創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 亞伯拉罕歲壽長，年老，上主tī一切ê tāichì lóng賜福hō͘亞伯拉罕。
24:2 亞伯拉罕對伊厝內管理全部產業ê老奴僕講：「請kā你ê手hē tī我ê大腿下，
24:3 我beh叫你kí上主，to̍h是天ê上帝kah地ê上帝來chiùchōa。我tòa tī迦南人ê中間，你m̄ thang kā我ê kiáⁿ娶in ê chabó͘ kiáⁿ來做bó͘。
24:4 你tio̍h去我ê本地本族，kā我ê kiáⁿ以撒娶一个bó͘。」
24:5 奴僕應伊講：「設使chabó͘ gín-á m̄肯tòe我來chit所在，我kám tio̍h kā你ê kiáⁿ帶tńg去你所tùi hia出來ê所在？」
24:6 亞伯拉罕kā伊講：「你tio̍h謹慎，m̄ thang chhōa我ê kiáⁿ tńg去hia。
24:7 天ê上帝bat chhōa我離開老父ê家kah我本族ê地。祂對我講話，mā對我chiùchōa講：『我beh kā chitê地賞賜hō͘你ê kiáⁿ孫。』祂ē差祂ê使者tī你ê面前，你to̍h thang tùi hia kā我ê kiáⁿ娶一个bó͘。
24:8 設使chabó͘ gín-á m̄肯tòe你來，我kah你chiù ê choa7to̍h kah你無關係；總是，m̄ thang帶我ê kiáⁿ tńg去hia。」
24:9 奴僕to̍h kā伊ê手hē tī主人亞伯拉罕ê大腿下，為tio̍h chitê tāichì對伊chiùchōa。
24:10 Hitê奴僕tùi伊主人ê駱駝中，取十隻駱駝，koh帶伊主人ta̍k種ê財寶，出發去米所波大米，來到拿福ê城。
24:11 日beh暗，眾chabó͘ gín-á出來chhiūⁿ水；伊to̍hhou7駱駝跪tī城外ê井邊。
24:12 伊講：「我ê主人亞伯拉罕ê上帝—上主ah，求祢施恩hō͘我ê主人亞伯拉罕，hō͘我今á日有好機會。
24:13 我taⁿ khiā tī井邊，城內人ê chabó͘ gín-á teh出來chhiūⁿ水。
24:14 我beh對一个chabó͘ gín-á講：『請放落你ê水瓶，hō͘我lim水。』她若講：『請lim，我mā beh hō͘你ê駱駝lim。』願hitê chabó͘ gín-á是祢所定tio̍h beh hō͘祢ê奴僕以撒做bó͘ ê。Án-ne，我to̍h知祢施恩hō͘我ê主人。」
24:15 話講iáu未soah，利百加肩胛頭揹水瓶出來。她是彼土利生ê，彼土利是亞伯拉罕ê小弟拿福ê bó͘密迦ê kiáⁿ。
24:16 Hitê chabó͘ gín-á面貌非常súi，iáu是在室女，mā m̄ bat有人親近她。她落去井邊，chhiūⁿ滿她ê瓶to̍h起來。
24:17 奴僕走進前kā她迎接，講：「求你kā瓶內ê水淡薄á hō͘我lim。」
24:18 Cha-bó͘ gín-á講：「我ê主，請lim。」就趕緊kā水瓶放落來，the̍h tī手裡，hō͘伊lim。
24:19 Hō͘伊lim了後，她koh講：「我mā beh kā你ê駱駝chhiūⁿ水，hō͘ in lim夠額。」
24:20 她就趕緊kā瓶內ê水piàⁿ tī槽裡，koh走去井裡chhiūⁿ水，hō͘伊所有ê駱駝lim水。
24:21 Hitê人注目kā她看，恬恬無講話，ài beh知上主有賞賜伊順序ê路á無。
24:22 駱駝lim了後，hitê人to̍htheh8一个金環，重半舍客勒，兩 个金手環，重十舍客勒hō͘ hitê chabó͘ gín-á。
24:23 Hitê人講：「你是啥人ê chabó͘ kiáⁿ？請kā我講，lín老父ê家有所在thang hō͘阮歇á無？」
24:24 利百加to̍h kā伊講：「我是密迦tùi 拿福所生ê kiáⁿ，彼土利ê chabó͘ kiáⁿ。」
24:25 Koh對伊講：「阮有草料米糧充足，mā有所在thang hō͘你歇。」
24:26 Hitê人to̍hàⁿ頭敬拜上主，講：
24:27 「Tio̍h oló我ê主，亞伯拉罕ê上帝—上主，祂用慈愛誠實款待我ê主人，lóng無停止。關係我，上主tī路上引chhōa我到我ê主人兄弟ê家。」
24:28 Cha-bó͘ gín-á走tńg去，照chiahê話kā in老母全家ê人講。
24:29 利百加有一个阿兄，名叫做拉班，伊出去井邊，來見hitê人。
24:30 伊看tio̍h hitê金環，koh看tio̍h手環tī in小妹ê手，mā聽tio̍h in小妹利百加ê話，講：「Hitê人對我講ánne，ánne。」伊to̍h去hitê人hia，看tio̍h hitê人iáu khiā tī駱駝邊，óa近水井。
24:31 to̍h kā伊講：「你chitê得tio̍h上主賜福ê，請入來。你án怎khiā tī外面？我已經kā厝kah駱駝ê所在準備好勢。」
24:32 Hitê人to̍h入去伊ê厝，伊to̍hthau2駱駝所載ê，koh用草糧飼駱駝，phâng水hō͘ hitê人kah跟tòe ê人洗腳。
24:33 然後kā食物排tī伊ê面前，beh hō͘伊食。總是，伊講：「我無beh食，tio̍h thèng候我講明我ê使命。」拉班講：「請你講。」
24:34 伊to̍h講：「我是亞伯拉罕ê奴僕。
24:35 上主大大賜福hō͘我ê主人，hō͘伊興旺，koh hō͘伊羊、牛、銀、金、奴僕、女婢、駱駝kah驢。
24:36 我ê主人ê bó͘撒拉，年老ê時，kā我ê主人生一个kiáⁿ；我ê主人mā kā一切所有ê hō͘ chitê kiáⁿ。
24:37 我ê主人kah我chiùchōa講：『我tòa迦南人ê 所在，你m̄ thang kā我ê kiáⁿ娶in ê chabó͘ kiáⁿ做bó͘。
24:38 你tio̍h去我ê老父ê家，我ê本族hia，kā我ê kiáⁿ娶一个bó͘。』
24:39 我對我ê主人講：『恐驚chabó͘ gín-á m̄肯tòe我來。』
24:40 伊to̍hka7我講：『我所服事ê上主ē差祂ê使者kah你做伙去，hō͘你有順序ê路，你to̍h thang tùi我ê宗族，我ê父ê家，kā我ê kiáⁿ娶一个bó͘。
24:41 只要你去到我ê本族hia，to̍h算你已經實行你ê chiùchōa；in若m̄ hō͘你，我kah你chiù ê chōa，mā kah你無關係。』
24:42 今á日，我來到井邊，講：『我ê主人亞伯拉罕ê上帝—上主ah，祢若肯，求祢hō͘我所行ê路順序。』
24:43 我taⁿ khiā tī水井邊，對一个出來chhiūⁿ水ê chabó͘ gín-á講：『請你kā你瓶裡ê水淡薄á hō͘我lim；
24:44 她若講：做你lim，我mā beh為你ê駱駝chhiūⁿ水，願hitê chabó͘ gín-á做上主所定tio̍h beh hō͘我ê主人ê kiáⁿ做bó͘ ê。
24:45 我心內ê話講iáu未了，利百加to̍h出來，肩胛頭頂揹水瓶，落去井邊chhiūⁿ水。我to̍h kā她講：『請你hō͘我lim。』
24:46 她就趕緊tùi肩胛頭頂放落水瓶，講：「請lim，我mā beh hō͘你ê駱駝lim。』我to̍hlim，她mā hō͘我ê駱駝lim。
24:47 我koh問她講：『你是啥人ê chabó͘ kiáⁿ？』她應講：『我是密迦tùi拿福所生ê kiáⁿ—彼土利ê chabó͘ kiáⁿ。』我to̍h kā金鐶掛tī她ê鼻，kā手環掛tī她ê手。
24:48 我to̍hàⁿ頭拜上主，oló我ê主亞伯拉罕ê上帝—上主，因為祂chhōa我行tú好ê路，hō͘我得tio̍h我ê主ê小弟ê chabó͘孫，來hō͘伊ê kiáⁿ做bó͘。
24:49 Taⁿ lín若beh用慈愛kah誠實款待我ê主人，to̍h kā我答應；若m̄，mā kā我講，hō͘我thang知tio̍h ǹg左á是ǹg右。」
24:50 拉班kah彼土利應講：「Tāi-chì出tī上主，阮bē tàng對你講好á是m̄好。
24:51 你看，利百加tī你ê面前，你thang kā她chhōa去，照上主所講ê，hō͘你ê主人ê kiáⁿ做bó͘。」
24:52 亞伯拉罕ê奴僕聽tio̍h in chiahê話，就ǹg上主仆tī地裡。
24:53 Hit時，奴僕the̍h出銀器、金器kah衫褲送利百加，koh kā寶物送她ê阿兄kah老母。
24:54 奴僕kah tòe伊ê人lim食、歇暝。透早起來，to̍h講：「請差我tńg去我ê主人hia。」
24:55 利百加ê阿兄kah老母講：「請容允chabó͘ gín-á kah阮koh tòa幾工，siāng少十工，然後她to̍h thang去。」
24:56 M̄ koh，僕人講：「M̄-thang阻擋我，上主已經hō͘我順序ê路。請差我去，hō͘我tńg去我ê主人hia。」
24:57 In講：「阮叫chabó͘ gín-á來，探她ê話意。」
24:58 Into̍h叫利百加來，問她講：「你beh kah chitê人去無？」她講：「我beh去。」
24:59 Into̍h差小妹利百加kah她ê奶母，kah亞伯拉罕ê奴僕，以及tòe伊ê人去。
24:60 Into̍h kā利百加祝福，對她講：「阮小妹，願你做千萬人ê老母，願你ê kiáⁿ孫得tio̍h對敵ê城門。」
24:61 利百加kah她ê女婢起來，騎駱駝tòe hitê人；奴僕to̍h chhōa利百加去。
24:62 以撒tòa tī南地，hit時已經tùi Pí-jíⁿ-la̍h-hái-lâi ê路來。
24:63 日beh暗，以撒出來tī田裡，恬恬teh想。伊gia̍h頭一下看，看tio̍h駱駝來。
24:64 利百加看tio̍h以撒，to̍h tùi駱駝頂落來。
24:65 問hitê奴僕講：「Tī田裡行來迎接咱ê是啥人？」奴僕講：「是我ê主人。」利百加就the̍h帕來罩面。
24:66 奴僕kā所發生一切ê tāichì kā以撒講。
24:67 以撒就牽利百加入去伊ê老母撒拉ê布棚，娶伊做bó͘，koh真疼她。以撒tùi老母死後，到chit時chiah得tio̍h安慰。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。