會幕前以外，另外koh起一座壇，為tio̍h燒祭、素祭kah別種ê祭，來悖逆上主，今á日oa̍t-tńg身無koh tòe上主，阮絕對無chit款意思。」
22:30 祭司非尼哈kah會中hiahê首領，以及kah伊做伙來到以色列中ê軍隊ê頭人，to̍h是kah伊做伙來ê，聽tio̍h流便人、迦得人kah瑪拿西人所講ê話，to̍h lóng掠做是好。
22:31 祭司以利亞撒ê kiáⁿ非尼哈對流便人、迦得人kah瑪拿西人講：「今á日，阮知上主tī咱ê中間，因為lín無犯tio̍h chitê罪來得罪上主。Τaⁿ lín有救以色列人脫離上主ê手。」
22:32 祭司以利亞撒ê kiáⁿ非尼哈kah hiahê首領，離別流便人、迦得人，tùi基列地tńg去迦南地，到以色列人hia，kā in回覆。
22:33 以色列人掠chitê tāichì做好，就ánne，以色列人oló上主，無koh提起beh上去kah流便人、迦得人交戰，來毀壞in所tòa ê地。
22:34 流便人kah迦得人kā hitê壇叫做證據，因為講，chitê壇tī咱中間證明上主是上帝。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。