約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 Phah贏亞摩利人
耶路撒冷王A-to-nî-sé-tek聽tio̍h約書亞攻取艾城，kā城全部滅掉，款待艾城kah她ê王，親像早前款待耶利哥城kah伊ê王，koh聽tio̍h tòa tī基遍ê人民kah以色列人立和約，tòa tī in中間，
10:2 to̍h真tio̍h驚；因為基遍是大城，親像一个京城，比艾城khah大，而且城內ê人lóng是勇士。
10:3 就ánne，耶路撒冷王A-to-nî-sé-tek差人去見希伯崙王Hô-hâm、耶末王Pí-lân、拉吉王雅非亞kah I-ki-lûn王底璧，講：
10:4 「請lín來我chia幫贊我，咱thang來去phah基遍，因為她kah約書亞以及以色列立和約。」
10:5 就ánne，亞摩利人五個王，to̍h是耶路撒冷王，希伯崙王，耶末王，拉吉王，I-ki-lûn王，大家聚集，kah in ê軍隊去，紮營tī 基遍ê對面，beh kā in攻擊。
10:6 基遍人to̍h差人去吉甲ê營見約書亞，講：「你m̄ thang kiu手m̄看你ê奴僕，求你趕緊來chia kā阮拯救，幫贊阮，因為tòa山地亞摩利人hiahê王，lóng聚集來beh攻擊阮。」
10:7 就ánne，約書亞kah伊所有ê戰士，以及所有大氣力ê勇士lóng tùi吉甲去。
10:8 上主kā約書亞講：「M̄免驚in，因為我已經kā in交tī你ê手，in無kah一个人tī你ê面前khiāē tiâu。」
10:9 約書亞忽然來到in hia，因為伊tùi吉甲透暝趕去hia。
10:10 上主hō͘ in tī以色列人ê面前紛亂，to̍h tī基遍kā inthâi死真chē，tī上伯和崙ê路kā in jiok，kā in phah到亞西加kah瑪基大。
10:11 In tī以色列人ê面前逃走，tùi伯和崙落去ê時，上主tùi天落大雹tī in ê身上，一直到亞西加 hō͘ in死，hiahê hō͘雹phah死ê，比以色列人用刀thâi死ê khah chē。
10:12 當上主kā亞摩利人交tī以色列人ê日，約書亞to̍h kā上主講，mā tī以色列人ê面前講：「日頭，你tio̍h停tī基遍ê頂面；月娘，你tio̍h停tī亞雅崙ê山谷。」
10:13 日頭to̍h停teh，月就歇teh，thèng候人民tī in ê對敵面前報仇。Chitê tāichì kám m̄是有寫tī Ngá-soah-jíⁿ ê冊？日頭停tī天ê中央，無趕緊落山，差不多有一日hiah久。
10:14 以前、以後lóng無koh有親像hit一日，得tio̍h上主聽人ê聲，是因為上主替以色列人交戰。
10:15 然後，約書亞kah以色列人民tńg來吉甲ê營內。
10:16 活掠亞摩利五個王
Hit五個王逃走，bih tī瑪基大ê洞內。
10:17 有人去kā約書亞講：「Hit五個王已經chhōe ·tio̍h à，lóng bih tī瑪基大ê洞內。
10:18 約書亞講：「徙大塊石到洞口，派人tiàm hia kā in顧守，
10:19 總是，lín m̄ thang停腳，tio̍h jiok lín ê對敵，phah in ê後隊，m̄ thang容允in入in ê城，因為上主—lín ê上帝已經kā in交tī lín ê手。」
10:20 約書亞kah以色列人kā inthâi死chē-chē，到全部剿滅chiah soah；其中chhun落來ê人lóng入去堅固ê城。
10:21 眾人to̍h安然tńg來瑪基大ê營，到約書亞hia。無kah一个人敢koh出聲講beh攻擊以色列人。
10:22 約書亞講：「開洞口，掠hit五個王出洞，來我chia。」
10:23 In就ánne行，掠hit五個王，to̍h是耶路撒冷王、希伯崙王、耶末王、拉吉王kah伊磯倫王，tùi洞內出來，帶來到伊hia。
10:24 掠hiahê王出來到約書亞hia ê時，約書亞to̍h叫以色列人民來，對hiahê kah伊做伙去ê軍長講：「Lín 行óa來，用腳踏tī chiahê王ê頷頸。」Into̍h行óa來，用腳踏tī in ê頷頸。
10:25 約書亞對in講：「Lín m̄免驚，mā m̄ thang懍，tio̍h勇敢壯膽，因為lín所beh攻擊一切ê對敵，上主ē ánne kā in款待。」
10:26 後來，約書亞kā in phah死，kā in吊tī五欉樹頂，in吊tī樹頂一直到ê-hng。
10:27 日落ê時，約書亞出令，to̍h tùi樹頂收身屍落來，hiat tī in所bih ê洞內，用幾nā塊大石hē tī洞口，到taⁿ iáu tī ·leh。
10:28 佔領Koh khah Chē亞摩利ê地
Hit日，約書亞攻取瑪基大，用刀kā in kah in ê王thâi死 ；hit內面ê人全部剿滅，無留kah半個。伊親像早前款待耶利哥城王ánne款待瑪基大ê王。
10:29 約書亞kah以色列人民tùi瑪基大hia去到立拿，攻擊立拿。
10:30 上主kā chitê城kah她ê王交tī以色列人ê手中，約書亞用刀kā伊kah hit內面ê群眾thâi死，無留kah半個。伊親像早前款待耶利哥城王ánne款待in ê王。
10:31 約書亞kah以色列人民tùi立拿hia去到拉吉，紮營tī它ê對面，來攻擊它。
10:32 上主kā拉吉交tī以色列人ê手。隔tńg工to̍h kā她攻取，用刀thâi死hit內面ê群眾，是照伊對立拿所行ê一切。
10:33 Hit時，基色ê王Hô-lân來beh幫贊拉吉，約書亞to̍h kā伊kah伊ê人民phah死，lóng無kā伊留kah半個。
10:34 約書亞kah以色列人民tùi拉吉去到伊磯倫，tī它ê對面紮營，來攻擊它。
10:35 Hit日，to̍h kā它征服，用刀kā伊thâi，tī hit日，全部剿滅hit內面ê群眾，是照伊對拉吉所行ê一切。
10:36 約書亞kah以色列人民tùi伊磯倫去到希伯崙，攻擊它，
10:37 就攻取她，用刀kā in kah in ê王thâi死，koh phah伊所屬ê城，thâi死hit內面ê人民，lóng無留kah半個，是照伊對伊磯倫所行ê一切，kā她kah hit內面ê眾人全部滅掉。
10:38 約書亞kah以色列人民tńg來到底璧，攻擊它，
10:39 就征服她kah她ê王，以及屬伊ê城，用刀kā inthâi，全部剿滅hit內面ê群眾，無留kah半個，照伊前款待希伯崙ê，taⁿ mā款待底璧kah它ê王，mā照伊前款待立拿kah伊ê王ánne。
10:40 Án-ne，約書亞phah全地，to̍h是山地、南方ê地、平原、山坪kah in所有ê王，無留kah半個。見若會喘氣ê全部剿滅，照上主—以色列ê上帝所命令ê。
10:41 Tùi加低斯巴尼亞到迦薩，koh有歌珊全地，以及基遍，lóng hō͘約書亞phah。
10:42 Hiahê王kah in ê地，約書亞做一下kā in取起來，因為上主—以色列人ê上帝替以色列交戰。
10:43 約書亞kah以色列ê群眾to̍h tńg來到吉甲ê營房。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。